Angela Schwindt បាន​និយាយ​ថា «នៅ​ពេល​ដែល​យើង​កំពុងតែ​បង្រៀន​កូនៗ​គ្រប់យ៉ាង​អំពី​ជីវិត កូនៗ​របស់​យើង​បាន​បង្រៀន​យើង​ថា​តើ​ជីវិត​គ្រប់យ៉ាង​គឺ​គ្រាន់តែ​ជា​អ្វី។» ក្មេងៗ​គឺ​បរិសុទ្ធ​ណាស់។ ពួកគេ​ងាយស្រួល​នឹង​ធ្វើឲ្យ​រីករាយ​និង​សើច​ក្អាកក្អាយ។ ប៉ុន្តែ នៅ​ពេល​ក្មេង​នេះ​ដឹង​ក្ដី​បន្តិច​ម្ដងៗ​នៅ​ក្នុង​សង្គម ពួកគេ​ក៏​ចាប់ផ្ដើម​បាត់បង់​ភាព​បរិសុទ្ធ​មិន​ដឹង​អី​នេះ​បន្តិច​ម្ដងៗ​ទៅ​តាម​នោះ​ដែរ។ ពួកគេ​ក៏​ចាប់ផ្ដើម​មើល​ឃើញ​ថា​ពិភពលោក​មិនមែន​សាមញ្ញ​ដូច​ទៅ​នឹង​អ្វី​ដែល​ពួកគេ​ធ្លាប់​មើល​ឃើញ​នោះ​ទេ។ រឿងរ៉ាវ​នៅ​ក្នុង​លោក​នេះ​ស្មុគស្មាញ​និង​ជំពាក់ជំពិន​គ្នា​ណាស់។ កាន់តែ​ដឹង​ក្ដី កាន់តែ​ពិបាក​ស្វែងរក​សេចក្ដី​សុខ​នៅ​ក្នុង​ជីវិត។

នៅ​ពេល​ក្នុង​ជីវិត​អ្នក អ្នក​ចាប់ផ្ដើម​មាន​កូន​ឬ​បាន​កសាង​ទំនាក់ទំនង​យ៉ាង​ជិតស្និទ្ធ​ជាមួយ​កូន​ក្មេង​ណា​ម្នាក់ នៅ​ពេល​ដែល​អ្នក​បាន​បង្រៀន​ពួកគេ​គ្រប់យ៉ាង​អំពី​ជីវិត ពួកគេ​នឹង​បង្រៀន​យើង​វិញ​ថា​តើ​ជីវិត​គ្រប់យ៉ាង​គឺ​គ្រាន់តែ​ជា​អ្វី។ នៅ​ពេល​អ្នក​មើល​ឃើញ​ស្នាម​ញញឹម​និង​សំណើច​ក្អាកក្អាយ​របស់​ពួកគេ ពួកគេ​កំពុងតែ​ដាស់​ភាព​បរិសុទ្ធ​មិន​ដឹង​អី​របស់​អ្នក​ដែល​អ្នក​បាន​កប់​វា​ចោល​ជា​យូរ​មក​ហើយ​នេះ​ឲ្យ​ភ្ញាក់​ឡើង​វិញ ឲ្យ​អ្នក​ចាប់ផ្ដើម​រក​ឃើញ​សេចក្ដី​សុខ​នៅ​ក្នុង​រឿង​ដែល​សាមញ្ញៗ​បំផុត​នៅ​ក្នុង​ជីវិត​របស់​អ្នក​ដែល​អ្នក​តែងតែ​មើល​រំលង​មិន​ឃើញ។ ខណៈ​នោះ​អ្នក​នឹង​ដឹង​ថា​តើ​តាម​ពិត​ជីវិត​គ្រាន់តែ​ជា​ការ​ដែល​មាន​សេចក្ដី​សុខ​យ៉ាង​សាមញ្ញ​នៅ​ក្នុង​ផ្លូវ​ចិត្ត​តែ​ប៉ុណ្ណោះ​ឯង។

