ទេសចរចិនកើនឡើង! កម្ពុជាគ្រោងបង្កើតជើងហោះហើរត្រង់ទៅចិនតែម្ដង
ដោយសារតែកំណើននៃភ្ញៀវទេសចរជនជាតិចិន ដែលធ្វើដំណើរកម្សាន្តនៅកម្ពុជាបន្តកើនឡើងជារៀងរាល់ឆ្នាំ ក្រុមហ៊ុនអាកាសចរណ៍ ខេមបូឌាអ៊ែរវ៉េគ្រោងនឹងបង្កើតជើងហោះហើរត្រង់ ទៅកាន់ទីក្រុងវិនចូវ ប្រទេសចិនផ្ទាល់តែម្ដង។
បើតាមកញ្ញា សុខរ៉ាវី ប្រធានផ្នែកទីផ្សារនៃក្រុមហ៊ុន ខេមបូឌា អ៊ែរវ៉េ បានឱ្យដឹងថា ក្រុមហ៊ុន បានដាក់សំណើរទៅកាន់រាជរដ្ឋាភិបាលរួចអស់ហើយ ដូច្នេះនៅពេលទទួលបានការយល់ព្រម ក្រុមហ៊ុនអាចចាប់ផ្ដើមបើកការហោះហើរនៅក្នុងអំឡុងពេលខែកក្កដានេះដោយក្រុមហ៊ុននាំចូលយន្តហោះចំនួន៣គ្រឿងបន្ថែមទៀត។
ក្រៅពីពង្រីកជើងហោះហើរទៅចិន ខេមបូឌា អ៊ែរវ៉េ ក៏គ្រោងបង្កើនជើងហោះហើរត្រង់ទៅអូស្រ្តាលី រុស្ស៊ី សិង្ហបុរី និងវៀតណាមផងដែរ ដើម្បីធ្វើការដោះដូរ ភ្ញៀវទេសចរគ្នាទៅវិញទៅមក ខណៈដែលបច្ចុប្បន្ននេះក្រុមហ៊ុនមានតែជើងហោះហើរក្នុងស្រុកទៅថៃ និងម៉ាកាវប៉ុណ្ណោះ។
ឯកឧត្តម តុប សុភ័ក អនុរដ្ឋលេខាធិការនៃក្រសួងទេសចរណ៍ បានចាត់ទុកការពង្រីកជើងហោះហើររបស់ក្រុមហ៊ុនអាកាសចរណ៍ក្នុងស្រុកនេះ គឺជាសញ្ញាណមួយដ៏ល្អ ក្នុងការចូលរួមចំណែកទាក់ទាញភ្ញៀវទេសចរធម្មតា និងទេសចរលក្ខណៈវិនិយោគ៕
ប្រភព៖ វិទ្យុជាតិ
