នាយកក្រុមហ៊ុន ALDO HR ប្រាប់ចំណុចសំខាន់ជួយឲ្យអាជីវកម្មដើរបានយូរអង្វែង
បច្ចុប្បន្នមានមនុស្សជាច្រើនកំពង់តែចាប់អារម្មណ៍ខ្លាំងទៅលើការបង្កើតអាជីវកម្ម ក៏ដូចជាមុខរបរផ្សេងៗ ទន្ទឹមគ្នានោះក៏មានអាជីវកម្មខ្លះរីកចម្រើន រីកចម្រើនខ្លាំង ប៉ុន្តែខ្លះទៀតបែរជាត្រូវខាតបង់និងក្ស័យធុនទៅវិញ។ តើមូលហេតុអ្វីទៅ? ជាមួយគ្នានេះ លោក ហម សំណាង អគ្គនាយកនៃក្រុមហ៊ុន ALDO HR បានលើកឡើងថា ម្ចាស់អាជីវកម្មឬអ្នករកស៊ីកុំផ្ដោតតែលើលុយចំណូល តែគួរគិតអំពីការរកស៊ីយូរអង្វែង។
លោក អគ្គនាយក ហម សំណាង ចែករំលែកថា ចំពោះអ្នកចង់រកស៊ីឬម្ចាស់អាជីវកម្មសូមកុំផ្ដោតសំខាន់ទីមួយទៅលើលុយ លោកឲ្យទុកលុយនៅចំណុចទីពីរ ព្រោះថាក្នុងការរកស៊ីឬធ្វើអាជីវកម្មណាមួយលុយវាប្រាកដជាកើតមកតាមក្រោយហើយព្រោះថាបើមិនមានចំណូលមិនមែនហៅថាការរកស៊ីនោះទេ។ ប៉ុន្តែអ្វីដែលជាចំណុចសំខាន់ដែលលោកចង់ឲ្យគិតសម្រាប់ការរកស៊ីយូរអង្វែងនោះគឺ គុណភាព។
លោក សំណាង បន្តដោយលើកជាឧទាហរណ៍ថា បើយើងជាអាជីវកម្មលក់សាប៊ូលាងចានមួយដែលមានគុណភាព ពេលដែលលក់ទៅមានការគាំទ្រលើទីផ្សារនោះប្រាកដជាមានការផ្សព្វផ្សាយផ្ទាល់មាត់ច្រើនពីម្នាក់ទៅម្នាក់នៅពេលនោះផលិតផលរបស់យើងនឹងលក់ដាច់ ជាពិសេសខ្មែរយើងគាំទ្រផលិតផលក្នុងស្រុកណាស់នៅពេលដែលយើងចេះយោគយល់គ្នា។
អ្វីដែលជាចំណុចដែលអាជីវកម្មគួរចៀសវាងគឺ កុំនៅពេលដែលផលិតផលចាប់ផ្ដើមលក់ដាច់ខ្លាំង ចាប់ផ្ដើមមានការគាំទ្រច្រើន យើងបែរជាយកផលិតផលក្លែងក្លាយមកលាយដើម្បីបានបរិមាណច្រើន នោះហើយវាប្រៀបដូចជាយើងសម្លាប់ខ្លួនឯងដូច្នោះដែរ។
លោក ហម សំណាង៖ «ជាការសំណូមពរពីខ្ញុំ សូមឲ្យម្ចាស់អាជីវកម្មគិតពីគុណភាពទីមួយ ព្រោះពេលដែលគុណភាពយើងល្អ សេវាកម្មយើងល្អ ផលិតផលល្អ នោះលុយនឹងចូលមកតាមក្រោយ»៕
ដោយ៖ ជួប ស្រីរ័ត្ន
