មនុស្សជុំវិញអ្នក អាចមានឥទ្ធិពលធ្វើឲ្យអ្នកមិនអាចក្លាយជាអ្នកមានបាន
តើអ្នកធ្លាប់ឮពាក្យចាស់និយាយថា ឆ្នាំងណាគ្របហ្នឹងដែរទេ? ហេតុអ្វីអ្នកមានចូលចិត្តរាប់អានអ្នកមានដូចគ្នា? មនុស្សល្អរត់ទៅរកមនុស្សល្អ។ មនុស្សអាក្រក់រាប់អានក្រុមមនុស្សអន្ធពាល។ នេះជារឿងធម្មតាពីព្រោះជាទូទៅមនុស្សចូលចិត្តរាប់អានមនុស្សដែលមានអត្តចរិត ឬស្ថានភាពប្រហាក់ប្រហែលខ្លួន។
យោងទៅតាមការអះអាងរបស់លោក Nicolas Christakas ដែលជាអ្នកស្រាវជ្រាវមកពីសាកលវិទ្យាល័យ Yale បានឲ្យដឹងថា នៅក្នុងទំនាក់ទំនងសង្គមទម្លាប់របស់មនុស្សរីករាលដាលដូចជាវីរុស។ នេះអាចជារឿងល្អបើអ្វីៗដែលអ្នកកំពុងមាននៅក្នុងខ្លួនជាទូទៅមានទម្លាប់បែបស្ថាបនា និងធ្វើឲ្យជីវិតរបស់អ្នកកាន់តែប្រសើរឡើង។
ឧទាហរណ៍ថា ប្រសិនបើនៅក្នុងរង្វង់ទំនាក់ទំនងរបស់អ្នកហ៊ុមព័ទ្ធទៅដោយក្រុមមនុស្សដែលពូកែសន្សំប្រាក់ នោះវាទំនងធ្វើឲ្យអ្នកទទួលរងឥទ្ធិពលពីពួកគេនូវទម្លាប់ដ៏ឆ្លាតវៃផ្នែកហិរញ្ញវត្ថុនេះ។ ប៉ុន្តែវាអាចក្លាយជារឿងក្រឡាប់ចាក់ប្រសិនបើនៅក្នុងរង្វង់ទំនាក់ទំនងរបស់អ្នកពោរពេញទៅដោយក្រុមមនុស្សដែលបំផ្លិចបំផ្លាញ ឬក្រុមមនុស្សពុល)។
បើយោងតាមសៀវភៅ "Rich Habits" បានសរសេរថា អ្នកដែលជួបប្រទះបញ្ហាហិរញ្ញវត្ថុក្នុងជីវិតជាអចេតនាបានហ៊ុមព័ទ្ធខ្លួនឯងទំនាក់ទំនងជាមួយក្រុមមនុស្សពុល (Toxic People)។ ក្រុមមនុស្សពុល ជាក្រុមមនុស្សអវិជ្ជមានដែលមានទម្លាប់គ្រប់គ្រងចាយវាយប្រាក់កាស សុខភាព អារម្មណ៍ ក្រមសីលធម៌ ការងារ និងអ្វីៗផ្សេងទៀតមិនបានល្អដែលជាហេតុធ្វើឲ្យប៉ះពាល់ដល់ភាពជោគជ័យក្នុងជីវិត។
