បើចង់ចាប់ផ្ដើមអាជីវកម្ម មិនត្រូវភ្លេចគិតពីប្រព័ន្ធបច្ចេកវិទ្យានោះទេ
ប្រព័ន្ធបច្ចេកវិទ្យាបានផ្លាស់ប្ដូរ និងជួយសម្រួលឲ្យការរស់នៅរបស់មនុស្សកាន់ងាយស្រួល និងទំនើបឡើងពីមួយថ្ងៃទៅមួយថ្ងៃ ដោយបច្ចុប្បន្នប្រព័ន្ធនេះបានគ្របដណ្ដប់ស្ទើរគ្រប់វិស័យទាំងអស់ទៅហើយ។ ដោយសារភាពសំខាន់និងមិនអាចខ្វះបាន លោក យ៉ង់ ប៉ាក់ អគ្គនាយកក្រុមហ៊ុន អាហ្គ្រីប៊ី (ខេមបូឌា) Agrebee Cambodia បានលើកឡើងថា «នៅពេលគិតដល់ការចាប់ផ្ដើមអាជីវកម្ម ត្រូវគិតពី IT ជាមុនសិន ថាតើវាមានទំនាក់ទំនងគ្នាឬអត់»។
ការលើកឡើងខាងលើ ធ្វើឡើងនៅក្នុងកម្មវិធី The Executive Talks 2020 ក្រោមប្រធានបទ “ឱកាសកំណើនក្នុងវិស័យកសិ-ពាណិជ្ជកម្ម” កាលពីថ្ងៃទី៣១ មករា ឆ្នាំ២០២០ កន្លងទៅនា ក្រុមហ៊ុនផ្សារមូលបត្រកម្ពុជា (ផ.ម.ក.)។
នាឱកាសនោះ លោក យ៉ង់ ប៉ាក់ បានចែករំលែកថា បច្ចេកវិទ្យាពិតជាអាចជួយបានយ៉ាងច្រើន ជាពិសេសសម្រាប់អ្នកដែលចង់រកស៊ីនៅក្នុងវិស័យកសិកម្មដូចជារូបលោក ចាំបាច់ត្រូវតែផ្ដោតលើប្រព័ន្ធបច្ចេកវិទ្យា (IT) ឲ្យបានច្រើន ដូចជាចេះប្រើកម្មវិធីនានា ឬយ៉ាងហោចណាស់ក៏ត្រូវចេះពីរបៀបឆែកមើលនៅក្នុងហ្គោហ្កល (google)ដែរ ថាតើអាជីវកម្មដែលយើងចង់ធ្វើនោះមានគេធ្វើឬនៅ ហើយបើយើងចង់ធ្វើដែរតើគួររៀនពីគេដោយរបៀបណា។
លោកបន្តថា ដូចជានៅផ្នែកហិរញ្ញវត្ថុនៃក្រុមហ៊ុនរបស់លោកដែលគ្រប់គ្រងលុយរាប់លានដុល្លារ និងគ្រប់គ្រងលើមនុស្សរាប់រយនាក់ ដោយប្រើមនុស្សត្រឹមតែ២នាក់ប៉ុណ្ណោះ ហើយពួកគាត់ទាំងពីរនោះមានតួនាទីសំខាន់ផ្នែកគ្រប់គ្រង និងបញ្ជាតាមប្រព័ន្ធបច្ចេកវិទ្យា ឧទាហរណ៍ ការបើកប្រាក់ខែបុគ្គលិក និងរើសបុគ្គលិកជាដើម ហើយអ្វីៗគឺត្រូវបានដំណើរការដោយរលូន។
ទន្ទឹមនឹងការលើកឡើងរបស់លោក យ៉ង់ ប៉ាក់ លោក សុង ខេងលាន ប្រធានសហគ្រាស ស៊ី អេស អិល ក៏បានចែករំលែកផងដែរថា បច្ចេកវិទ្យាពិតជាសំខាន់និងជួយបានច្រើន ហើយនាពេលអនាគតប្រសិនបើខ្វះប្រព័ន្ធបច្ចេកវិទ្យាគឺអាជីវកម្មនិងមិនអាចដើរទាន់គេបាននោះឡើយ។ ប៉ុន្តែអ្វីដែលកាន់តែសំខាន់ជាងនេះទៀតគឺ ត្រូវមានមូលដ្ឋានគ្រឹះនៃដំណើរការផលិតឲ្យរឹងមាំជាមុនសិន៕
ដោយ៖ ជួប ស្រីរ័ត្ន