ខាងក្រោម​នេះ​គឺជា​ទស្សន​ចំនួន​១០​ឃ្លា ដែល​អាច​ដាស់​កូន​ក្មេង​នៅ​ក្នុង​វិញ្ញាណ​របស់​អ្នក​ឲ្យ​ភ្ញាក់​ឡើង​វិញ៖

១) «អ្នក​ដឹង​ថា​កូន​របស់​អ្នក​បាន​ធំ​ដឹង​ក្ដី​ហើយ​នៅ​ពេល​ដែល​ពួកគេ​ចាប់ផ្ដើម​សួរ​សំណួរ​ដែល​មាន​ចម្លើយ។» John J. Plomp

២) «មាន​ពេល​ខ្លះ​អ្នក​ត្រូវ​ធំ​ដឹង​ក្ដី​មុន​ពេល​មើល​ឃើញ​តម្លៃ​ទៅលើ​ថា​តើ​អ្នក​ធំ​ដឹងក្ដី​ដោយ​របៀប​ណា។» Daniel Black

៣) «ក្មេងៗ​មិន​ត្រឹមតែ​បរិសុទ្ធ​មិន​ដឹង​អី​ហើយ​ឆ្ងល់​ច្រើន​នោះ​ទេ ប៉ុន្តែ​ក៏​ថែមទាំង​សុទិដ្ឋិនិយម​និង​ពោរពេញ​ដោយ​ភាព​រីករាយ​ផង​ដែរ។ ពួកគេ និយាយ​ឲ្យ​ខ្លី​ទៅ គឺជា​គ្រប់យ៉ាង​ដែល​មនុស្ស​ជំទង់​ប្រាថ្នា​សូម​ឲ្យ​ដូច​បែប​នោះ​ដែរ។» Carolyn Haywood

៤) «ក្មេងៗ​ធ្វើឲ្យ​ជីវិត​របស់​អ្នក​សំខាន់។» Erma Bombeck

៥) «វិញ្ញាណ​ត្រូវ​បាន​ព្យាបាល​ដោយ​បាន​នៅ​ជាមួយ​ក្មេងៗ។» Fyodor Dostoevsky

៦) «នៅ​ពេល​ដែល​យើង​កំពុងតែ​បង្រៀន​កូនៗ​គ្រប់យ៉ាង​អំពី​ជីវិត កូនៗ​របស់​យើង​បាន​បង្រៀន​យើង​ថា​តើ​ជីវិត​គ្រប់យ៉ាង​គឺ​គ្រាន់តែ​ជា​អ្វីមួយ។» Angela Schwindt

៧) «មនុស្ស​ជំទង់​គ្រាន់តែ​ជា​ក្មេងៗ​ដែល​ហួស​សម័យ​ប៉ុណ្ណោះ។» Dr. Seuss

៨) «បើ​ទោះ​ជា​មនុស្ស​វ័យ​នៅ​ក្មេង​នៅ​ឡើយ​ក៏​ដោយ ពួកគេ​មិន​គួរ​ត្រូវ​បាន​រារាំង​ពី​ការ​និយាយ​អ្វី​ដែល​ពួកគេ​គិត​នោះ​ឡើយ។» Anne Frank

៩) «ក្មេងៗ​គួរតែ​ត្រូវ​បាន​បង្រៀន​ពី​របៀប​គិត មិនមែន​អ្វី​ដែល​ត្រូវ​គិត​ឡើយ។» Margaret Mead

១០) «ក្មេងៗ​មិន​សូវ​ត្រូវការ​មនុស្ស​ដែល​ពូកែ​និយាយ​ជាមួយ​ដូច​ទៅ​នឹង​ត្រូវការ​មនុស្ស​ដែល​ពូកែ​ស្ដាប់​នោះ​ឡើយ។» Robert Brault

ដោយ៖ ស្រីពៅ