EU ផ្ដល់ជំនួយឥតសំណងជិត៩០លានអ៊ឺរូអភិវឌ្ឍគម្រោង៣លើវិស័យសំខាន់មួយនៅកម្ពុជា
ដើម្បចូលរួមក្នុងការអភិវឌ្ឍវិស័យជលផលដែលជាវិស័យស្នូលដ៏សំខាន់របស់កម្ពុជាឲ្យរីកចម្រើនប្រកបដោយចីរភាព សហភាពអ៊ឺរ៉ុប បានផ្ដល់ហិរញ្ញប្បទានឥតសំណងប្រមាណ៨៧លានអឺរ៉ូ អនុវត្តន៍គម្រោងរយ:ពេល ៦០ខែ (២០១៩- ២០២៣) ដោយផ្ដោតលើគម្រោងសំខាន់ចំនួន៣នៅកម្ពុជា។ គម្រោងនេះនិងសហការអនុវត្តដោយអង្គការ FAO UNESCO និង UNIDO ហើយរដ្ឋបាលជលផលជាស្ថាប័នទទួលខុសត្រូវ។
ការអនុវត្តលើគម្រោងសំខាន់ៗទាំង៣នោះរួមមាន ទី១គឺការកែលម្អការដឹកនាំ ការគ្រប់គ្រងលើការអនុវត្តច្បាប់ និងបច្ចេកទេស ការគ្រប់គ្រង អភិរក្ស ត្រួតពិនិត្យ និងអង្កេតធនធានជលផលទាំងទឹកសាបនិងសមុទ្រ។ ទី២ ធ្វើការគាំទ្រដល់ការអភិវឌ្ឍសេដ្ឋកិច្ចគ្រួសារ និងសង្គមតាមរយ:ការពង្រឹង និងពង្រីកខ្សែច្រវាក់ផលិតកម្ម (ចិញ្ចឹម-កែច្នៃ) ដែលរួមចំណែកបង្កើតការងារ និងបង្កើនចំណូលគ្រួសារ។ និងទី៣គឺ ធ្វើការកាត់ បន្ថយគម្លាតសេដ្ឋកិច្ច និងសង្គមរវាងប្រជានេសាទជាមួយប្រជាពលរដ្ឋមិនមែនជាអ្នកនេសាទ។
ការអភិវឌ្ឍន៍លើវិស័យខាងលើនឹងផ្តល់លទ្ធផលតាមការរំពឹងទុកដែលក្នុងនោះមានជាអាទិ៍÷ ពង្រឹងការអនុវត្តច្បាប់ បច្ចេកទេស ការគ្រប់គ្រងការនេសាទ ការកែច្នៃ ការការពារដែននេសាទ ការបង្កើតជម្រកត្រីពូជ ការបណ្តុះបណ្តាលសហគមន៍ និងផ្សព្វផ្សាយ ការផ្តល់សេវាកម្ម ការគ្រប់គ្រងមូលនិធិ ការកាត់បន្ថយការបាត់បង់ក្រោយពេលប្រមូលផល ការបង្កើនបរិមាណផលនេសាទក្នុងទីផ្សារ ធានាស្តង់ដារគុណភាពសុវត្ថិភាពទីផ្សារជាតិ-អន្តរជាតិ ការកសាងសមត្ថភាពមន្រ្តីជំនាញអំពីការត្រួតពិនិត្យគុណភាព និងអនាម័យ៕
រូបភាព៖ Swift News Daily
ដោយ៖ ជួប ស្រីរ័ត្ន
