CDC អនុម័តគម្រោងរោងចក្រ៣បន្ថែមនិងអាចផ្ដល់ការងារជិត៣ពាន់កន្លែងដល់ពលរដ្ឋ
បន្ទាប់ពីសំណើស្នើសុំបង្កើតរោងចក្រគណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជាបានសម្រេចចេញវិញ្ញាបនបត្រចុះបញ្ជីជាស្ថាពរជូនដល់ក្រុមហ៊ុនចំនួន៣ លើការបង្កើតរោងចក្រផលិតកេសកាតុង, កាបូបនិងស្រោមដៃ, និងរោងចក្រកាត់ដេរសំលៀកបំពាក់ នៅក្នុងទំហំទឹកប្រាក់ ១១,៣ លានដុល្លារអាមេរិក ព្រមទាំងអាចបង្កើតការងារដល់ពលរដ្ឋរហូតដល់ ២,៧៤៨កន្លែង។
ទីមួយក្រុមហ៊ុន JIA YU AN PACKAGING MATERIAL (CAMBODIA) CO., LTD. គម្រោងបង្កើតរោងចក្រផលិតកេសកាតុង ដែលមានទីតាំងវិនិយោគស្ថិតនៅ ភូមិចាក់កាំបិត ឃុំវល្លិសរ ស្រុងសំរោងទង ខេត្តកំពង់ស្ពឺ មានទុនវិនិយោគប្រមាណ៤,៨លានដុល្លារអាមេរិក និងអាចបង្កើតការងារបានចំនួន ១៤៩កន្លែង។
ទី២ ក្រុមហ៊ុន NIU GENG DI (CAMBODIA) CO., LTD. គម្រោងបង្កើតរោងចក្រផលិតកាបូប និងស្រោមដៃ ដែលមានទីតាំងវិនិយោគស្ថិតនៅ ភូមិត្រពាំងទា សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ មានទុនវិនិយោគប្រមាណ ៣,៧លានដុល្លារអាមេរិក និងអាចបង្កើតការងារបានចំនួន ១.៣៧៨កន្លែង។
ទី៣ ក្រុមហ៊ុន “CHUNLEI GARMENT (CAMBODIA) CO., LTD.” គម្រោងបង្កើតរោងចក្រកាត់ដេរសំលៀកបំពាក់ ដែលមានទីតាំងវិនិយោគស្ថិតនៅ ភូមិទួលគោក សង្កាត់ទួលសង្កែ ខណ្ឌឬស្សីកែវ រាជធានីភ្នំពេញ មានទុនវិនិយោគ ២,៨លានដុល្លារអាមេរិក និងអាចបង្កើតការងារបាន ១.២២១កន្លែង៕
ដោយ៖ ជួប ស្រីរ័ត្ន
