ទស្សនចំនួន ១០ ដែលអាចឲ្យអ្នកបានស្វែងយល់ពីគតិបណ្ឌិតរបស់ទស្សនវិទូក្រិក Heraclitus
Heraclitus គឺជាទស្សនវិទូរបស់ក្រិកបុរាណដែលបានរស់នៅក្នុងអំឡុងពេលមុនសម័យកាលនៃការកកើតឡើងទស្សនវិជ្ជារបស់សូក្រាត។ គាត់បានចាប់កំណើតនៅក្នុងឆ្នាំ៥៣៥មុនគ.ស. និងស្លាប់ក្នុងឆ្នាំ៤៧៥មុនគ.ស.។ គាត់ជាអ្នកស្រុក Ephesus ដែលជាទីក្រុងមួយរបស់ក្រិកបុរាណ ដែលសព្វថ្ងៃជាប្រទេសទួកគី។ ថ្ងៃនេះយើងបានដកស្រង់ទស្សនចំនួន១០របស់ Heraclitus ដើម្បីអាចឲ្យអ្នកបានស្វែងយល់ពីគតិបណ្ឌិតរបស់ទស្សនវិទូក្រិករូបនេះ៖
១) «ការសិក្សាច្រើនមិនបង្រៀនការយល់នោះទេ។»
២) «ចំណេះដឹងសម្បូរហូរហៀរមិនបង្រៀនមនុស្សឲ្យមានបញ្ញានោះទេ។»
៣) «វិញ្ញាណត្រូវបានលាបពណ៌ដោយការគិត។»
៤) «គ្មានមនុស្សណាម្នាក់ឈានជើងចូលក្នុងទឹកស្ទឹងពីរដងនោះទេ ព្រោះវាមិនមែនជាស្ទឹងដដែល ឯគាត់ក៏មិនមែនជាមនុស្សដដែលដែរ។»
៥) «គ្មានអ្វីដែលនៅឋិតថេរទេ លើកលែងតែការផ្លាស់ប្ដូរប៉ុណ្ណោះ។»
៦) «ព្រះអាទិត្យតែងរះថ្មីជារៀងរាល់ថ្ងៃ។»
៧) «ផ្លូវឡើងនិងផ្លូវចុះក្រោមគឺតែមួយនិងដូចគ្នា។»
៨) «អ្វីៗមានវត្តមានលេចឡើងមកដោយមានការប៉ះទង្គិចគ្នានៃធាតុផ្ទុយគ្នា។»
៩) «ទទួលបាននូវអ្វីគ្រប់យ៉ាងដែលអ្នកចង់បានមិនមែនជារឿងល្អនោះទេ។ ជំងឺធ្វើឲ្យសុខភាពក្លាយជារឿងល្អ។ ភាពស្រេកឃ្លានធ្វើឲ្យមានការឲ្យតម្លៃទៅលើភាពឆ្អែត។ ភាពហត់នឿយនាំឲ្យមានការរីករាយនឹងបានសម្រាក។»
១០) «ភ្លើងរស់នៅក្នុងសេចក្ដីស្លាប់របស់ផែនដី។ ខ្យល់រស់នៅក្នុងសេចក្ដីស្លាប់របស់ភ្លើង។ ទឹករស់នៅក្នុងសេចក្ដីស្លាប់របស់ខ្យល់។ ផែនដីរស់នៅក្នុងសេចក្ដីស្លាប់របស់ទឹក។»
ដោយ៖ ស្រីពៅ
