គណៈកម្មាធិការ​វិនិយោគ​កម្ពុជា​នៃ​ក្រុមប្រឹក្សា​អភិវឌ្ឍន៍​កម្ពុជា (CDC) បាន​សម្រេច​ចេញ​វិញ្ញាបនបត្រ​ចុះ​បញ្ជី​ជា​ស្ថាពរ​ដល់​ក្រុមហ៊ុន​ចំនួន​៣ លើ​គម្រោង​សាងសង់​រោងចក្រ​ចំនួន​៣ នា​ខេត្ត​កណ្ដាល​ សរុប​ក្នុង​ទំហំ​ទុន​វិនិយោគ ២០,២លានដុល្លារអាមេរិក ព្រម​ទាំង​អាច​ផ្ដល់​ការងារ​ដល់​ប្រជាពលរដ្ឋ​រហូត​ដល់ ៣,៣១៧កន្លែង។

ទី១. ក្រុមហ៊ុន “FUJIAN MEILIDA SHOES DEVELOPMENT CO., LTD” គម្រោង​បង្កើត​រោងចក្រ​ផលិត​ស្បែក​ជើង ដែល​មាន​ទីតាំង​វិនិយោគ​ស្ថិត​នៅ​ដីឡូតិ៍​លេខ​២៧៨៧ ភូមិ​ទួល​ក្រសាំង​ សង្កាត់​រកា​ខ្ពស់ ក្រុង​តាខ្មៅ ខេត្ត​កណ្ដាល​ មាន​ទុន​វិនិយោគ​ប្រមាណ ៨,៤លានដុល្លារអាមេរិក និង​អាច​បង្កើត​ការងារ​បាន​ចំនួន ២.៥២៥កន្លែង។ 

ទី២. ក្រុមហ៊ុន “JIN THAI FONG (CAMBODIA) NEW BUILDING MATERIALS CO., LTD” គម្រោង​បង្កើត​រោងចក្រ​ផលិត​ឥដ្ឋ​គ្រប់​ប្រភេទ ដែល​មាន​ទីតាំង​វិនិយោគ​ស្ថិត​នៅ​ផ្លូវជាតិលេខ៦A ភូមិជ្រោយមេត្រីក្រោម ឃុំឫស្សីជ្រោយ ស្រុកមុខកំពូល ខេត្ត​កណ្ដាល មាន​ទុន​វិនិយោគ​ប្រមាណ​ ៦លានដុល្លារអាមេរិក និង​អាច​បង្កើត​ការងារ​បាន​ចំនួន ៤៨៤កន្លែង។ 

ទី៣. ក្រុមហ៊ុន “ET SOLAR TECHNOLOGY (CAMBODIA) CO., LTD” គម្រោង​បង្កើត​រោងចក្រ​ផលិត និង​ផ្គុំ​ដំឡើង​បន្ទះ​សូឡា ដែល​មាន​ទីតាំង​វិនិយោគ​ស្ថិត​នៅ​ផ្លូវ​លេខ៥១ ភូមិ​ដំណាក់​ព្រីង​ ឃុំ​ទំនប់ធំ ស្រុក​ពញាឮ ខេត្ត​កណ្ដាល មាន​ទុន​វិនិយោគ​ប្រមាណ ៥,៧លានដុល្លារអាមេរិក និង​អាច​បង្កើត​ការងារ​បាន​ចំនួន ៣០៨កន្លែង៕

ដោយ៖ ជួប ស្រីរ័ត្ន