សុភាសិតរបស់ទួរគីចំនួន ១២ឃ្លា ដែលអ្នកគួរអាននិងពិចារណា
ទួរគីមានសុភាសិតមួយឃ្លាពោលថា «ពាក្យពិតមិនត្រូវការសម្បថនោះឡើយ។» បុគ្គលមានបញ្ញាមិនប្រើប្រាស់សម្បថដើម្បីអូសទាញភាគីម្ខាងទៀតឲ្យជឿជាក់ទៅលើអ្វីដែលខ្លួនកំពុងនិយាយនោះឡើយ។ នៅលើលោកនេះគ្មានអ្វីមួយដែលអាចយកមកកំណត់ឲ្យច្បាស់លាស់ថាទៀងបានឡើយ។ បើពាក្យរបស់អ្នកពិតជាពិតមែន ចិត្តរបស់អ្នកពិតជាពិតដូចអ្វីដែលអ្នកបាននិយាយមែន នោះអ្នកគួរតែឲ្យទង្វើរបស់អ្នកជាអ្នកបញ្ជាក់ពីភាពពិតរបស់វាវិញទៅ។ តាមពិតទៅ ការពិតមិនមែនងាយស្រួលដូចអ្វីដែលយើងមើលឃើញនៅខាងក្រៅនោះទេ។
មនុស្សខ្លះនិយាយចេញមកហាក់ដូចជាពោរពេញដោយល្បិចកលមិនគួរឲ្យទុកចិត្ត តែតាមពិតពួកគេបែរជាមនុស្សដែលស្មោះត្រង់។ រីឯមនុស្សខ្លះវិញនិយាយចេញមក ទង្វើស្ដែងចេញមកហាក់ដូចជាគួរឲ្យទុកចិត្តណាស់ ក៏ប៉ុន្តែនៅក្នុងចិត្តបែរជាបង្កប់នូវចេតនាមិនល្អទៅវិញ។ មើលឃើញពីចេតនាពិតរបស់មនុស្សម្នាក់ៗមិនមែនគ្រាន់តែមើលទៅលើពាក្យសម្ដីនិងទង្វើអាចសម្រេចបាននោះឡើយ។ ហេតុនេះហើយទើបបានជាការជួបមនុស្សដែលមានការយល់ច្រឡំចំពោះខ្លួនឯងគឺជារឿងធម្មជាតិរបស់លោកនេះទេ។ ចំណុចនេះមិនសំខាន់នោះទេ អ្វីដែលសំខាន់គឺនៅពេលអ្នកឃើញចិត្តខ្លួនឯងស្អាតស្អំគឺបានហើយ។ ខាងក្រោមនេះគឺជាសុភាសិតរបស់ទួរគីចំនួន១២ឃ្លា ដែលអ្នកគួរអាននិងពិចារណា៖
១) «សេចក្ដីអត់ធ្មត់គឺជាគន្លឹះនៃភាពរីករាយ។»
២) «ទាល់តែមានការសាបព្រោះគ្រាប់ពូជបើមិនដូច្នោះទេវាមិនមានការប្រមូលផលនោះឡើយ។»
៣) «នៅលើលោកនេះគ្មាននរណាម្នាក់ដែលមិនមានការឈឺចាប់នោះទេ។»
៤) «រាល់ភាពល្អឥតខ្ចោះទាំងអស់គឺជាការរលាយសាបសូន្យ។»
៥) «គ្រប់សំណាងអាក្រក់ទាំងអស់គឺជាការប្រឹក្សា។»
៦) «ភាពស្កប់ស្កល់នៃបេះដូងប្រសើរជាជាងទ្រព្យសម្បត្តិ។»
៧) «លុយបិទបាំងទោសកំហុស។»
៨) «ជាជាងបើកមាត់របស់អ្នក ចូរបើកភ្នែករបស់អ្នកវិញ។»
៩) «ជនដែលបានមើលឃើញសេចក្ដីស្លាប់ ផ្ដល់ការអនុញ្ញាតដល់ជំងឺ។»
១០) «ពាក្យពិតមិនត្រូវការសម្បថនោះឡើយ។»
១១) «បើទោះជាពាក្យសម្ដីគឺជាប្រាក់ តែភាពស្ងៀមស្ងាត់គឺជាមាស។»
១២) «ការលំបាកបង្រៀនមនុស្ស។»
ដោយ៖ ស្រីពៅ
