ទស្សនដ៏មានខ្លឹមសារចំនួន៧ឃ្លារបស់លោក Kahlil Gibran អ្នកនិពន្ធជនជាតិលីបង់អាមេរិក
Kahlil Gibran គឺជាអ្នកនិពន្ធ កវីកំណាព្យ និងសិល្បករគំនូរជនជាតិលីបង់អាមេរិកមួយរូប ដែលបានរស់នៅក្នុងអំឡុងឆ្នាំ១៨៨៣ដល់ឆ្នាំ១៩៣១។ ស្នាដៃដែលត្រូវបានគេចងចាំបំផុតរបស់គាត់គឺជាកម្រងកំណាព្យមួយក្បាលដែលមានចំណងជើងថា The Prophet ដែលបានចេញផ្សាយនៅសហរដ្ឋអាមេរិកក្នុងឆ្នាំ១៩២៣។ ស្នាដៃនេះស្ថិតនៅក្នុងចំណោមសៀវភៅដែលលក់ដាច់ជាងគេបំផុតមួយដែលធ្លាប់មាន និងត្រូវបានគេយកទៅបកប្រែច្រើនជាង១០០ភាសានៅជុំវិញពិភពលោក។ គាត់បានលាចាកលោកនៅអាយុ៤៨ឆ្នាំដោយជំងឺក្រិនថ្លើម និងជំងឺរបេងមួយចំហៀងថ្លើមដំណាក់ដំបូង។ ថ្ងៃនេះយើងបានដកស្រង់នូវទស្សនដ៏មានខ្លឹមសាររបស់លោក Gibran ចំនួន៧ឃ្លា ដែលអ្នកគួរស្វែងយល់៖
១) «នៅពេលអ្នករីករាយ សម្លឹងចូលទៅជ្រៅក្នុងបេះដូងរបស់អ្នក ហើយអ្នកនឹងឃើញថាគឺជាអ្វីដែលផ្ដល់ឲ្យអ្នកនូវទុក្ខប៉ុណ្ណោះដែលបានផ្ដល់ឲ្យអ្នកនូវភាពរីករាយ។ នៅពេលអ្នកសោកសៅ សម្លឹងមើលម្ដងទៀតនៅក្នុងបេះដូងរបស់អ្នក ហើយអ្នកនឹងឃើញថាការពិតអ្នកយំសម្រាប់អ្វីដែលជាភាពរីករាយរបស់អ្នកសោះ។»
២) «សេចក្ដីស្រឡាញ់ដឹងពីជម្រៅរបស់វានៅពេលបែកគ្នា។»
៣) «ការឈឺចាប់របស់អ្នកគឺជាការបែកបាក់នៃសម្បកដែលបានហ៊ុមព័ទ្ធការយល់ដឹងរបស់អ្នក។»
៤) «គ្រូបង្រៀនដែលពិតជាពោរពេញដោយគតិបណ្ឌិត មិនប្រាប់អ្នកឲ្យចូលទៅកាន់ផ្ទះនៃគតិបណ្ឌិតរបស់គាត់ឡើយ ផ្ទុយទៅវិញគាត់នាំអ្នកចូលទៅកាន់ទ្វារនៃចិត្តរបស់អ្នក។»
៥) «ភ្នែករបស់មនុស្សលោកគឺជាមីក្រូទស្សន៍ ដែលបានធ្វើឲ្យពិភពលោកមើលទៅហាក់ដូចជាធំជាងការពិត។
៦) «បញ្ញាលែងក្លាយជាបញ្ញាតទៅទៀតនៅពេលដែលវាមានអំនួតខ្លាំងពេករហូតមិនយំ ម៉ឺងម៉ាត់ខ្លាំងពេករហូតមិនសើច និងអាត្មានិយមខ្លាំងពេករហូតមិនស្វែងរកអ្វីដែលលើសពីខ្លួនវា។»
៧) «កូនរបស់អ្នកមិនមែនជាកូនរបស់អ្នកឡើយ។ ពួកគេចេញមកតាមរយៈអ្នក តែមិនមែនចេញមកពីអ្នកឡើយ។ ហើយបើទោះជាពួកគេនៅជាមួយអ្នក តែពួកគេមិនមែនជាកម្មសិទ្ធិរបស់អ្នកឡើយ។ អ្នកប្រហែលជាឲ្យពួកគេនូវក្ដីស្រឡាញ់របស់អ្នក តែមិនមែនការគិតរបស់អ្នកឡើយពីព្រោះតែពួកគេមានការគិតរបស់ខ្លួនឯង។ អ្នកប្រហែលជាផ្ដល់ជម្រកដល់រាងកាយរបស់ពួកគេ តែមិនមែនវិញ្ញាណរបស់ពួកគេឡើយពីព្រោះតែវិញ្ញាណរបស់ពួកគេរស់នៅក្នុងផ្ទះនៃថ្ងៃស្អែក ដែលអ្នកមិនអាចទៅលេងបាន ឬសូម្បីតែសុបិនឃើញ។ អ្នកប្រហែលជាអាចប្រឹងប្រែងនឹងក្លាយឲ្យដូចជាពួកគេ ប៉ុន្តែប្រឹងប្រែងកុំធ្វើឲ្យពួកគេដូចអ្នកពីព្រោះតែជីវិតមិនមែនត្រឡប់ថយក្រោយឬនៅឈប់មួយកន្លែងជាមួយនឹងថ្ងៃម្សិលមិញឡើយ។ អ្នកគឺជាធ្នូដែលកូនៗរបស់អ្នកគឺជាព្រួញដែលនៅរស់ ត្រូវបាញ់ទៅមុខ។»
ដោយ៖ ស្រីពៅ
