ឈរជើងបានជិត២០ឆ្នាំ! ការពិតក្រុមហ៊ុនខន់ហ្វីរេល(Confirel) ផ្ដោតលើចំណុចសំខាន់ទាំងនេះ
បើនិយាយពីផលិតផលស្ករត្នោត និងម្រេចកំពតដែលមានគុណភាព មនុស្សភាគច្រើននឹងនឹកឃើញដល់ក្រុមហ៊ុនខន់ហ្វីរេល (Confirel)។ លោក ហ៊ីម ពិសិដ្ឋ អគ្គនាយករងនៃក្រុមហ៊ុន ខន់ហ្វីរេល បានលើកឡើងថា គិតមកដល់ពេលនេះក្រុមហ៊ុនខន់ហ្វីរេល ដំណើរការបាន១៩ឆ្នាំហើយ ហើយអាចឈរមកដល់ពេលនេះបានដោយសារក្រុមហ៊ុនតែងគិតដល់ ប្រសិទ្ធភាព និងផលិតភាព។ ការលើកឡើងនេះធ្វើឡើងនៅក្នុងវេទិកាផ្គូផ្គងអាជីវកម្មសម្រាប់សហគ្រាសកែច្នៃចំណីអាហារ និងផលិតផលកសិកម្ម២០១៩ នាមជ្ឈមណ្ឌលពិព័រណ៍កោះពេជ្រកាលពីពេលថ្មីៗ។
លោកអគ្គនាយករង ហ៊ីម ពិសិដ្ឋ បន្តលើកឡើងថា ក្រុមហ៊ុនដែលប្រៀបបាននឹងកូនក្រមុំអាយុដែលទើបពេញវ័យនេះ តែងត្រូវបានវិនិយោគិនមិនតិចឡើយបានចាប់អារម្មណ៍និងធ្វើការចរចា ជាពិសេសគឺវិនិយោគិនធំៗដែលចូលមកពីបរទេស ដែលតែងគិតដល់កូនក្រមុំអាយុ១៩ឆ្នាំនេះមុនគេ។ លោកថា ប្រសិនបើក្រុមហ៊ុនមិនបានគិតដល់ប្រសិទ្ធភាពនិងផលិតភាពនៃផលិតផលទេ ពិតជាឈរមិនបានដល់ថ្ងៃនេះទេ។
បន្ថែមពីលើនេះ លោក ពិសិដ្ឋ ចែករំលែកថា បច្ចុប្បន្នទីផ្សារកំពុងតែប្រកួតប្រជែងខ្លាំង ពិសេសជាមួយផលិតផលបរទេស ដូច្នេះប្រសិនបើយើងរត់មិនទាន់ទេយើងនឹងដួលហើយ។ លោកបានលើកជាឧទាហរណ៍ថា កាលពីប៉ុន្មានឆ្នាំមុនមានក្រុមហ៊ុនទឹកសុទ្ធជាច្រើនដែលបង្កើតឡើងហើយក៏ដួលទៅវិញ នៅសល់តែក្រុមហ៊ុនទឹកសុទ្ធមួយចំនួនដូចជា វីតាល់ និង Lyyon ជាដើម ដែលលោកជឿថាជាក្រុមហ៊ុនដែលមានវិធីសាស្ត្រ រួមជាមួយស្តង់ដារនៃការផលិតខ្ពស់៕
ដោយ៖ ជួប ស្រីរ័ត្ន
