សម្ដីដែលមានអត្ថន័យស៊ីជម្រៅចំនួន ១១ឃ្លា ដែលអ្នកគួរយកទៅរិះគិត
Issac Asimov បាននិយាយថា «ជ្រុងមួយដ៏គួរឲ្យសង្វេគបំផុតនៃជីវិតឥឡូវនេះគឺវិទ្យាសាស្ត្រប្រមូលយកចំណេះដឹងលឿនជាងសង្គមប្រមូលយកបញ្ញា។» បើយើងងាកមកសង្កេតស្ថានភាពជាក់ស្ដែងនៅក្នុងសង្គមឲ្យបានស៊ីជម្រៅ នោះយើងនឹងឃើញថាទស្សនមួយនេះរបស់គាត់ពិតជាត្រឹមត្រូវណាស់។ អ្វីដែលយើងឃើញថាវិវឌ្ឍទៅមុខ រីកចម្រើនទៅមុខ មិនមែនសុទ្ធតែជាការសម្គាល់ថាអ្វីៗកំពុងតែឆ្ពោះទៅរកភាពត្រឹមត្រូវនោះទេ។ ជាក់ស្ដែងនៅពេលចំណេះដឹងអំពីថាមពលត្រូវបានស្វែងយល់បន្ថែម ចំណេះដឹងនេះក៏ត្រូវបានគេយកទៅប្រើប្រាស់ក្នុងផ្លូវមិនល្អដែលកើតជាអាវុធប្រល័យជីវិតទៅវិញ។
ចំណេះដឹងមិនមានកំហុសនោះទេ តែអ្នកដែលមានកំហុសគឺជាមនុស្សនេះឯង។ ហេតុនេះហើយនៅពេលដែលមនុស្សនៅក្នុងសង្គមមិនសូវមានបញ្ញាមើលឃើញបានវែងឆ្ងាយ មើលឃើញផលប្រយោជន៍របស់ខ្លួនជាធំ ប្រើប្រាស់ចំណេះដឹងក្នុងផ្លូវមិនល្អ នោះសង្គមនេះនឹងក្លាយជាគួរឲ្យសង្វេគហើយ។ ថ្ងៃនេះយើងបានដកស្រង់នូវសម្ដីចំនួន១១ឃ្លា ដែលអ្នកគួរយកទៅរិះគិត៖
១) «ជ្រុងមួយដ៏គួរឲ្យសង្វេគបំផុតនៃជីវិតឥឡូវនេះគឺវិទ្យាសាស្ត្រប្រមូលយកចំណេះដឹងលឿនជាងសង្គមប្រមូលយកបញ្ញា។» Issac Asimov
២) «ហិង្សាគឺជាកន្លែងជ្រកកោនចុងក្រោយរបស់បំផុតរបស់មនុស្សដែលអសមត្ថភាព។» Issac Asimov
៣) «អ្នកនឹងមិនបានរៀនអ្វីទាំងអស់ពីជីវិតបើអ្នកគិតថាអ្នកត្រូវរហូតនោះ។» ជនអនាមិក
៤) «អ្នកមិនអាចផ្លាស់ប្ដូររបៀបដែលអ្នកដទៃធ្វើដាក់អ្នកឬអ្វីដែលពួកគេនិយាយអំពីអ្នកនោះទេ។ អ្វីដែលអ្នកអាចធ្វើបានគឺផ្លាស់ប្ដូររបៀបដែលអ្នកឆ្លើយតបចំពោះវាវិញ។» មហាត្មៈគន្ធី
៥) «ក្រពះដែលស្រេកឃ្លាន ហោប៉ៅដែលទទេ និងបេះដូងដែលឈឺចាប់ អាចបង្រៀនអ្នកនូវមេរៀនដ៏ល្អបំផុតនៃជីវិត។» ជនអនាមិក
៦) «ខ្ញុំគ្រាន់តែជាក្មេងម្នាក់ដែលមិនចេះពេញវ័យ។ ខ្ញុំនៅតែសួរសំណួរថា «យ៉ាងដូចម្ដេច» និង«ហេតុអ្វី»។ មានពេលខ្លះ ខ្ញុំក៏បានស្វែងរកចម្លើយឃើញ។» Stephen Hawking
៧) «មេរៀនដ៏មានតម្លៃបំផុតនៅក្នុងជីវិតមិនអាចបង្រៀនបាននោះទេ វាត្រូវតែទទួលការពិសោធន៍ដោយខ្លួនឯង។» Liam Payne
៨) «មនុស្សដែលត្រូវបានឃើញកំពុងរាំត្រូវបានគិតថាជាមនុស្សឆ្កួតដោយមនុស្សដែលមិនអាចឮចម្រៀងបាន។» Friedrich Nietzsche
៩) «ជីវិតប្រៀបបាននឹងខ្ទឹមបារាំង។ អ្នកបកម្ដងមួយស្រទាប់ៗ ហើយមានពេលខ្លះអ្នកក៏ជូតទឹកភ្នែក។» Carl Sandburg
១០) «អ្វីដែលនៅខាងក្រោយយើង និងអ្វីដែលនៅខាងមុខយើង គឺជារឿងតូចតាចបើធៀបនឹងអ្វីដែលនៅក្នុងខ្លួនយើង។» Henry David Thoreau
១១) «គ្រប់គ្នានៅលើពិភពលោកកំពុងតែស្វែងរកសេចក្ដីសុខ ហើយវាមានវិធីយ៉ាងប្រាកដមួយក្នុងការរកវាឃើញ ហើយវាគឺជាការគ្រប់គ្រងការគិតរបស់ខ្លួនឯង។ សេចក្ដីសុខមិនមែនស្ថិតនៅលើស្ថានភាពនៅខាងក្រៅនោះទេ តែវាស្ថិតនៅលើស្ថានភាពនៅខាងក្នុង។» Dale Carnegie
ដោយ៖ ស្រីពៅ