ផ្ទុយមកវិញ បើផ្អែកលើសៀវភៅនេះដដែល ក្រុមអ្នកមានដូចជាសេដ្ឋីៗជាច្រើនដែលកសាងទ្រព្យសម្បត្តិពីបាតដៃទទេរហូតដល់មានប្រាក់រាប់រយលានដុល្លារបានជ្រើសរើសទំនាក់ទំនងរបស់ពួកគេជាមួយក្រុមមនុស្សអ្នកមាន ឬបុគ្គលជោគជ័យ។ ក្រុមសេដ្ឋីទាំងនេះ គឺជាបុគ្គលដែលមានភាពឆ្លាតវៃផ្នែកហិរញ្ញវត្ថុ មានទម្លាប់គ្រប់គ្រងចាយវាយប្រាក់កាស សុខភាព អារម្មណ៍ ក្រមសីលធម៌ ការងារ និងអ្វីៗផ្សេងទៀតបានល្អប្រសើរព្រមទាំងរក្សាទំនាក់ទំនងបានយូរអង្វែងជាមួយមនុស្សជោគជ័យដូចគ្នាដែលនាំទៅរកសម្រេចបានភាពជោគជ័យក្នុងជីវិត។
ហេតុដូច្នេះហើយ ការបង្កើនគុណភាពជីវិតរបស់អ្នកគឺជារឿងសំខាន់ណាស់។ អ្នកត្រូវជ្រើសរើសក្រុមមនុស្សដែលមានទម្លាប់ល្អៗ ឬក្រុមមនុស្សដែលជោគជ័យផ្នែកហិរញ្ញវត្ថុ ហើយកាត់បន្ថយការប្រជ្រៀតខ្លួននៅលាយឡំជាមួយក្រុមមនុស្សពុលឲ្យមកក្នុងចំនួនមួយទាបបំផុត។
យ៉ាងណាក៏ដោយ ការបង្កើតទំនាក់ទំនងល្អជាមួយក្រុមអ្នកមាន (Rich Relationship) និងក្រុមមនុស្សពុល (Toxic Relationship) គឺជាការអនុវត្តមួយដែលមានលក្ខណៈជាវិទ្យាសាស្ត្រ ឬដំណើរការតាមក្បួនខ្នាតរបស់វា។ ចំណុចស្នូលនៃការដំណើរការនេះ គឺអ្នកត្រូវយល់ដឹងពីភាពខុសគ្នារវាងទំនាក់ទំនងរបស់ក្រុមមនុស្សពីរប្រភេទនេះសិន។
លក្ខណសម្បត្តិនៃការទំនាក់ទំនងជាមួយក្រុមអ្នកមាន (Rich relationship traits)
លក្ខណៈទូទៅនៃបុគ្គលទាំងនេះ គឺជាមនុស្សមានទស្សនវិស័យច្បាស់លាស់ មានសុទិដ្ឋិនិយម និងមានគំនិតវិជ្ជមានជានិច្ច។ មនុស្សប្រភេទនេះ មានបេះដូងជាអ្នកធ្វើអ្វីៗឲ្យបានសម្រេច។ ពួកគេជឿថា បុគ្គលម្នាក់ៗអាចសម្រេចបាននូវអ្វីដែលពួកគេចង់ធ្វើ។
ក្រុមអ្នកមាន ជាក្រុមមនុស្សដែលចូលចិត្តលើកស្ទួយអ្នកដទៃឲ្យងើបផុតពីភក់ជ្រាំ។ ច្រកទ្វារចូលរបស់ពួកគេបើកស្វាគមន៍អ្នកជានិច្ចដើម្បីជួយដោះស្រាយបញ្ហាទាំងឡាយរបស់អ្នក ជួយឲ្យអ្នកសម្រេចគោលដៅ និងធ្វើឲ្យអ្នកអាចភ្លក់រសជាតិក្តីសុបិន្ដរបស់អ្នកបាន។ នៅពេលដែលអ្នកបានបង្ខិតខ្លួនទៅជិតបុគ្គលទាំងនេះ ពួកគេនឹងធ្វើឲ្យគុណភាពជីវិតរបស់អ្នកកាន់តែប្រសើរឡើង។ គោលការណ៍របស់មនុស្សប្រភេទនេះ គឺពាំនាំ សុភមង្គល ក្តីស្រលាញ់ និងការលើកទឹកចិត្តដល់មនុស្សគ្រប់រូបដែលប្រាថ្នាចង់សម្រេចបានគោលដៅ និងក្តីសុបិន្ដដូចពួកគេ។
