សម្ដី ៩ឃ្លា របស់តារាហូលីវូដ Marilyn Monroe ដែលបង្ហាញពីការគិតឯកជនរបស់គាត់
លោកស្រី Marilyn Monroe គឺជាតារាសម្ដែងមួយរូបដែលស្ថិតនៅក្នុងចំណោមជាតារាហូលីវូដដ៏ល្បីល្បាញបំផុតមួយ។ លោកស្រីបានកើតនៅក្នុងឆ្នាំ១៩២៦ និងត្រូវបានចិញ្ចឹមបីបាច់នៅក្នុងទីក្រុង Los Angeles។ លោកស្រី Marilyn Monroe បានចំណាយពេលភាគច្រើនរបស់គាត់អំឡុងពេលកុមារភាពនៅក្នុងអង្គការកុមារកំព្រា និងបានរៀបការនៅអាយុទើបតែ១៦ឆ្នាំ។ បើទោះជាជីវិតជាតារាសម្ដែងរបស់គាត់ឡើងខ្ពស់ត្រដែតក៏ដោយ ប៉ុន្តែគាត់មានបញ្ហានៅក្នុងជីវិតឯកជនរាប់មិនអស់ ប្រឈមមុខជាមួយនឹងការញៀនថ្នាំ ជំងឺធ្លាក់ទឹកចិត្ត និងរោគចិត្តរសាប់រសល់។ លោកស្រីធ្លាប់បានរៀបការអស់៣ដង ដែល២ដងចុងក្រោយជាមួយតារាបាល់បោះ Joe DiMaggio ត្រូវបានលែងលះនៅឆ្នាំ១៩៥៥ និងជាមួយអ្នកនិពន្ធរឿងល្ខោនលោក Arthur Miller លែងលះក្នុងឆ្នាំ១៩៦១។
នៅថ្ងៃទី៤ សីហា ឆ្នាំ១៩៦២ លោកស្រី Monroe ក៏ត្រូវបានគេរកឃើញថាស្លាប់ដោយសារទទួលទានថ្នាំប្រភេទម្យ៉ាងហៅថា Barbiturate លើសកម្រិត នៅក្នុងវ័យទើបតែ៣៦ឆ្នាំ។ ទោះជាយ៉ាងណា ជាងកន្លះសតវត្សរិ៍ក្រោយមក គាត់នៅតែជានិមិត្តរូបដ៏ធំមួយនៅក្នុងវប្បធម៌ពេញនិយម។ ខាងក្រោមនេះគឺជាសម្ដីចំនួន៩ឃ្លារបស់លោកស្រី Monroe ដែលអាចឲ្យអ្នកបានស្វែងយល់ពីការគិតបែបឯកជនរបស់គាត់៖
- «ស្ត្រីដែលស្វែងរកភាពរស្មើភាពគ្នាជាមួយបុរស មិនទាន់មានមហិច្ឆតា។»
- «បើខ្ញុំសង្កេតមើលគ្រប់ច្បាប់ទម្លាប់ទាំងអស់ ខ្ញុំនឹងមិនអាចធ្វើអ្វីបាននោះឡើយ។»
- «មកទល់ពេលនេះ សោកសៅពេលឯកាម្នាក់ឯងប្រសើរជាងសោកសៅនៅពេលនៅជាមួយនរណាម្នាក់។»
- «សុបិនក្លាយជាតារាសម្ដែងគួរឲ្យរំភើបចិត្តជាងបានក្លាយជាតារាសម្ដែងមួយរូប។»
- «តារាសម្ដែងមិនមែនជាម៉ាស៊ីននោះទេ ប៉ុន្តែពួកគេចាត់ទុកអ្នកដូចជាម៉ាស៊ីន។ គឺជាម៉ាស៊ីនលុយ។»
- «មានពេលខ្លះខ្ញុំមានអារម្មណ៍ថាជីវិតរបស់ខ្ញុំគឺជាការបដិសេធដ៏ធំមួយ។»
- «ភាពល្បីល្បាញមិនបំពេញអ្នកនោះទេ។ វាធ្វើឲ្យអ្នកកក់ក្ដៅបន្តិច ប៉ុន្តែភាពកក់ក្ដៅនោះគ្រាន់តែបណ្ដោះអាសន្នតែប៉ុណ្ណោះ។»
- «ភាពល្អឥតខ្ចោះគឺជាភាពស្រស់ស្អាត ភាពឆ្កួតឡប់គឺជាប្រាជ្ញា ហើយការដែលគួរឲ្យអស់សំណើចជាខ្លាំងប្រសើរជាងការដែលគួរឲ្យធុញទ្រាន់ជាខ្លាំង។»
- «តើធ្វើជា Marilyn Monroe មានអ្វីល្អទៅ ? ហេតុអ្វីបានជាខ្ញុំមិនអាចធ្វើត្រឹមតែជាស្ត្រីធម្មតាម្នាក់?»
ដោយ៖ ស្រីពៅ
