ក្នុងការត្រៀមខ្លួនពីការដកEBA កម្ពុជាប្រើយុទ្ធសាស្រ្តនេះដើម្បីរក្សាអ្នកវិនិយោគ
ការដកកម្មវិធីអនុគ្រោះពន្ធ «គ្រប់មុខទំនិញលើកលែងសព្វាវុធ» (EBA) ពីកម្ពុជា បានក្លាយជាប្រធានបទមួយសម្រាប់ការពិភាក្សាពីសំណាក់ប្រជាជនខ្មែរ។ ជាមួយគ្នានេះ នៅក្នុងការអញ្ជើញជួបក្នុងពិធីសំណេះសំណាល និងសួរសុខទុក្ខបងប្អូនប្រជាពលរដ្ឋខ្មែរ មកពីបណ្ដាប្រទេសមួយចំនួនក្នុងសហគមន៍អ៊ឺរ៉ុប នាទីក្រុងហ្សឺណែវ ប្រទេសស្វីស កាលពីថ្ងៃទី០៤ ខែកក្កដា ឆ្នាំ២០១៩ សម្ដេចតេជោ ហ៊ុន សែន មានប្រសាសន៍ថា ដើម្បីរក្សាការវិនិយោគទុន ក្នុងស្រុក និងដើម្បីទប់ទល់ក្នុងគ្រាដែលកម្ពុជាត្រូវបាត់បង់ប្រព័ន្ធអនុគ្រោះពន្ធ (EBA) ពីសហភាពអឺរ៉ុប ដោយប្រការណាមួយនោះ កម្ពុជាបានកែទម្រង់ផ្ទៃក្នុងជាច្រើន។
សម្ដេចនាយករដ្ឋមន្ត្រីមានប្រសាសន៍លើកឡើងថា កម្ពុជាបានកែទម្រង់ផ្ទៃក្នុងជាច្រើនដែលបានលើកទឹកចិត្តដល់អ្នកវិនិយោគគិនឲ្យទទួលបាននូវប្រាក់ចំណេញកាន់តែច្រើនពីការវិនិយោគ។ នៅក្នុងកំណែទម្រង់មួយចំនួននោះមានដូចជា ការកែសម្រួលស្ថាប័នគយ ការដកកាំកុងត្រូលចេញពីតាមច្រកព្រំដែន និងការលុបចោលនូវភ្នាក់ងារ កម្ពុជានាវាចរ (កាត់ថាកាំសាប) ជាដើម។
បន្ថែមលើនេះ ក៏ មានការកាត់បន្ថយការស្កេន (Scan) ទំនិញតាមទូកុងតឺន័រដែលត្រូវដឹកចេញ ឬនាំចូល ជាពិសេសការនាំចេញផលិតផលសម្លៀកបំពាក់ និងស្បែកជើង ការកាត់បន្ថយថ្លៃសេវាលើកដាក់នៅតាមកំពង់ផែ ការដឹកជញ្ជូនតាមផ្លូវទឹក និងការកាត់បន្ថយថ្លៃអគ្គិសនីជាដើម៕
ដោយ៖ ជួប ស្រីរ័ត្ន
