ព្រះសីហនុ៖ អគារពហុមុខងារ Morgan The Pure Bay របស់ក្រុមហ៊ុនចិន អេវើ អឹសេន ឌីវេឡុបម៉ិន ឯ.ក កម្ពស់៣៥ជាន់ ប្រកាសបើកការដ្ឋានសាងសង់ជាផ្លូវការ  នៅលើផ្ទៃនៃអគារជិត ៤៥ម៉ឺនក្រឡា ក្នុងខេត្តព្រះសីហនុ។

ក្នុងពិធីបើកការដ្ឋានសាងសង់អគារពហុមុខងារ Morgan the pure bay នេះឯកឧត្តម ឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់បានឱ្យដឹងដែរថា ការបើករដ្ឋានសាងសង់អគារមួយនេះ ពិតជាបានរួមចំណែកដល់ការអភិវឌ្ឍន៍ខេត្តព្រះសីហនុឱ្យកាន់តែមានសន្ទុះរីចចំរើន ព្រោះការសាងសង់អគារ Morgan The Pure Bay នៅលើឆ្នេរដ៏ស្រស់ស្អាតរបស់កម្ពុជា។

ឯកឧត្តមបន្តថា គម្រោងសាងសង់អគារ Morgan The Pure Bay នឹងជួយជំរុញឱ្យវិស័យអចលនទ្រព្យរបស់កម្ពុជាមានការរីកចំរើនបន្ថែមទៀត តាមរយៈការចាប់ដៃគូជាមួយក្រុមហ៊ុនអភិវឌ្ឍន៍អចលនទ្រព្យរបស់កម្ពុជាក្នុងការអភិវឌ្ឍន៍ ហើយវត្តអាគារពហុមុខងារ Morgan The Pure Bay កំពស់៣៥ជាន់នេះ នឹងអាចចូលរួមផ្តល់ការងារ ដល់ប្រជាពលរដ្ឋកម្ពុជា ជាពិសេសប្រជាពលរដ្ឋនៅក្នុងខេត្តព្រះសីហនុផ្ទាល់តែម្ដង ។

ឯកឧត្តមបន្តថា ខេត្តព្រះសីហនុក្នុងរយៈពេលប៉ុន្មានឆ្នាំចុងក្រោយទទួលបានការវិនិយោគពីបរទេសយ៉ាងច្រើនសន្ធឹកសន្ធាប់ ជាពិសេវិនិយោគិនជនជាតិចិន ជាហេតុធ្វើឱ្យខេត្តព្រះសីហនុមានសន្ទុះអភិវឌ្ឍន៍រីកចំរើនយ៉ាងឆាប់រហ័សស្ទើគ្រប់វិស័យ ។

លោកអភិបាលខេត្តបន្តថា វិនិយោគិន ភាគច្រើនបានបោះទុនវិនិយោគនៅក្នុងខេត្តព្រះសីហនុ ដោយផ្តោតទៅលើវិស័យពាណិជ្ជកម្ម សេវាកម្ម ពាណិជ្ជកម្ម សំណង់ ទេសចរណ៍ និងកាស៊ីណូជាដើម ដោយក្នុងនោះប្រទេសចិន ស្ថិតនៅចំណាត់ថ្នាក់លេខ១ , កូរ៉េលេខ២ និងជប៉ុនលេខ៣។ 

គួរបញ្ជាក់ថា វិស័យសំណង់នៅក្នុងខេត្តព្រះសីហនុ មានសន្ទុះរីកចម្រើនយ៉ាងគំហុក ក្នុងរយៈពេលប៉ុន្មានឆ្នាំកន្លងមកនេះ ដោយគិតចាប់ពីឆ្នាំ២០០៧ រហូតដល់ខែកក្កដា ឆ្នាំ ២០១៩ មាន សំណង់ដែលទទួលបានលិខិតអនុញ្ញាតច្បាប់សាងសងមានចំនួន ៨១៩ គម្រោង ក្នុងនោះអគាររាប់ពីកំពស់ ៥ ជាន់ឡើងដល់ ៤០ ជាន់មាន ២១៨ គម្រោង៕

ដោយ៖ ស្រីពេជ្រ