សង្ខេបព្រឹត្តិការណ៍សេដ្ឋកិច្ចសំខាន់ៗប្រចាំសប្ដាហ៍ក្នុងប្រទេសកម្ពុជា
ដើម្បីជាជំនួយដល់ការធ្វើអាជីវកម្មរបស់លោកអ្នក សប្ដាហ៍នេះ Bizkhmer នឹងលើកយកនូវព្រឹត្តិការណ៍សេដ្ឋកិច្ចសំខាន់ៗក្នុងប្រទេសដែលកើតឡើងក្នុងពេលថ្មីៗនេះ។ ខាងក្រោមនេះគឺជាការសង្ខេបព្រឹត្តិការណ៍សេដ្ឋកិច្ចពីស្ថាប័នព័ត៌មានក្នុងស្រុកល្បីៗមួយចំនួននៅកម្ពុជា។
១) តាមកាសែតកោះសន្តិភាព កាលពីថ្ងៃទី០៧ ខែកញ្ញា ឆ្នាំ២០១៩ បានចេញផ្សាយអំពី ឆមាសទី១ ឥណទានកើន ១៧ភាគរយខណៈបញ្ញើកើន ២១ភាគរយក្នុងវិស័យមីក្រូហិរញ្ញវត្ថុ៖ ក្នុងវិស័យមីក្រូហិរញ្ញវត្ថុកម្ពុជា នាពេលបច្ចុប្បន្ន ត្រូវបានមើលឃើញថានៅតែមានកំណើន បើទោះបីជាបញ្ហាប្រឈមមួយចំនួនក្ដី ជាក់ស្ដែងក្នុងដំណាច់ឆមាសទី១ឆ្នាំ ២០១៩នេះ បើតាមរបាយការណ៍របស់សមាគមមីក្រូហិរញ្ញវត្ថុកម្ពុជា បានបង្ហាញឥណទានបានកើនឡើងប្រមាណ ១៧ភាគរយ ខណៈប្រាក់បញ្ញើក៏បានកើនឡើងប្រមាណ២១ភាគរយផងដែរ ធៀបនឹងរយៈពេលដូចគ្នាកាលពីឆ្នាំ ២០១៨កន្លងទៅនេះ ។ សូមចុចទីនេះដើម្បីអានព័ត៌មានលម្អិត
២) កាលពីថ្ងៃទី០៦ ខែកក្កដា ឆ្នាំ២០១៩ កាសែតភ្នំពេញប៉ុស្តិ៍បានចេញផ្សាយអំពី វិនិយោគិនសិង្ហបុរីសម្លឹងមើលឱកាសវិនិយោគក្នុងប្រទេសកម្ពុជា៖ គណៈប្រតិភូធុរកិច្ចសិង្ហបុរីកំពុងសម្លឹងឱកាសវិនិយោគនៅប្រទេសកម្ពុជា ក្នុងវិស័យអាជីវកម្មលក់រាយ ម្ហូបអាហារ បច្ចេកវិទ្យា ហិរញ្ញវត្ថុ និងវិស័យអប់រំ។ នេះបើយោងតាមតំណាងក្រុមធុរកិច្ចសិង្ហបុរីបានឲ្យដឹងកាលពីថ្ងៃពុធ។ ក្នុងដំណើរទស្សនកិច្ចរបស់គណៈប្រតិភូធុរកិច្ចសិង្ហបុរីតាមរយៈកម្មវិធី Travel and Learn មានរយៈពេល ៤ ថ្ងៃចាប់ពីថ្ងៃទី ៤ ដល់ ៧ ខែកញ្ញា ដើម្បីសិក្សាស្វែងយល់ពីឱកាសវិនិយោគនៅកម្ពុជា។ សូមចុចទីនេះដើម្បីអានព័ត៌មានលម្អិត