ខាងក្រោមនេះជាលក្ខណសម្បត្តិត្រួសៗរបស់ក្រុមអ្នកមាន៖
-ផ្នត់គំនិតដ៏រឹងប៉ឹង៖ ពួកគេយល់ថា ជោគជ័យមិនសុទ្ធតែកើតមានគ្រប់ពេលនោះទេ។ ដើម្បីជោគជ័យ ក៏ត្រូវមានអ្នកបរាជ័យដែរ ប៉ុន្តែមនុស្សគ្រប់គ្នាសុទ្ធតែអាចឈ្នះ។
-ផ្តោតលើដំណោះស្រាយ៖ ពួកគេផ្ដោតទៅលើដំណោះស្រាយជាធំចំពោះបញ្ហាដែលកើតមានឡើង។
-រិះគន់បែបស្ថាបនា៖ ពួកគេផ្តល់ការរិះគន់មួយដែលមានលក្ខណៈជួយកែលំអអ្នកដទៃ មិនមែនទាញទម្លាប់ ឬបំបាក់ទឹកចិត្តរបស់អ្នកដទៃឡើយ។
-មានសុទិដ្ឋិនិយម៖ ពួកគេជឿថា ខ្លួនអាចផ្លាស់ប្ដូរឧបសគ្គជាច្រើននៅក្នុងជីវិតបាន។
-មានទំនុកចិត្ត៖ ពួកគេធ្វើសកម្មភាពដែលឆ្ពោះទៅរកគោលដៅ និងក្តីសុបិន្ដរបស់ខ្លួនប្រកបដោយភាពជឿជាក់ និងមានទំនុកចិត្តខ្ពស់។
-ដាក់ខ្លួន៖ ពួកគេជាមនុស្សសុភាពរាបសារកាត់បន្ថយអំនួតឲ្យមកទាបបំផុត ឬមិនលើកតម្កើងខ្លួនឯងជាធំ។
-មានផ្លូវចិត្តរឹងមាំ៖ ពួកគេជាមនុស្សដែលអាចគ្រប់គ្រងអារម្មណ៍បានល្អជាពិសេសនៅពេលដែលមានកំហុសកើតមានឡើងនៅក្នុងជីវិតរបស់ពួកគេ។ ពួកគេជាមនុស្សមានទំនុកចិត្តក្នុងការដោះស្រាយបញ្ហាទាំងនោះដោយប្រសិទ្ធភាព។
-ធ្វើអ្វីធ្វើឲ្យបានសម្រេច៖ ពួកគេម្នាក់ៗជឿជាក់ថា ខ្លួនគឺជាស្ថាបត្យករជីវិត។ ផ្នត់គំនិតរបស់ពួកគេគឺថា បើចង់ធ្វើអ្វី គឺត្រូវធ្វើឲ្យបានសម្រេច។
-ជាមនុស្សរីករាយ៖ ពួកគេមើលឃើញជីវិតពោរពេញទៅដោយរឿងល្អៗ មិនមែនសុទ្ធតែអវិជ្ជមានដូចអ្នកផ្សេងគិតនោះឡើយ។
-ចេះអរគុណ៖ ពួកគេផ្ដោត និងឲ្យតម្លៃនូវអ្វីដែលខ្លួនមាន មិនមែនអ្វីដែលអ្នកដទៃមាននោះទេ។
-អ្នកមុន ខ្ញុំក្រោយ៖ ពួកគេផ្តោតលើការបន្ថែមគុណតម្លៃទៅឲ្យជីវិតរបស់អ្នកដទៃ។
-មានភាពអត់ធ្មត់៖ ពួកគេយល់ថា ចង់ជោគជ័យ និងមានទ្រព្យសម្បត្តិស្តុកស្តម្ភ គឺត្រូវការពេលវេលាយូរ។
