ក្រសួងអនុញ្ញាតលើគម្រោងរុករករ៉ែលោហៈក្នុងខេត្តក្រចេះ
បន្ទាប់ពីកិច្ចប្រជុំអន្តរក្រសួងលើការពិនិត្យ និងវាយតម្លៃពីផលប៉ះពាល់បរិស្ថាននិងសង្គម (IESIA) ដែលដឹកនាំដោយ ឯកឧត្តម ផៃ ប៊ុនឈឿន រដ្ឋលេខាធិការប្រចាំការនៃក្រសួងបរិស្ថាន កាលពីពេលថ្មីៗនេះ ក្រសួងបានសម្រេចអនុញ្ញាតដល់ក្រុមហ៊ុន RENAISSACE MINERALS (CAMBODIA) LIMITED លើគម្រោងរុករករ៉ែលោហៈ នៅស្រុកចំនួន២ក្នុងខេត្តក្រចេះ លើទំហំផ្ទៃដីចំនួន១៩៨ គីឡូម៉ែត្រការ៉េ (ស្មើនឹង ១៩.៨០០ ហិកតា) ។
តាមប្រភពពីក្រសួងបរិស្ថានបានឲ្យដឹងថា គម្រោងនេះស្ថិតនៅក្នុងភូមិសាស្ត្រ ឃុំស្នួល ឃុំស្រែចារ ឃុំឃ្សឹម ស្រុកស្នួល និង ឃុំកំពង់ដំរី ស្រុកឆ្លូង ខេត្តក្រចេះ របស់ក្រុមហ៊ុន RENAISSACE MINERALS (CAMBODIA) LIMITED (ម្ចាស់គម្រោង) និងរៀបចំរបាយការណ៍ IESIA ដោយក្រុមហ៊ុនទីប្រឹក្សា E&A CONSULTANT CO.,LTD។
បន្ទាប់ពីការជជែក និងផ្តល់យោបល់ ឯកឧត្តមប្រធានអង្គប្រជុំបានលើកឡើងនូវលទ្ធផលដូចខាងក្រោម៖
១. អង្គប្រជុំគាំទ្រលើគម្រោងសិក្សាស្វែងរុករករ៉ែលោហៈតំបន់ស្នួលនេះ
២. ម្ចាស់គម្រោង និងក្រុមហ៊ុនទីប្រឹក្សាត្រូវយកមតិយោបល់របស់អង្គប្រជុំដែលបាន លើកឡើងទៅ ធ្វើការកែសម្រួលឱ្យបានត្រឹមត្រូវ ដោយធ្វើបច្ចុប្បន្នភាពទិន្នន័យឡើងវិញឱ្យបាន ច្បាស់លាស់ រួចដាក់ជូនក្រសួងបរិស្ថាន
៣. បញ្ហាដីធ្លី៖ ម្ចាស់គម្រោងត្រូវសហការជាមួយអាជ្ញាធរមូលដ្ឋានក្នុងការដោះស្រាយផ្ទៃដីដែល ពាក់ព័ន្ធទាំងដីសម្បទានសេដ្ឋកិច្ច និងដីរបស់ប្រជាជនឱ្យបានរួចរាល់មុននឹងចាប់ផ្តើមចុះសិក្សាស្វែងរុករករ៉ែលោហៈ ជៀសវាងមានបាតុភាពណាមួយកើតឡើង
៤. បញ្ហាគុណភាពទឹក ក្រុមហ៊ុនទីប្រឹក្សាត្រូវសហការជាមួយជំនាញក្នុងការវិភាគប៉ារ៉ាម៉ែត្រ អាសេនិចឡើងវិញ
៥. ម្ចាស់គម្រោងត្រូវយកចិត្តទុកដាក់លុបរន្ធខួងនានាឱ្យបានត្រឹមត្រូវ ក្រោយពេលបញ្ចប់ការខួងរន្ធ៕
រូបភាព៖ La Reine Media
ដោយ៖ ជួប ស្រីរ័ត្ន
