ក្នុងឆមាសទី១ឆ្នាំ២០១៩នេះ CDC បានអនុម័ត ១៥៣គម្រោងក្នុងទំហំទុនជាង៥ពាន់លានដុល្លារ
គិតត្រឹមរយៈពេល ៦ខែនាដើមឆ្នាំ២០១៩នេះ ក្រុមប្រឹក្សាអភិវឌ្ឍន៍កម្ពុជា (CDC) បានអនុម័តលើគម្រោងវិនិយោគចំនួន ១៥៣គម្រោង ក្នុងនោះស្ថិតនៅក្នុងតំបន់សេដ្ឋកិច្ចពិសេសមាន៤៣គម្រោង និងខាងក្រៅចំនួន ១១០គម្រោង សរុបទុនវិនិយោគប្រមាណជាង ៥ ១៨០ លានដុល្លារអាមេរិក ព្រមទាំងអាចបង្កើតការងារសម្រាប់ពលរដ្ឋបានជាង ១៧០ពាន់កន្លែង។ នេះបើតាមការលើកឡើងរបស់ឯកឧត្ដម ឯក ថា អ្នកនាំពាក្យទីស្ដីការគណៈរដ្ឋមន្ត្រីកម្ពុជា ក្នុងសន្នីសីទសារព័ត៌មានស្ដីពីសមិទ្ធផល១ឆ្នាំក្រោយការបោះឆ្នោត។
ឯកឧត្ដម ឯក ថា លើកឡើងថា រយៈពេល៦ខែដូចគ្នាកាលពីដើមឆ្នាំ២០១៨ CDC ទទួលបានតែ១០៦គម្រោងទេ ដោយក្នុងនោះស្ថិតក្នុងតំបន់សេដ្ឋកិច្ចពិសេសមាន ៣១គម្រោង និងក្រៅតំបន់សេដ្ឋកិច្ចពិសេសមាន ៧៤គម្រោង សរុបទុនប្រមាណជាង ៣៥០០លានដុល្លារអាមេរិក។ បើប្រៀបធៀបនិងរយៈពេល៦ខែដើមឆ្នាំ២០១៩នេះគឺមានការកើនឡើងរហូតដល់៥ពាន់លានដុល្លារអាមេរិក។
ឯកឧត្ដមថា ការដែលវិនិយោគិនជាតិនឹងអន្តរជាតិមកវិនិយោគនៅកម្ពុជាដោយសារតែ គេសម្លឹងឃើញពីសក្ដានុពលរបស់កម្ពុជា ជាពិសេសលើវិស័យទេសចរណ៍។ ហើយបើយើងនិយាយពីវិស័យទេសចរណ៍វិញអាចនិយាយបានថា កម្ពុជាយើងជាប្រទេសដែលមានសក្ដានុពលខ្លាំងណាស់ ក្រៅពីនេះក៏នៅមានវិស័យ កសិឧស្សាហកម្ម ស្ថិរភាពសេដ្ឋកិច្ច រួមទាំងច្បាប់ក្នុងការវិនិយោគដ៏ល្អផងដែរ។
គួរបញ្ជាក់ដែរថា កាលពីឆ្នាំ២០១៨ CDC ទទួលបានគម្រោងវិនិយោគសរុបចំនួន ២៥៥គម្រោង ដោយក្នុងនោះមាន១៧៦ ស្ថិតក្រៅតំបន់សេដ្ឋកិច្ចពិសេស និង៧៩កន្លែងស្ថិតក្នុងតំបន់សេដ្ឋកិច្ចពិសេស សរុបទំហំទុនវិនិយោគមានប្រមាណជាង ៦៤៥០លានដុល្លារ ក្នុងនោះវិនិយោគិនចិនជាប់ចំណាត់ថ្នាក់លេខ១ មាន៥១%, កម្ពុជាលេខ២មាន ៣៦%, និង ជប៉ុនលេខ៣ មាន១៣៕
ដោយ៖ ជួប ស្រីរ័ត្ន
