ជើងហោះហើរត្រង់ចិន-កម្ពុជាគ្រោងនឹងបើកសម្ពោធដំបូងនៅចុងខែមេសានេះ
ចិនយល់ព្រមទទួលយកសំណើសម្រួលឲ្យមានការហោះហើរត្រង់ពីប្រទេសចិន មកកាន់កម្ពុជាតែម្ដង ដោយជើងហោះហើរដំបូងនឹងត្រូវបើកសម្ពោធ នាឱកាសកម្មវិធីបញ្ចប់ឆ្នាំទេសចរណ៍និងវប្បធម៌ចិនកម្ពុជា២០១៩ នាដើមខែមេសា ឆ្នាំ២០២០ ខាងមុខនេះ នាទីក្រុងស៊ិនឆូវ ប្រទេសចិន។ នេះបើតាមការលើកឡើងរបស់ ឯកឧត្ដម ថោង ខុន ប្រធានប្រតិភូក្រសួងទេសចរណ៍ នាឱកាសជួបសវនាការជាមួយថ្នាក់ដឹកនាំបក្ស និងរដ្ឋបាលក្រុង ស៊ិងឆូវ និងខេត្តហឺណាន កាលពីពេលកន្លងទៅ។
ឯកឧត្ដមរដ្ឋមន្ត្រីបានបញ្ជាក់ថា គោលដៅយុទ្ធសាស្ត្រថ្មីមួយទៀតដែលក្រសួងទេសចរណ៍សហការជាមួយក្រុមហ៊ុនអាកាសចរណ៍កម្ពុជា អង្គរអ៊ែរ និងក្រុមហ៊ុនអាកាសចរណ៍ផ្សេងទៀត រួមគ្នាដាក់ចេញគោលដៅទៅកាន់ទីផ្សារថ្មីបន្ថែមទៀតក្នុងប្រទេសចិន។ ក្នុងនោះ ខេត្តហឺណាន់ គឺជាខេត្តដែលមានសេដ្ឋកិច្ចរីកចម្រើនខ្លាំង និងប្រជាជនរស់នៅយ៉ាងច្រើនប្រមាណ ជាង១០០លាននាក់ ពិសេសទីក្រុងស៊ិនឆូវ ដែលមានតំបន់សេដ្ឋកិច្ចពិសេសព្រលានយន្តហោះ Zhengzhou Airport Economic Zone ដែលនេះ។
ដោយសារប្រជាជនហឺណាន ចូលចិត្តទៅទស្សនានៅតំបន់អាស៊ីអាគ្នេយ៍ពិសេស មានការចាប់អារម្មណ៍ដល់ប្រសាទអង្គរ ដូច្នេះកម្ពុជាសង្ឃឹមថាជាមួយនឹងជើងហោះហើរត្រង់មកកម្ពុជា ពិសេសមកកាន់ប្រាសាទអង្គរដែលជាបិតិកភណ្ឌវប្បធម៌ប្រវត្តិសាស្ត្រដ៏ល្បីល្បាញ ប្រាកដជាអាចទទួលបានទេសចរហឺណានបានច្រើនថែមទៀត។
ក្រសួងទេសចរណ៍កម្ពុជា ដោយមានការគាំទ្រពីខេត្ត ហឺណាននិងក្រសួងទេសចរណ៍វប្បធម៌ចិនក៏នឹងស្នើសុំរាជរដ្ឋាភិបាលរៀបចំបង្កើតឲ្យមានការិយាល័យតំណាងទេសចរណ៍កម្ពុជានៅទីនោះផងដែរ ដើម្បីពង្រឹងកិច្ចសហប្រតិបត្តិការ និងការផ្សព្វផ្សាយទេសចរណ៍ និងការផ្សព្វផ្សាយនានាក្នុងខេត្តហឺណាននេះ ដើម្បីទាក់ទាញទេសចរ និងអ្នកវិនិយោគមកកាន់កម្ពុជាថែមទៀត៕
ដោយ៖ ជួប ស្រីរ័ត្ន
