ចុងឆ្នាំ២០១៩នេះកំពង់ផែទេសចរណ៍អន្តរជាតិកំពតនឹងលេចជារូបរាងឡើងហើយ
កំពង់ផែទេសចរណ៍អន្តរជាតិក្នុងខេត្តកំពតជាគម្រោងគាំទ្រដោយធនាគារអភិវឌ្ឍន៍អាស៊ី ដែលជាផ្នែកមួយនៃគម្រោងអភិវឌ្ឍន៍ហេដ្ឋារចនាសម្ពន្ធ័ទេសចរណ៍ សម្រាប់កំណើនប្រកបដោយបរិយាប័ន្នក្នុងមហាអនុតំបន់មេគង្គ (GMS TIIG No. 3194) បានបើកការដ្ឋានសាងសង់កាលពីថ្ងៃទី០៨ ខែសីហា ឆ្នាំ២០១៨ រហូតមកបច្ចុប្បន្នបានសម្រេចបានប្រមាណជាង ២៥%ហើយ ដោយគ្រោងនឹងបញ្ចប់ដំណើរការសាងសង់នៅដំណាច់ឆ្នាំ២០១៩ខាងមុខនេះ។
កំពង់ផែទេសចរណ៍អន្តរជាតិនេះ មានទីតាំងស្ថិតនៅក្នុងស្រុកទឹកឈូ ខេត្តកំពត និងមានរចនាសម្ព័ន្ធតាមស្ដង់ដាអន្តរជាតិ ព្រមទាំងជាកំពង់ផែសម្រាប់ទេសចរណ៍និងអ្នកដំណើរមិនមែនសម្រាប់ដឹកជញ្ជូនទំនិញនោះឡើយ មួយវិញទៀតកំពង់ផែនេះគ្រោងនឹងអាចផ្ទុកអ្នកដំណើរទេសចរបានប្រមាណ១លាននាក់ក្នុងមួយឆ្នាំ។
តាមប្រសាសន៍របស់ឯកឧត្តម ថោង ខុន រដ្ឋមន្ត្រីក្រសួងទេសចរណ៍ និងជាប្រធានគណៈកម្មាការជាតិគ្រប់គ្រងគម្រោង បានលើកឡើងថា កំពង់ផែទេសចរណ៍អន្តរជាតិខេត្តកំពត នឹងក្លាយជាច្រកទ្វារអន្តរជាតិផ្លូវសមុទ្រយ៉ាងសំខាន់ដែល តភ្ជាប់ការដឹកជញ្ជូនភ្ញៀវទេសចរទៅកាន់បណ្តាកោះនានានៅភាគខាងត្បូង និងជាផ្លូវសមុទ្រដ៏សំខាន់ក្នុងការធានារ៉ាប់រង និងសម្រួលដល់ប្រព័ន្ធគមនាគមន៍ជាតិ និងតភ្ជាប់ខេត្តកំពត នៃប្រទេសកម្ពុជា ទៅកាន់ពិភពលោកផងដែរ៕
ដោយ៖ ជួប ស្រីរ័ត្ន
