សម្ដីដកស្រង់ដ៏មានតម្លៃចំនួន៦ឃ្លា របស់បុគ្គលអច្ឆរិយរបស់ពិភពលោក លោកនីកូឡា តេស្លា
បុគ្គលអច្ឆរិយ វិស្វករនិងជាអ្នកវិទ្យាសាស្ត្រមួយរូបរបស់ក្រូអាត ដែលមិនសូវត្រូវបានគេយកមកសិក្សានៅក្នុងសាលា គឺជាលោក នីកូឡា តេស្លា។ គាត់ត្រូវបានគេស្គាល់ថាជាអ្នកបង្កើតប្រព័ន្ធចរន្តឆ្លាស់AC និងបូប៊ីនតេស្លា។ បើទោះជាឪពុកជំរុញគាត់ឲ្យចូលជាបព្វជិត តែចំណង់ចំណូលចិត្តរបស់លោកតេស្លានៅក្នុងការបង្កើតឧបករណ៍អគ្គិសនី ត្រូវបានបំផុសដោយម្ដាយរបស់លោកនៅពេលឃើញគាត់បង្កើតឧបករណ៍តូចតាចសម្រាប់ប្រើប្រាស់ក្នុងផ្ទះ។ គាត់ធ្លាប់ធ្វើការក្នុងរយៈពេលខ្លីជាមួយលោក ថូម៉ាស់ អេឌីសាន់ ដែលត្រូវបានគេស្គាល់ថាជាអ្នកបង្កើតចរន្តជាប់DC។ ប៉ុន្តែដោយសារតែមានការខ្វែងគំនិតគ្នា អ្នកទាំងពីរក៏បានចែកផ្លូវដើររៀងៗខ្លួន។
នៅក្នុងជីវិតរបស់គាត់ គាត់បានបង្កើតស្នាដៃសំខាន់ៗជាច្រើន ប៉ុន្តែភាគច្រើនត្រូវបានគេលួចយកទៅធ្វើជាកម្មសិទ្ធិប៉ាតង់របស់ខ្លួនឯង ដែលក្នុងនោះមានដូចជា ឌីណាម៉ូ និងម៉ូទ័រអាំងឌុចស្យង់ជាដើម។ លើសពីនេះគាត់ក៏ជាអ្នកផ្ដួចផ្ដើមនៅក្នុងរបកគំហើញនៃបច្ចេកវិទ្យារ៉ាដា បច្ចេកវិទ្យាកាំរស្មីX និងតេឡេបញ្ជាជាដើម។ ថ្ងៃនេះយើងបានចងក្រងនូវសម្ដីដកស្រង់ដ៏មានតម្លៃចំនួន៦ឃ្លារបស់លោកតេស្លា:
១) «ខួរក្បាលរបស់ខ្ញុំគ្រាន់តែជាអ្នកទទួល។ នៅក្នុងចក្រវាលមាននូវស្នូលមួយដែលយើងអាចទទួលបានចំណេះដឹង កម្លាំងចិត្ត និងការជំរុញទឹកចិត្ត។»
២) «បើសិនជាការស្អប់របស់អ្នកអាចបម្លែងទៅជាអគ្គិសនី វានឹងអាចបំភ្លឺពេញមួយពិភពលោក។»
៣) «ខ្ញុំមិនខ្វល់ថាពួកគេបានលួចគំនិតរបស់ខ្ញុំនោះទេ ខ្ញុំខ្វល់ថាពួកគេមិនមានគំនិតអ្វីសោះដែលជារបស់ខ្លួនឯង។»
៤) «ប្រវត្តិសាស្ត្រនៃវិទ្យាសាស្ត្របានបង្ហាញថាទ្រឹស្ដីអាចត្រូវខូចខាតបាន។ ជាមួយនឹងការពិតថ្មីៗដែលត្រូវបានលាតត្រដាង យើងមានការយល់ឃើញបានប្រសើរជាងមុនចំពោះធម្មជាតិ ហើយទស្សននិងការយល់ឃើញរបស់យើងត្រូវបានកែសម្រួល។»
៥) «មនុស្សភាគច្រើនជក់ចិត្តយ៉ាងខ្លាំងនៅក្នុងការសញ្ជឹងគិតពីពិភពលោកខាងក្រៅរហូតទាល់តែពួកគេមិនមានសតិដឹងពីអ្វីដែលបានឆ្លងកាត់នៅខាងក្នុងពួកគេ។»
៦) «នៅពេលដែលខ្ញុំបានរំលឹកឡើងវិញនូវព្រឹត្តិការណ៍នៃអតីតជាតិរបស់ខ្ញុំ ខ្ញុំបានដឹងថាតើការជះឥទ្ធិពលមានតិចតួចប៉ុណ្ណាដែលបានឆ្លាក់រូបរាងជោគវាសនារបស់យើង។»
ដោយ៖ ស្រីពៅ
