គម្រោងរោងចក្រ៣ក្នុងទំហំទុនជាង១១លានដុល្លារត្រូវបាន CDC អនុម័ត
ក្រុមប្រឹក្សាអភិវឌ្ឍន៍កម្ពុជា (CDC) សម្រេចចេញវិញ្ញាបនបត្រចុះបញ្ជីជាស្ថាពរដល់ក្រុមហ៊ុនចំនួន៣ លើគម្រោងរោងចក្រកាត់ដេរសំលៀកបំពាក់, គម្រោងរោងចក្រចាក់សំលៀកបំពាក់ និងរោងចក្រផលិតកេសកាតុង ដែលមានទីតាំងវិនិយោគស្ថិតនៅ នៅខេត្តកំពង់ស្ពឺ ខេត្តកណ្ដាល និងភ្នំពេញ ក្នុងទំហំទុនវិនិយោគសរុប ១១,៨លានដុល្លារអាមេរិក ព្រមទាំងអាចផ្ដល់ឱកាសការងារដល់ប្រជាជនបានចំនួន ៣.៧១៥កន្លែង។
ទី១) ក្រុមហ៊ុន “S W J (CAMBODIA) GARMENT CO., LTD” គម្រោងបង្កើតរោងចក្រកាត់ដេរសំលៀកបំពាក់ ដែលមានទីតាំងវិនិយោគស្ថិតនៅ ភូមិបូរីកម្មករ សង្កាត់ច្បារមន ខណ្ឌច្បារមន ខេត្តកំពង់ស្ពឺ មានទុនវិនិយោគប្រមាណ ៤,៤លានដុល្លារអាមេរិក និងអាចបង្កើតការងារបានចំនួន ១.៦៥៥កន្លែង។
ទី២) ក្រុមហ៊ុន “LEADING STAR (CAMBODIA) GARMENT CO., LTD” គម្រោងបង្កើតរោងចក្រកាត់ដេរ និងចាក់សំលៀកបំពាក់ ដែលមានទីតាំងវិនិយោគស្ថិតនៅ ភូមិព្រៃសលិច សង្កាត់ព្រៃស ខណ្ឌដង្កោ រាជធានីភ្នំពេញ មានទុនវិនិយោគប្រមាណ ៥លានដុល្លារអាមេរិក និងអាចបង្កើតការងារបានចំនួន ១.៨៨១កន្លែង។
ទី៣) ក្រុមហ៊ុន “JAM STAR PACKAGING TECHNOLOGY CO.,LTD.” គម្រោងបង្កើតរោងចក្រផលិតកេសកាតុង ប្រអប់ និងបោះពុម្ពគ្រប់ប្រភេទ ដែលមានទីតាំងវិនិយោគស្ថិតនៅ ភូមិទួលសាលា ឃុំព្រៃពួច ស្រុកអង្គស្នួល ខេត្តកណ្តាល មានទុនវិនិយោគប្រមាណ ២,៤លានដុល្លារអាមេរិក និងអាចបង្កើតការងារបានចំនួន ១៧៩កន្លែង៕
ដោយ៖ ជួប ស្រីរ័ត្ន