-តស៊ូគ្មានទីបញ្ចប់៖ គ្មានឡើយការបោះបង់របស់បុគ្គលប្រភេទនេះបើពួកគេចង់សម្រេចក្តីសុបិន្ត ឬគោលដៅរបស់ខ្លួនហើយនោះ។
-ផ្ដោតលើពេលអនាគត៖ ពួកគេបន្តធ្វើដើម្បីសម្រេចគោលដៅ និងក្តីសុបិន្តរបស់ខ្លួន។
-ស្វែងរកការកែលំអពីអ្នកដទៃ៖ ពួកគេចាត់ទុកការរិះគន់របស់អ្នកដទៃ គឺជាមធ្យោបាយដ៏ល្អមួយដើម្បីធ្វើឲ្យពួកគេក្លាយជាមនុស្សម្នាក់កាន់តែល្អឡើង។
-ទៀងត្រង់៖ ពួកគេមិនធ្វើពុធជាអ្នកណាម្នាក់ដែលពួកគេមិនចង់ធ្វើ។ នេះដោយសារតែពួកគេចូលចិត្តខ្លួនឯងជាអ្នកណា។
-ផ្តោតលើរយៈពេលវែង៖ ពួកគេវិនិយោគលើខ្លួនឯង លះបង់ថ្ងៃនេះដើម្បីអនាគតភ្លឺស្វាងនៅពេលខាងមុខ។
លក្ខណសម្បត្តិនៃការទំនាក់ទំនងជាមួយក្រុមមនុស្សពុល (Toxic relationship traits)
ចំណុចសំខាន់ៗនៃក្រុមមនុស្សប្រភេទនេះ គឺមនុស្សមានទុទ្ទិដ្ឋិនិយម និងទស្សនៈអវិជ្ជមាន។ ពួកគេយល់ថាខ្លួនឯងគឺជាជនរងគ្រោះចំពោះលទ្ធផលទាំងអស់ដែលខ្លួនកំពុងជួប ហើយយល់ថា បើទោះបីជាខ្លួនកំពុងមានកំហុសក្តី អ្នកដទៃគួរតែទទួលខុសត្រូវចំពោះកំហុសទាំងនោះ។ ពួកគេបន្ទោសសង្គម បរិយាកាស ឬអ្នកផ្សេងទៀតថា ជាអ្នកធ្វើឲ្យខ្លួនបរាជ័យ ជួបភាពក្រីក្រ ឬមានបញ្ហាហិរញ្ញវត្ថុ។
ក្រុមមនុស្សពុល នឹងអូសទាញអ្នកឲ្យធ្លាក់ចូលក្នុងជ្រោះដូចពួកគេដែរ។ ជីវិតរបស់ពួកគេ ពោរពេញទៅដោយការសម្ដែង (Drama) ជម្លោះ និងការតស៊ូជាមួយនឹងបញ្ហាហិរញ្ញវត្ថុ។ នៅពេលដែលពួកគេស្ថិតនៅក្នុងគន្លងផ្លូវជាមួយអ្នកនៅទីបំផុតបញ្ហារបស់ពួកគេនឹងក្លាយ ទៅជាបញ្ហារបស់អ្នក។
ខាងក្រោមនេះជាលក្ខណសម្បត្តិត្រួសៗរបស់ក្រុមមនុស្សពុល៖
-ផ្នត់គំនិតភ័យខ្លាច៖ ពួកគេជឿថា ចង់បានលុយ ឬទ្រព្យសម្បត្តិអាចធ្វើឲ្យមនុស្សលោភលន់ និងយល់ថា ខ្លួនធ្វើមិនបានឡើយ។
-ផ្ដោតលើបញ្ហា៖ ពួកគេផ្ដោតតែទៅលើបញ្ហាជាធំ ជាជាងស្វែងរកដំណោះស្រាយចំពោះបញ្ហានោះ។ សម្រាប់ពួកគេ គ្រប់ទីកន្លែងគឺជាបញ្ហា។
