JCIA កំពុងចាប់អារម្មណ៍វិនិយោគលើវិស័យសំណង់នៅកម្ពុជា
នៅក្នុងជំនួបមួយនាទីស្ដីកាក្រសួងសាធារណៈការនឹងដឹកជញ្ជូន ជាមួយឯកឧត្ដមរដ្ឋមន្ត្រីស្ដីទី តូច ចាន់កុសល គណៈប្រតិភូប្រឹក្សាធុរកិច្ចអង្គការ JCIA ដឹកនាំដោយលោក Takeshi Saito កាលពីថ្ងៃទី០២ ខែកក្កដា ឆ្នាំ២០១៩កន្លងទៅ។ ដោយនៅក្នុងជំនួបតំណាងអង្គការ JCIA អំពីឧបករណ៍បច្ចេកវិទ្យាសម្រាប់ពិសោធន៍ដី មុននឹងធ្វើការសាងសង់ហេដ្ឋារចនាសម្ព័ន្ធដឹកជញ្ជូន ក៏ដូចជាស្វែងរកសក្ដានុពល និងឱកាសវិនិយោគលើវិស័យសាធារណការ និងដឹកជញ្ជូននៅកម្ពុជាផងដែរ។ នេះបើយោងតាមក្រសួងសាធារណៈការនឹងដឹកជញ្ជូន។
នៅក្នុងឱកាសនោះ ឯកឧត្ដមរដ្ឋមន្ត្រីស្ដីទី បានសម្ដែងការស្វាគមន៍ចំពោះគម្រោងនេះ ព្រោះថា ក្រសួងសាធារណការ និងដឹកជញ្ជូនមានតួនាទីក្នុងការសាងសង់ផ្លូវ ស្ពាន កំពង់ផែ និងហេដ្ឋារចនាសម្ព័ន្ធរូបវន្តដទៃទៀតជាច្រើន។ បើមានឧបករណ៍ទំនើបសម្រាប់ពិសោធន៍ដី នោះនឹងធ្វើឱ្យគុណភាពសំណង់ទាំងនោះរឹតតែមានគុណភាពថែមទៀត។
ជាមួយគ្នានេះឯកឧត្តមក៏បានសម្ដែងការអរគុណ ចំពោះគណៈប្រតិភូដែលមានបំណងមកវិនិយោគលើវិស័យសាធារណការ និងដឹកជញ្ជូននៅកម្ពុជា និងស្នើឱ្យអង្គការនាំយកឧបករណ៍បច្ចេកទេសទាំងនោះមកកម្ពុជាដើម្បីធ្វើការពិសោធន៍ ព្រមទាំងស្នើឱ្យអង្គការជួយបណ្ដុះបណ្ដាលមន្ត្រីជំនាញរបស់ក្រសួង ឱ្យមានសមត្ថភាពគ្រប់គ្រាន់ក្នុងការប្រើប្រាស់ឧបករណ៍ទំនើបនោះ៕
ដោយ៖ ជួប ស្រីរ័ត្ន
