គតិ ៧ឃ្លា របស់អ្នកនិពន្ធសៀវភៅ The Seth Material លោកស្រី Jane Roberts
ខាងក្រោមនេះគឺជាគតិចំនួន ៧ឃ្លា របស់អ្នកនិពន្ធសៀវភៅដ៏មានឥទ្ធិពលមួយក្បាលដែលមានចំណងជើងថា The Seth Material របស់អាមេរិកគឺលោកស្រី Jane Roberts ឬ Seth:
១) «អ្នកងប់ងុលទៅនឹងតួនាទីរបស់អ្នកខ្លាំងពេក ជក់ចិត្តទៅនឹងការពិតដែលអ្នកបានបង្កើតខ្លាំងពេក ឈ្លក់វង្វេងទៅនឹងបញ្ហា ឧបសគ្គលំបាក ក្ដីសង្ឃឹម និងសេចក្ដីទុក្ខសោកនៃតួនាទីជាក់លាក់ណាមួយរបស់អ្នកខ្លាំងពេករហូតទាល់តែអ្នកភ្លេចថាពួកវាគឺជាការបង្កើតរបស់អ្នក។»
២) «ការព្យាបាលបែបធម្មជាតិនៃសំឡេងអាចកើតឡើងនៅពេលអ្នកធ្វើរឿងដ៏សាមញ្ញមួយដូចជាស្ដាប់សំឡេងភ្លៀងធ្លាក់។ អ្នកមិនត្រូវការថ្នាំជក់ ការសណ្ដំ ឬសូម្បីតែការសមាធិនោះឡើយ។»
៣) «បើទោះជានៅក្នុងសង្គមបុព្វកាល គ្រូពេទ្យដែលប្រើវិជ្ជាវេទមន្តនិងអ្នកព្យាបាលតាមបែបធម្មជាតិដទៃទៀតក៏ដឹងដែរថាចំណុចនៃអានុភាពគឺជាបច្ចុប្បន្ន។»
៤) «បើអ្នកផ្ចង់ស្មារតីទៅលើការគិតដែលមានសតិដឹងរបស់អ្នក នោះអ្នកនឹងរកឃើញថាអ្នកកំពុងតែផ្ដោតអារម្មណ៍ទៅលើជ្រុងអវិជ្ជមានទាំងនោះដែលធ្វើឲ្យអ្នកភ័យខ្លាច។»
៥) «អ្នកទទួលបាននូវអ្វីដែលអ្នកផ្ដោតអារម្មណ៍ទៅលើ ហើយជំនឿរបស់អ្នកមួយភាគធំទទួលខុសត្រូវទៅលើផ្នែកទាំងនោះដែលអ្នកផ្ដោតអារម្មណ៍ទៅលើ។»
៦) «រឿងនៃជីវិតរបស់អ្នកត្រូវបានសរសេរដោយអ្នក ដោយគ្រប់អ្នកអាននៃសៀវភៅនេះ។ អ្នកគឺជាអ្នកនិពន្ធ។ ហេតុនេះហើយវាមិនមានហេតុផលអ្វីនោះឡើយក្នុងការដែលអ្នកមើលរឿងនេះហើយមានអារម្មណ៍ថាជាប់ឃុំឃាំងដោយវានោះ។ អំណាចក្នុងការផ្លាស់ប្ដូរស្ថានភាពរបស់អ្នកគឺជារបស់អ្នក។ អ្នកគ្រាន់តែត្រូវអនុវត្តវាប៉ុណ្ណោះ។»
៧) «អ្នកត្រូវចាប់ផ្ដើមទុកចិត្តលើខ្លួនឯង។ បើមិនដូច្នោះទេ នោះអ្នកនឹងស្វែងរកអ្នកដទៃដើម្បីបញ្ជាក់ពីគុណសម្បត្តិរបស់អ្នកទៅឲ្យអ្នកជារៀងរហូត ហើយអ្នកនឹងមិនចេះរីករាយនោះឡើយ។ អ្នកនឹងតែងតែសួរអ្នកដទៃអ្វីដែលត្រូវធ្វើ ហើយក្នុងពេលជាមួយគ្នាក៏ស្អប់គុំកួនមនុស្សដែលអ្នកសុំជំនួយបែបនោះទៀតផង។»
ដោយ៖ ស្រីពៅ
អត្ថបទទាក់ទង៖ គតិចំនួន៥ឃ្លារបស់អ្នកនិពន្ធអាមេរិក Suzy Kassem ដែលអ្នកគួរយកទៅគិតពិចារណា
