សុភាសិតរបស់ក្រិកចំនួន ១០ ដែលបានឆ្លុះបញ្ចាំងពីការគិតរបស់ពួកគេ
ប្រទេសក្រិក ដែលមានឈ្មោះជាផ្លូវការហៅថា សាធារណរដ្ឋHellenic ជាទឹកដីមួយដែលស្ថិតនៅភាគអាគ្នេយ៍នៃអឺរ៉ុប។ ប្រជាជនសរុបរបស់ពួកគេមានប្រមាណជាង១០លាននាក់គិតក្នុងឆ្នាំ២០១៨ ដែលមានអាតែនជារាជធានី។ ប្រទេសក្រិកត្រូវបានគេចាត់ទុកជាសសរគ្រឹះនៃអរិយធម៌របស់លោកខាងលិច ដោយសារតែវាគឺជាកន្លែងកំណើតនៃលទ្ធិប្រជាធិបតេយ្យ ទស្សនវិទូរបស់លោកខាងលិច អក្សរសាស្ត្ររបស់លោកខាងលិច ការសិក្សាពីវិធីសាស្ត្ររបស់អ្នកប្រវត្តិវិទូក្នុងការវិវត្តប្រវត្តិសាស្ត្រជាមុខវិជ្ជាសម្រាប់សិក្សា វិទ្យាសាស្ត្រនយោបាយ គោលការណ៍ចម្បងៗនៃវិទ្យាសាស្ត្រនិងគណិតវិទ្យា ល្ខោនរបស់លោកខាងលិច និងជាពិសេសកីឡាអូឡាំពិក។
ប្រទេសក្រិកគឺជាប្រទេសអភិវឌ្ឍមួយ ដែលប្រជាជនរបស់ពួកគេមានចំណូលខ្ពស់ គុណភាពនៃការរស់នៅមានកម្រិតខ្ពស់ និងស្តង់ដាក្នុងការរស់នៅខ្ពស់ផងដែរ។ ម្យ៉ាងទៀតសម្បត្តិបេតិកភណ្ឌចំនួន១៨របស់ពួកគេត្រូវបានចុះបញ្ជីចូលក្នុងសម្បត្តិបេតិកភណ្ឌពិភពលោករបស់អង្គការយូណេស្កួ។ ថ្ងៃនេះយើងបានចងក្រងនូវសុភាសិតរបស់ក្រិកដែលមានចំនួន១០ដូចខាងក្រោមនេះ៖
១) «បេះដូងដែលពោរពេញដោយក្ដីស្រឡាញ់តែងក្មេងវ័យជានិច្ច។»
២) «ជនដែលមិនអាចអត់ធន់ជាមួយនឹងរឿងអកុសលបាន ទើបពិតជាគួរឲ្យអកុសលមែន។»
៣) «ជីវិតដែលមិនបានត្រួតពិនិត្យមិនមានតម្លៃនឹងរស់នៅនោះឡើយ។»
៤) «ពេលវេលាគឺជាដួងព្រលឹងរបស់ពិភពលោក។»
៥) «នៅពេលអ្នកចូលគេងជាមួយនឹងខួរក្បាលជ្រះស្រឡះ អ្នកនឹងមិនក្រោកមកទាំងឈឺក្បាលនោះឡើយ។»
៦) «គ្មានអ្វីដែលអាចធ្វើឲ្យជនដែលមិនរីករាយជាមួយនឹងរបស់តិចតួចរីករាយបាននោះទេ។»
៧) «ភាពងឿងឆ្ងល់គឺជាចំណុចចាប់ផ្ដើមនៃគតិបណ្ឌិត។»
៨) «គតិបណ្ឌិតដែលពិតប្រាកដតែមួយគត់នោះគឺជាការដឹងថាអ្នកមិនដឹងអ្វីទាំងអស់។»
៩) «ភ្នែកនិងត្រចៀកគឺជាសាក្សីអន់មួយសម្រាប់មនុស្សបើសិនជាពួកគេមានវិញ្ញាណដែលមិនត្រូវបានបណ្ដុះបណ្ដាល។»
១០) «ខ្ញុំមិនអាចបង្រៀននរណាម្នាក់អំពីអ្វីបាននោះទេ ខ្ញុំគ្រាន់តែអាចធ្វើឲ្យពួកគេគិតប៉ុណ្ណោះ។»
ដោយ៖ ស្រីពៅ
