ក្រសួងកំពុងស្វែងរកក្រុមហ៊ុនដែលនាំចូលសំរាមខុសច្បាប់ទាំង៨៣ទូរកុងតឺន័រ ដើម្បីផាកពិន័យ
ឯកឧត្តម នេត្រ ភក្រ្តា អ្នកនាំពាក្យក្រសួងបរិស្ថានបានបញ្ជាក់ថា ក្រសួងបរិស្ថាននិងអគ្គនាយកដ្ឋានគយ និងរដ្ឋាករនៃក្រសួងសេដ្ឋកិច្ចនិងហិរញ្ញវត្ថុ ព្រមទាំងស្ថាប័នពាក់ព័ន្ធ កំពុងធ្វើការស៊ើបអង្កេតយ៉ាងស៊ីជម្រៅដើម្បីស្វែងរកក្រុមហ៊ុនដែលនាំចូលសំរាមខុសច្បាប់ចំនួន៨៣ទូរកុងតឺន័រ ដោយត្រូវធ្វើការផាកពិន័យតាមច្បាប់ និងបញ្ជូនសំរាមទាំងនោះទៅប្រភពដើមវិញ។ នេះបើតាមវិទ្យុជាតិកម្ពុជា។
តាមប្រភពខាងលើបានឲ្យដឹងថា មន្ត្រីជំនាញកំពុងធ្វើការស៊ើបអង្កេតដើម្បីបញ្ជាក់កាន់តែច្បាស់ ថាតើប្រភពសំរាមថង់ប្លាស្ទិចទាំងនោះនាំចេញពីប្រទេសណា ហើយតើអ្នកណាដែលនៅពីក្រោយការនាំចូលនេះដើម្បីចាត់ការទៅតាមនីតិវិធី ដោយទី១ត្រូវបញ្ជូនសំណល់ប្លាស្ទិចទាំងនេះទៅប្រទេសដើមវិញ និងទី២ធ្វើការផាកពិន័យលើក្រុមហ៊ុនណាដែលនាំចូល។
ឯកឧត្ដមបានឲ្យដឹងថា កន្លងមក សម្ដេច ហ៊ុន សែន បានគូរបញ្ជាក់ថាកម្ពុជាមិនអនុញ្ញាតឲ្យនាំសំណល់ប្លាស្ទិកមកកែច្នៃនៅកម្ពុជាជាដាច់ខាត ព្រោះកម្ពុជាមិនមែនជាធុងសំរាមសម្រាប់ការបោះចោលបច្ចេកវិទ្យាហួសសម័យនោះទេ ហើយរដ្ឋាភិបាលជំទាស់ជានិច្ចនិងការនាំចូលសំណល់ប្លាស្ទិក និងប្រេងម៉ាស៊ីនមកកែច្នៃនៅកម្ពុជា។
គួរបញ្ជាក់ផងដែរថា សំណល់ប្លាស្ទិចកចំនួន៨៣ទូរកុងតឺន័រ ត្រូវបានក្រសួងបរិស្ថាន និងអគ្គនាយកដ្ឋានគយ និងរដ្ឋាករនៃក្រសួងសេដ្ឋកិច្ច និងហិរញ្ញវត្ថុ ព្រមទាំងស្ថាប័នពាក់ព័ន្ធមួយចំនួនបានរកឃើញ នាកំពង់ផែព្រះសីហនុ កាលពីថ្ងៃទី១៦ ខែកក្កដា ឆ្នាំ២០១៩កន្លងទៅ៕
ដោយ៖ ជួប ស្រីរ័ត្ន
