សម្ដីដកស្រង់ចំនួន៨ឃ្លា ពីទស្សនវិទូរ៉ូម៉ាំងបុរាណ Seneca the Younger
Seneca the Younger ឬហៅកាត់ថា Seneca គឺជាទស្សនវិទូស្តូអិក ជារដ្ឋបុរស និងជាអ្នកនិពន្ធរឿងល្ខោនមួយរូប ដែលបានរស់នៅក្នុងសម័យចក្រភពរ៉ូម៉ាំងបុរាណ។ គាត់បានធ្វើជាគ្រូរបស់អធិរាជរ៉ូម៉ាំង Nero នៅពេលទ្រង់មិនទាន់ឡើងសោយរាជ្យនៅឡើយ។ នៅពេលអធិរាជស្ដេច Nero បានឡើងគ្រងរាជ្យនៅជន្មាយុ៥៤ឆ្នាំ Seneca ក៏បានធ្វើជាអ្នកប្រឹក្សាយោបល់ឲ្យស្ដេច។ ប៉ុន្តែក្រោយមក Seneca ក៏ត្រូវបានគេចោទថាចូលរួមឃុបឃិតប៉ុនប៉ងធ្វើឃាតកម្មសម្លាប់ស្ដេច ហើយដោយសារតែរឿងនេះគាត់ក៏ត្រូវបានគេបង្ខំឲ្យធ្វើអត្តឃាតខ្លួនឯង។ ទោះជាយ៉ាងណា គាត់បានបន្សល់ទុកនូវគំនិតប្រកបដោយគតិបណ្ឌិតជាច្រើនដែលអ្នកជំនាន់ក្រោយគួរយកទៅសិក្សា ដែលយើងបានដកស្រង់ចំនួន៨ឃ្លាដូចមាននៅខាងក្រោមនេះ៖
១) «ការលំបាកពង្រឹងចិត្តគំនិតប្រៀបបាននឹងកម្លាំងពលកម្មពង្រឹងរាងកាយ។»
២) «សេចក្ដីសុខពិតប្រាកដគឺជាការរីករាយជាមួយនឹងបច្ចុប្បន្នកាល ដោយមិនមានការខ្វាយខ្វល់ទៅលើអនាគត មិនធ្វើឲ្យខ្លួនឯងរំជើបរំជួលជាមួយនឹងក្ដីសង្ឃឹមឬភាពភ័យខ្លាច ប៉ុន្តែគឺជាការរីករាយគ្រប់គ្រាន់ជាមួយនឹងអ្វីដែលខ្លួនឯងមាន សម្រាប់ជនបែបនេះ នឹងមិនចង់បានអ្វីទាំងអស់។»
៣) «ភាពសាហាវឃោរឃៅទាំងអស់កើតចេញមកពីភាពទន់ខ្សោយ។»
៤) «មិនមែនដោយសារតែរឿងពិបាកទើបយើងមិនហ៊ាននោះទេ តែដោយសារតែយើងមិនហ៊ានទើបរឿងពិបាក។»
៥) «មនុស្សមិនទទួលរងឥទ្ធិពលពីព្រឹត្តិការណ៍នោះឡើយ តែពីការយល់ឃើញដែលគាត់មានទៅលើព្រឹត្តិការណ៍ទាំងនោះ។»
៦) «យើងរងទុក្ខនៅក្នុងការស្រមើស្រមៃរបស់ខ្លួនឯងច្រើនជាងនៅក្នុងការពិត។»
៧) «បើអ្នកចង់គេចចេញពីរឿងទាំងឡាយដែលធ្វើទុក្ខបុកម្នេញអ្នក អ្វីដែលអ្នកត្រូវការគឺមិនមែនជាការនៅទីកន្លែងផ្សេងនោះទេ តែគឺជាការធ្វើជាមនុស្សផ្សេងខុសពីមុន។»
៨) «មានពេលខ្លះសូម្បីតែរស់នៅក៏ជាសេចក្ដីក្លាហានមួយដែរ។»
ដោយ៖ ស្រីពៅ
