ទៅសម្ភាសន៍ការងារ គួរយកអ្វីទៅតាមខ្លួនខ្លះ?
នៅពេលទៅសម្ភាសន៍ការងារអ្នកត្រូវប្រាកដថា អ្នកបានរៀបចំខ្លួនយ៉ាងល្អជាមុនព្រោះនេះទំនងជាឱកាសតែមួយគត់របស់អ្នកដើម្បីបញ្ចុះបញ្ចូលនិយោជកថា អ្នកជាបេក្ខជនល្អបំផុតសម្រាប់ការងារនោះ។ រូបរាង អាកប្បកិរិយា និងចម្លើយរបស់អ្នកឆ្លើយតបទៅនឹងសំណួរដែលបានចោទសួរសុទ្ធតែជាកត្តាសំខាន់ក្នុងការកំណត់ថា តើអ្នកនឹងទទួលបានការងារនោះឬយ៉ាងណា?
ខាងក្រោមនេះ គឺជាគន្លឹះខ្លះដែលនិយាយអំពី អ្វីដែលអ្នកត្រូវត្រៀមមុនពេលសម្ភាសន៍ការងារ និងអ្វីដែលអ្នកគួរយកតាមខ្លួននៅពេលសម្ភាសន៍ការងារ។ ទាំងនេះគឺសុទ្ធតែធាតុផ្សំជួយឲ្យអ្នកជោគជ័យនៅពេលសម្ភាសន៍ការងារ។
អ្វីដែលអ្នកត្រូវត្រៀមមុនពេលសម្ភាសន៍ការងារ
១.សម្លៀកបំពាក់ធ្វើការ៖ ត្រូវស្លៀកពាក់ឲ្យសមរម្យ ស្អាតបាត មិនឆើតឆាយពេក ឬ បុរាណពេកដែលធ្វើយ៉ាងឲ្យស័ក្តិសមជាអ្នកធ្វើការ និងមើលទៅថ្លៃថ្នូរ។
២.គោលដៅដែលត្រូវសម្ភាសន៍៖ អ្នកត្រូវឲ្យប្រាកដថា តើកន្លែងសម្ភាសន៍ការងាររបស់អ្នកនៅទីណា? អាចចំណាយពេលធ្វើដំណើរប៉ុន្មាននាទី? បើអ្នកមិនច្បាស់ទេ គួរសាកសួរបុគ្គលិកតាមទូរស័ព្ទ ឬផ្ញើសារអ៊ីមែលដើម្បីបញ្ជាក់ពីទីតាំងបន្ថែម។ យកល្អ អ្នកត្រូវទៅដល់កន្លែងសម្ភាសន៍ការងារយ៉ាងតិចបំផុត ១០ ទៅ ១៥ នាទីមុនដែរ។
៣.ស្រាវជ្រាវប្រវត្តិក្រុមហ៊ុន៖ វាជាចំណុចរឿងល្អប្រសិនបើអ្នកបានស្គាល់ពីអនាគតថៅកែរបស់អ្នក។ ប៉ុន្តែនេះមិនមែនជារឿងចាំបាច់ទេ។ អ្វីដែលសំខាន់អ្នកត្រូវស្គាល់ក្រុមហ៊ុនដែលអ្នកទៅសម្ភាសន៍ឲ្យបានច្បាស់ជាមុនសិន។ ស្រាវជ្រាវតាមអ៊ីនធឺណិតដើម្បីមើលប្រវត្តិក្រុមហ៊ុន និងព័ត៌មានផ្សេងៗទៀត។
៤.ត្រៀមសំនួរ និងចម្លើយ៖ អ្នកមិនអាចដឹងទាំងអស់ថា អ្នកសម្ភាសន៍នឹងសួរអ្វីខ្លះពីអ្នកទេ។ ក៏ប៉ុន្តែជាទូទៅសំនួរទាំងនោះ មិនសូវខុសគ្នាប៉ុន្មានទៅនឹងសំនួរដែលបានចេញផ្សាយនៅតាមគេហទំព័រ កាសែត ឬទស្សនាវដី្តនោះឡើយ។ ប្រការដែលសំខាន់ត្រង់ថា តើអ្នកគួរឆ្លើយសំនួរនីមួយៗទាំងនោះដោយរបៀបណា? មើលសំនួរទាំងនោះ ហើយអានដំបូន្មានរបស់អ្នកជំនាញដើម្បីត្រៀមខ្លួនឆ្លើយឲ្យបានត្រឹមត្រូវ។
អ្វីដែលអ្នកគួរយកតាមខ្លួននៅពេលសម្ភាសន៍ការងារ
១.អត្តសញ្ញាណប័ណ្ណ៖ យកអត្តសញ្ញាណប័ណ្ណទៅដើម្បីបង្ការក្រែងលោបុគ្គលិកសន្តិសុខត្រូវការត្រួតពិនិត្យ ឬក៏អាចអ្នកសម្ភាសន៍ត្រូវការពេលសម្ភាសន៍ការងារចប់។ បើមានប័ណ្ណបើកបរ ឬលិខិតអត្តសញ្ញាណផ្សេងៗទៀតក៏គួរយកទៅតាមខ្លួនដែរ។
២.សៀវភៅកត់ត្រា (Notepad) និងប៊ិក៖ អ្នកគួរយកសៀវភៅកត់ត្រា និងប៊ិកទៅជាមួយដើម្បីសរសេរកត់ត្រាឈ្មោះ ព័ត៌មានក្រុមហ៊ុន ឬសំនួរដែលអាចនឹងត្រូវបានសាកសួរនៅពេលសម្ភាសន៍ការងារ។ ចំណុចនេះបញ្ជាក់ថា អ្នកជាមនុស្សដែលមានរបៀបរៀបរយ និងពូកែរៀបចំ។
៣.CV ថតចម្លង៖ ទោះបីជាអ្នកដាក់ពាក្យធ្វើការតាមរយៈអ៊ីមែល ឬទៅក្រុមហ៊ុនផ្ទាល់ក៏ដោយ វាជារឿងចាំបាច់បំផុតដែលអ្នកត្រូវថតចម្លង CV របស់អ្នកដើម្បីយកទៅឲ្យអ្នកសម្ភាសន៍ត្រួតពិនិត្យ។ តាមពិតអ្នកសម្ភាសន៍បានពិនិត្យមើល និងថតចម្លងCV របស់ អ្នករួចទៅហើយ ក៏ប៉ុន្តែអ្នកត្រូវធ្វើបែបនេះដើម្បីបង្ហាញទៅអ្នកសម្ភាសន៍ថា អ្នកជាមនុស្សពូកែរៀបចំ។
៤.កាបូបស្ពាយ ឬកាតាបយូរ៖ នៅពេលទៅសម្ភាសន៍ការងារ អ្នកត្រូវយកកាបូបស្ពាយ ឬកាតាបយូរដែលអាចទុកឯកសារចាំបាច់សម្រាប់យកទៅសម្ភាសន៍។ កាបូបស្ពាយ ឬកាតាបយូរត្រូវសមរម្យ មិនឆើតពេក ថ្មីបែបទៅធ្វើការ មិនមែនកាបូបស្ពាយឡើងភ្នំ ឬដាក់ឥវ៉ាន់ដើរផ្លូវឆ្ងាយនោះទេ៕
ប្រភព៖ Businessinsider
