អ្នកដែលស្ត្រេសខ្លាំងនឹងការងារពេករហូតដល់ភ្លេចគេង សូមមកស្តាប់ដំបូន្មាន Jack Ma
លោក Jack Ma ទើបនឹងបានចូលនិវត្តន៍បោះបង់តួនាទីជាប្រធានក្រុមហ៊ុនពាណិជ្ជកម្មអេឡិចត្រូនិកយក្សលំដាប់ពិភពលោក Alibaba កាលពីថ្មីៗនេះប៉ុណ្ណោះ។ ការដកខ្លួនចេញពីមុខតំណែងកំពូលនេះបានធ្វើឡើងនៅចំថ្ងៃខួបកំណើតគម្រប់អាយុ ៥៥ ឆ្នាំរបស់លោកកាលពីថ្ងៃអង្គារសប្តាហ៍មុន។
ជាមួយនឹងកេរ្តិ៍ឈ្មោះល្បីល្បាញរបស់លោក មហាសេដ្ឋីចិនរូបនេះត្រូវបានគេចាត់ទុកថា ជាអ្នកជំនួញពោរពេញទៅដោយបទពិសោធន៍ ផ្នត់គំនិត និងដំបូន្មានល្អៗយ៉ាងជាច្រើនសម្រាប់ចែករំលែកទៅដល់មនុស្សម្នាជាពិសេសអ្នកជំនួញនៅជុំវិញពិភពលោក។ ថ្វីត្បិតតែលោកជាមនុស្សស្រលាញ់ការងារម្នាក់ លោកក៏បានផ្តល់ដំបូន្មានពីការធ្វើឲ្យជីវិតស្រស់ស្រាយតាមរយៈការទទួលទានដំណេក និងទប់ទល់នឹងបញ្ហាស្រ្តេសឲ្យមានប្រសិទ្ធភាព។
នៅក្នុងវេទិកាសេដ្ឋកិច្ចពិភពលោកប្រចាំឆ្នាំ ២០១៩ ដែលធ្វើឡើងនៅទីក្រុងដាវ៉ូសប្រទេសស្វីសលោកJack Ma បាន ថ្លែងទៅកាន់សាធារណជនថា លោកបានផ្តល់អាទិភាពដល់ការសម្រាក និងទទួលទានដំណេកនៅពេលលោកប្រឈមមុខទៅនឹងអារម្មណ៍ភាពតានតឹងតប់ប្រមល់ ឬស្តេស។
«បើខ្ញុំគេងមិនគ្រប់គ្រាន់ទេ បញ្ហានឹងកើតឡើង។ បើខ្ញុំគេងឲ្យបានគ្រប់គ្រាន់ ខ្ញុំនឹងមានឱកាសប្រយុទ្ធជាថ្មីទៀត។ ជាការពិត នៅពេលអ្នកមិនសប្បាយចិត្តដោយសារតែអ្នកផ្សេងបដិសេធន៍សំណើរបស់អ្នក គេងឲ្យបានគ្រប់គ្រាន់ទៅ ហើយក្រោកឡើង ព្យាយាមជាថ្មីម្តងទៀត។ គេងមិនឆ្អែត ហើយបន្តធ្វើការ មិនបានផលទេ។ ស្ត្រេសក៏កាន់តែខ្លាំង»។ នេះជាការលើកឡើងរបស់លោក Jack Ma នៅក្នុងវេទិកានោះ។
ដំបូន្មានរបស់មហាសេដ្ឋីខាងលើនេះស្របទៅនឹងការស្រាវជ្រាវមួយស្ដីពីការទំនាក់ទំនងរវាងការទទួលទានដំណេក និងនិងផលិតភាព។ ការស្រាវជ្រាវថ្មីៗពីបណ្ឌិតសភាវេជ្ជសាស្ត្រអាមេរិក (AASM) បានរកឃើញថា អ្នកដែលមានអត្រាគេងមិនលក់កើនឡើង ពិបាកទទួលទានដំណេក ឬចូលគេងយឺត អាចជួបប្រទះការបាត់បង់ផលិតភាព ៥៨% នៅថ្ងៃបន្ទាប់។ ស្ថាប័ននេះថែមទាំងបញ្ជាក់ទៀតថា ក្នុងករណីដែលអ្នកលះបង់ដំណេកដើម្បីសម្រេចលទ្ធផលការងារឲ្យបានច្រើននឹងប្រឈមមុខបាត់បង់ផលិតភាពការងារ ១៩% នៅថ្ងៃបន្ទាប់។
ការស្រាវជ្រាវផ្សេងៗទៀតបានបង្ហាញផងដែរថា ការទ ទទួលទានដំណេកមិនបានគ្រប់គ្រាន់ជះឥទ្ធិពលអវិជ្ជមានដល់សមត្ថភាពយល់ដឹងរបស់មនុស្សរួមមានដូចជា ការចងចាំ ការច្នៃប្រឌិត ការសម្រេចចិត្ត និងអារម្មណ៍។ សម្រាប់ហេតុផលទាំងអស់នេះមានន័យថា ការទទួលទានដំណេកឲ្យបានគ្រប់គ្រាន់គឺជាទម្លាប់សុខភាពដ៏សំខាន់ និងចាំបាច់បំផុតដែលជះឥទ្ធិពលដល់ផលិតភាពការងាររបស់អ្នក៕
ប្រភព៖ CNBC
