ក្រុមហ៊ុនធំមួយចំនួនរបស់អាមេរិកកំពុងចាប់អារម្មណ៍បណ្ដាក់ទុនបន្ថែមនៅកម្ពុជា
ក្នុងជំនួបពិភាក្សាជាមួយ ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម លោក Alexander Feldman អ្នកដឹកនាំគណៈប្រតិភូក្រុមប្រឹក្សាធុរកិច្ចអាមេរិក-អាស៊ាន (US-ABC) រួមជាមួយនឹងតំណាងសាជីវកម្មធំៗរបស់អាមេរិកបានបង្ហាញសុទិដ្ឋិនិយមចំពោះទីផ្សារកម្ពុជា និងមានបំណងបណ្ដាក់ទុនបន្ថែម ដើម្បីជំរុញកំណើនសេដ្ឋកិច្ច និងពាណិជ្ជកម្មនៃប្រទេសទាំងពីរ។
តាមប្រភពពីក្រសួងពាណិជ្ជកម្មបានឲ្យដឹងថា នៅក្នុងជំនួបកាលពីថ្ងៃទី០៨ ខែកក្កដា ដែលធ្វើឡើងនាក្រសួងពាណិជ្ជកម្មនេះ ក្រុមហ៊ុនធំៗដែលបង្ហាញចំណាប់អារម្មណ៍ចំពោះការបណ្ដាក់ទុនរួមមាន ConocoPhillips, Ford, General Electric (GE), Chevron, Coca-Cola, Facebook, Amazon Web Service, Oracle, Google, Master Card និង Visa Card។
តាមប្រភពខាងលើបានបង្ហាញថា ទំនាក់ទំនងពាណិជ្ជកម្មទ្វេភាគីរវាង កម្ពុជា-អាមេរិកនៅតែរក្សាបាននូវលទ្ធផលវិជ្ជមាន ហើយភាគីទាំងពីក៏បានបង្ហាញអំពីឆន្ទៈនៅក្នុងការបន្តពង្រឹងកិច្ចសហប្រតិបត្តិការលើវិស័យធុរកិច្ច និងវិនិយោគ រាប់ចាប់តាំងពីទំនិញប្រើប្រាស់ប្រចាំថ្ងៃ រហូតដល់សេវាកម្មបច្ចេកវិទ្យា និងពាណិជ្ជកម្មអេឡិចត្រូនិក នេះជាការលើកឡើងរបស់ ឯកឧត្ដម ប៉ាន សូរស័ក្តិ៕
ដោយ៖ ជួប ស្រីរ័ត្ន
