នាំចេញទៅកាន់ទីផ្សារអឺរ៉ុប ផលិតផលប្រភេទនេះត្រូវជាប់ពន្ធ១២%
ប្រព័ន្ធអនុគ្រោះពន្ធសព្វមុខទំនិញលើកលែងតែសព្វាវុធ (EBA) ទើបតែត្រូវបានគណៈកម្មការអឺរ៉ុប សម្រេចកាត់ផ្ដាច់ផ្នែកខ្លះពីកម្ពុជា កាលពីថ្ងៃទី១២ កុម្ភៈ ឆ្នាំ២០២០ កន្លងទៅ។ ក្នុងចំណោមផលិតផលចំនួន ២០ភាគរយ ដែលតម្រូវឲ្យមានការបង់ពន្ធពេលនាំទៅកាន់ទីផ្សារអឺរ៉ុប ក្នុងនោះមានផលិតផលប្រភេទ សម្លៀកបំពាក់ គ្រឿងប្រើប្រាស់បន្ទាប់បន្សំ ដែលធ្វើឡើងដោយការចាក់ និងមិនចាក់ ត្រូវបានកំណត់ពន្ធនាំចេញចំនួន ១២ភាគរយ។
ប្រភេទផលិតផលដែលត្រូវបានកំណត់ពន្ធនាំចេញចំនួន ១២ភាគរយ រួមមានផលិតផលដែលមានលេខកូដសម្គាល់ ៦១០៣ ត្រូវបានកំណត់ពន្ធ ចំនួន៣មុខ, លេខកូដ៦១០៥ ត្រូវបានកំណត់ពន្ធលើគ្រប់មុខទំនិញ, លេខកូដ ៦១០៧ កំណត់ពន្ធគ្រប់មុខ, លេខកូដ ៦១០៩ កំណត់ពន្ធលើគ្រប់មុខ, លេខកូដ ៦២០៣ កំណត់ពន្ធ៣មុខ, លេខកូដ ៦២០៥ គ្រប់មុខ, លេខកូដ ៦២០៧ កំណត់ពន្ធគ្រប់មុខ និងលេខកូដ ៦២១១ កំណត់ពន្ធលើគ្រប់មុខទំនិញ។
ក្រៅពីប្រភេទផលិតផល សម្លៀកបំពាក់ គ្រឿងបន្ទាប់បន្សំ ដែលធ្វើឡើងដោយចាក់ និងមិនចាក់ ខាងលើនេះ ក៏នៅមានប្រភេទផលិតផលមួយចំនួនទៀតដែលត្រូវបង់ពន្ធរួមមាន អំពៅ, វត្ថុធ្វើអំពីស្បែក, បរិក្ខារធ្វើពីរោមសត្វ, បរិក្ខារបំពាក់កែបសេះ បង្ហៀរសេះ, គ្រឿងប្រដាប់សម្រាប់ធ្វើដំណើរ, កាបូប, វត្ថុវេចខ្ចប់ប្រហាក់ប្រហែល, វត្ថុធ្វើពីពោះវៀនសត្វ។ ក្រៅពីនេះមាន ប្រដាប់ពាក់ជើង, ស្រោមជើង, វត្ថុប្រហាក់ប្រហែលគ្នា ភាគរបស់ទាំងនោះ កំណត់សម្គាល់។
គួរបញ្ជាក់ផងដែរថា គណៈកម្មការអឺរ៉ុប បានសម្រេចដកការអនុគ្រោះពន្ធ «ជាបណ្ដោះអាសន្ន» ពីកម្ពុជា លើទំនិញចំនួន៤០ប្រភេទ ដែលភាគច្រើនជាសម្លៀកបំពាក់។ ផលិតផលទាំងអស់នេះ នាំចេញពីកម្ពុជាទៅអឺរ៉ុបក្នុងតម្លៃសរុបប្រមាណ១ពាន់លានអឺរ៉ូជារៀងរាល់ឆ្នាំ៕
ដៅយ៖ ជួប ស្រីរ័ត្ន