៣) មួយវិញទៀតយោងតាម សារព័ត៌មានខ្លីខ្លី កាលពី ថ្ងៃទី០៥ ខែកញ្ញា ឆ្នាំ២០១៩ បានចេញផ្សាយអំពី កម្ពុជា-អារ៉ាប៊ីសាអូឌីត បន្តធ្វើកិច្ចសហប្រតិបត្តិការទ្វេភាគីលើវិស័យការងារ៖ លោក អ៊ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានជួបសម្ដែងការគួរសម និងពិភាក្សាការងារជាមួយលោក Saud F.Mal Suwelim ឯកអគ្គរាជទូតនៃ ព្រះរាជាណាចក្រអារ៉ាប៊ីសាអូឌីត ប្រចាំកម្ពុជា ដែលមាននិវេសនដ្ឋាន នៅសាធារណរដ្ឋសង្គមនិយមវៀតណាម នៅព្រឹកថ្ងៃទី០៥ ខែកញ្ញា ឆ្នាំ២០១៩នេះ នៅទីស្ដីការក្រសួង។ សូមចុចទីនេះដើម្បីអានព័ត៌មានលម្អិត
៤) ដោយឡែកសម្រាប់កាសែត រស្មីកម្ពុជា កាលពីថ្ងៃទី០៧ ខែកញ្ញា ឆ្នាំ២០១៩ បានចេញផ្សាយអំពី វិនិយោគិនជប៉ុនមួយក្រុមមកស្វែងយល់បន្ថែមពីកាលានុវត្តភាពវិនិយោគនៅកម្ពុជា៖ វិនិយោគិនជប៉ុនមួយក្រុមប្រមាណជាង១០រូបដែលកំពុងរកស៊ីនៅក្នុងតំបន់និងក្នុងប្រទេសកម្ពុជាបានមក ស្វែងយល់បន្ថែមពីកាលានុវត្តភាពវិនិយោគនិងសក្ដានុពលធុរកិច្ចនៅកម្ពុជា។ កាលពីរសៀលថ្ងៃទី៦ ខែកញ្ញា ឆ្នាំ២០១៩ នៅទីស្ដីការក្រុមប្រឹក្សាអភិវឌ្ឍន៍កម្ពុជា (ក.អ.ក) លោក សុខ ចិន្តាសោភា រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គលេខាធិការ ក.អ.ក បានទទួលជួបគណៈប្រតិភូវិនិយោគិនជប៉ុនចំនួន ១៤រូប ដែលកំពុងមានប្រតិបត្តិការនៅក្នុងតំបន់ និងនៅក្នុងប្រទេសកម្ពុជាដើម្បីស្វែងយល់បន្ថែមពីកាលានុវត្តភាពវិនិយោគនៅកម្ពុជា។ សូមចុចទីនេះដើម្បីអានព័ត៌មានលម្អិត
៥) ចុងក្រោយគឺ គេហទំព័រ Bizkhmer កាលពីថ្ងៃទី០៦ ខែកញ្ញា ឆ្នាំ២០១៩ បានចេញផ្សាយអំពី ទើបតែដើមខែ! កំពង់ស្ពឺទទួលបានគម្រោងវិនិយោគ៣បន្ថែមក្នុងទំហំទុនជាង១៥លានដុល្លារ៖ នារយៈពេលប៉ុន្មានឆ្នាំនេះកំណើននៃគម្រោងវិនិយោគនៅកម្ពុជាកំពុងកើនឡើងគួរឲ្យកត់សម្គាល់ ជាមួយគ្នានេះផងដែរ ខេត្តកំពង់ស្ពឺតែងទទួលបានគម្រោងវិនិយោគជាហូរហែមិនចាញ់បណ្ដាខេត្តសក្ដានុពលផ្សេងទៀតឡើយ។ ជាក់ស្ដែងទើបតែដើមខែកញ្ញាពីថ្ងៃទី០១ មកដល់ទី០៦នេះ ខេត្តនេះបានទទួលគម្រោងវិនិយោគចំនួន៣បន្ថែមទៀតដែលមានទំហំទុន ១៥,៦លានដុល្លារអាមេរិក ព្រមទាំងអាចបង្កើតឱកាសការងារបានរហូតដល់ ២,២០១កន្លែង។ សូមចុចទីនេះដើម្បីអានព័ត៌មានលម្អិត
ដោយ៖ ជួប ស្រីរ័ត្ន
