សម្ដីចំនួន១០ដែលបង្កប់នូវគតិបណ្ឌិតអប់រំពីជីវិត
ឡៅជឺ បាននិយាយថា «យើងស្មូនដីឥដ្ឋទៅជាថូ ប៉ុន្តែគឺជាភាពទទេនៅខាងក្នុងដែលទ្ររាល់អ្វីដែលយើងចង់ដាក់។» ដូចព្រះពុទ្ធមានសង្ឃដីកាថា «គ្មានអ្វីមួយដែលកើតឡើងតែឯងនោះទេ។ អ្វីៗសុទ្ធតែមានទំនាក់ទំនងជាមួយអ្វីៗផ្សេងទៀត។» យើងតែងតែឲ្យតម្លៃទៅលើថូដោយផ្អែកលើសោភណភាពរបស់វា ប៉ុន្តែអ្វីដែលធ្វើឲ្យវាមានប្រយោជន៍គឺជាភាពទទេដែលយើងមិនសូវឲ្យតម្លៃនៅខាងក្នុងថូនោះទៅវិញទេ ពោលគឺទាំងសោភណភាពនិងភាពទទេរបស់ថូផ្សំផ្គុំគ្នាទើបវាអាចធ្វើឲ្យថូមួយក្លាយជាថូដែលមានប្រយោជន៍បាន។
ឧទាហរណ៍ថាអ្នកជាម្ចាស់ក្រុមហ៊ុនធំមួយ ហើយអ្នកមើលងាយមនុស្សដែលមានការងារតូចទាបជាងអ្នក ប៉ុន្តែអ្នកត្រូវចាំថាបើគ្មានមនុស្សដែលអ្នកមើលងាយថាតូចទាបជាងអ្នកនោះមកធ្វើការឲ្យអ្នកទេ នោះការងាររបស់អ្នកក៏មិនរីកចម្រើនរលូនជោគជ័យទៅមុខបានដែរ ពោលគឺពួកគេជាចំណែកនៃភាពជោគជ័យរបស់អ្នក មិនថាពួកគេគ្រាន់តែជាអ្នកបោសសំរាម ឬអ្នកជួសជុលសម្ភារអ្វីក៏ដោយ។ អ្នកមិនអាចសុំចង់បានតែរដូវភ្លៀងរហូតហើយគ្មានរដូវក្ដៅនោះទេ។ ជីវិតគឺជាតុល្យភាព។ បើមិនមានតុល្យភាពទេ នោះជីវិតនឹងមានភាពច្របូកច្របល់។ អត្ថបទថ្ងៃនេះបានដកស្រង់នូវសម្ដីចំនួន១០ដែលបង្កប់នូវគតិបណ្ឌិតអប់រំពីជីវិត:
១) «សម្រាប់ចិត្តដែលនៅស្ងប់ ចក្រវាលទាំងមូលចុះចាញ់។» Chuang Tzu
២) «យើងស្មូនដីឥដ្ឋទៅជាថូ ប៉ុន្តែគឺជាភាពទទេនៅខាងក្នុងដែលទ្ររាល់អ្វីដែលយើងចង់ដាក់។» ឡៅជឺ
៣) «គោលដៅនៃជីវិតគឺជាការមានភាពរីករាយ។» សម្ដេចសង្ឃដាឡៃ ឡាម៉ា
៤) «នៅពេលអ្នកដឹងថាអ្នកមានគ្រប់គ្រាន់ហើយ នោះទើបអ្នកមានពិតប្រាកដ។» ឡៅជឺ
៥) «ទោះបីជាសេចក្ដីស្លាប់ក៏ដោយក៏មិនត្រូវបានភ័យខ្លាចដោយមនុស្សដែលបានរស់នៅប្រកបដោយបញ្ញានោះដែរ។» ព្រះពុទ្ធ
៦) «ធម្មជាតិមិនប្រញាប់ប្រញាល់នោះទេ តែអ្វីៗសុទ្ធតែអាចសម្រេចបាន។» ឡៅជឺ
៧) «ចំណុចដែលសំខាន់បំផុតគឺទទួលស្គាល់ខ្លួនឯងហើយឈរជើងពីរឲ្យរឹងមាំ។» Shunryu Suzuki
៨) «ស្រស់ស្អាតមានន័យថាជាការធ្វើជាខ្លួនឯង។ អ្នកមិនចាំបាច់ត្រូវការការទទួលស្គាល់ពីអ្នកដទៃនោះឡើយ។ អ្នកចាំបាច់ត្រូវការទទួលស្គាល់ខ្លួនឯង។» Thich Nhat Hanh
៩) «មនុស្សឈរនៅក្នុងស្រមោលរបស់ខ្លួនឯងរួចហើយឆ្ងល់ថាហេតុអ្វីបានជាងងឹត។» សុភាសិតរបស់Zen
១០) «វាពិតជាមានឫសគល់មកពីនេះថា គ្រប់ជីវិតទាំងអស់សុទ្ធតែមានទំនាក់ទំនងគ្នាទៅវិញទៅមក។ ពួកយើងត្រូវបានជាប់នៅក្នុងបណ្ដាញដែលមិនអាចគេចចេញបានមួយនៃការពឹងផ្អែកគ្នាទៅវិញទៅមក ចងភ្ជាប់នៅក្នុងក្រណាត់មួយនៃព្រហ្មលិខិត។ អ្វីក៏ដោយដែលប៉ះពាល់ដល់មនុស្សម្នាក់ដោយផ្ទាល់ ប៉ះពាល់ដល់អ្វីទាំងអស់ផ្សេងទៀតដោយប្រយោល។» Martin Luther King
ដោយ៖ ស្រីពៅ