-រិះគន់ជាន់ពន្លិច៖ ដោយសារតែពួកគេជាមនុស្សគ្មានតម្លៃ ទើបពួកគេព្យាយាមអូសទាញអ្នកដទៃឲ្យធ្លាក់ចុះជាមួយនឹងខ្លួនដែរដោយប្រើភាសារិះគន់បន្ទាបបន្ថោក និងជាន់ពន្លិចបន្ថែម។
-មានទុទ្ទិដ្ឋិនិយម៖ ពួកគេមើលអនាគតក្នុងផ្លូវអវិជ្ជមាន ហើយជាលទ្ធផលពួកគេមិនអាចសម្រេចបានគោលដៅ និងក្តីសុបិន្ដរបស់ពួកគេបានទេ។
-ពូកែអួតអាង៖ ពួកគេមានទម្លាប់អាក្រក់ក្នុងការធ្វើឲ្យខ្លួនឯងលេចធ្លោក្នុងវត្តមានរបស់អ្នកដទៃដើម្បីធ្វើឲ្យមនុស្សនៅជុំវិញខ្លួនមានចំណាប់អារម្មណ៍។
-គ្រប់គ្រងអារម្មណ៍មិនបានល្អ៖ ពួកគេជាទាសករនៃអារម្មណ៍របស់ខ្លួន។ ឆាប់ខឹង និងឆេវឆាវច្រើន។
-មិនចូលចិត្តជួយ ឬគ្មានក្តីសង្ឃឹម៖ ពួកគេបាត់បង់ក្តីសង្ឃឹមចំពោះសមត្ថភាពខ្លួនឯង និងបណ្តែតបណ្តោយឲ្យឆាកជីវិតរសាត់អណ្តាតគ្មានកោះត្រើយ។
-ចូលចិត្តប្រៀបធៀបអ្នកដទៃ៖ ពួកគេមិនរីករាយនូវអ្វីដែលខ្លួនមាន ហើយក៏មិនខិតខំប្រឹងប្រែងដើម្បីចង់បានអ្វីដែលខ្លួនចង់បាននោះទេ។ ពួកគេចូលចិត្តបង្កើតទម្លាប់ យកអ្វីៗដែលអ្នកដទៃមានមកប្រៀបធៀបនឹងខ្លួនឯង។
-ខ្ញុំមុន អ្នកក្រោយ៖ ពួកគេមានផ្នត់គំនិត "អញ” និងបំពេញតម្រូវការរបស់ខ្លួនមុនអ្នកផ្សេងទាំងអស់។
-គ្មានភាពអត់ធ្មត់៖ ពួកគេបាត់បង់ការផ្ដោតអារម្មណ៍នៅក្នុងរយៈពេលវែងខាងមុខដើម្បីកសាងទ្រព្យសម្បត្តិ និងភាពជោគជ័យរបស់ខ្លួន។
-ភ័យខ្លាចការរិះគន់របស់អ្នកដទៃ៖ ដោយសារតែពួកគេមិនច្បាស់លាស់ពីខ្លួនឯង ពួកគេមានផ្នត់គំនិតមួយគឺប្រកាន់ខ្លួនឯងត្រូវជាធំ មិនខ្វាយខ្វល់ ឬបដិសេធន៍ការរិះគន់កែលំអពីអ្នកដទៃ។
-ពូកែសម្ដែង៖ ពួកគេមិនសប្បាយចិត្តទៅនឹងបញ្ហាដែលកើតមាននៅក្នុងជីវិតរបស់ពួកគេ ហើយនេះបានធ្វើឲ្យពួកគេធ្វើពុតជាមនុស្សម្នាក់ផ្សេងទៀតដែលមិនមែនជារបស់ខ្លួន។
-ផ្លោតរយៈពេលខ្លី៖ ពួកគេចង់បំពេញបំណងភ្លាមៗ ហើយមិនមានបំណងចង់វិនិយោគលើខ្លួនឯងសម្រាប់រយៈពេលវែងខាងមុខឡើយ។ ពួកគេចង់បានអ្វីដែលពួកគេចង់បាន ហើយចង់បានវានៅថ្ងៃនេះតែម្តង៕
ប្រភព៖ Businessinsider
