ស្របពេល​ដែល​ការ​ចំណាយ​ពេល​សិក្សា​​ដល់​ទៅ ៤​ឆ្នាំ​សម្រាប់​ថ្នាក់​បរិញ្ញាបត្រ​បាន​ក្លាយ​ជា​រឿង​ទូទៅ​មួយ​សម្រាប់​និស្សិត​​គ្រប់រូប​​យក​ទៅ​ប្រើប្រាស់​ក្នុង​ទីផ្សារ​ការងារ​​ក្រោយ​បញ្ចប់​ការ​សិក្សា  លោក Tim Cook ប្រធាន​ក្រុមហ៊ុន​ Apple បាន​និយាយ​ថា រឿង​នេះ​​វា​មិន​ចាំបាច់​ទៀត​​​នោះ​ឡើយ។

ផ្អែក​លើ​អំណះអំណាង​របស់​លោក Cook មាន​ជំនាញ​ចាំបាច់​ជា​ច្រើន​ដែល​និស្សិត​អាច​រៀនសូត្រ​បាន​ដោយ​មិន​ចាំបាច់​ទៅ​អង្គុយ​នៅ​ក្នុង​ថ្នាក់​រៀន នោះ​គឺ​​ជំនាញ​សរសេរ​កូដ (Coding)។ 

«យើង​បាន​សម្លឹង​មើល​ជំនាញ​ដែល​មិន​ស៊ីចង្វាក់​គ្នា​រវាង​ជំនាញ​ដែល​ទទួល​បាន​ពី​មហាវិទ្យាល័យ និង​ជំនាញ​ដែល​យើង​ជឿជាក់​ថា យើង​ត្រូវការ​ចាំបាច់​នៅ​ពេល​អនាគត​ដែល​អាជីវកម្ម​ជា​ច្រើន​ធ្វើ​អីចឹងដែរ។ យើង​បាន​កំណត់​ថា ជំនាញ​សរសេរ​កូដ គឺ​ជា​ជំនាញ​សំខាន់​ជាងគេ​បំផុត​មួយ​របស់​ក្រុមហ៊ុន​យើង​»។ នេះ​ជា​​ការ​លើក​ឡើង​របស់​លោក Cook នៅ​ក្នុង​កិច្ចប្រជុំ​ក្រុមប្រឹក្សា​​​ស្តី​ពី​ពលកម្ម​អាមេរិក​ (American Workforce Policy Advisory Board meeting) ដ៏​ធំ​មួយ​ជាមួយ​លោក​ប្រធានាធិបតី Donald Trump កាល​ពី​ពេល​កន្លង​ទៅ។

ប្រធាន​ក្រុមហ៊ុន​បច្ចេកវិទ្យា​យក្ស​រូប​នេះ​ថែម​ទាំង​សារភាព​ទៀត​ថា កាល​ពី​ឆ្នាំ​ទៅមិញ បុគ្គលិក​ប្រហែល​ពាក់​កណ្តាល​ដែល​ចូល​ធ្វើ​ការ​នៅ​ក្នុង​ក្រុមហ៊ុន​ Apple របស់​លោក អត់​មាន​សញ្ញាប័ត្រ​ ៤​ឆ្នាំ​​ដូច​គេ​នោះ​ទេ។ ​ទន្ទឹម​នឹង​នេះ​លោក​ថែម​ទាំង​ជឿជាក់​ទៀត​ថា រាល់​ក្មេងៗ​ជំនាន់​ក្រោយ​របស់​អាមេរិក​គួរ​ទាមទារ​ឲ្យ​រៀន​កម្មវិធី​សរសេរ​កូដ​មួយ​ចំនួន​ផងដែរ​មុន​ពួកគេ​បញ្ចប់​ថ្នាក់​វិទ្យាល័យ។

សូម​បញ្ជាក់​ថា ក្រុមហ៊ុន Apple ​បាន​ចាប់ផ្តើម​​ដាក់​ឲ្យ​ដំណើរការ​កម្មវិធី​មួយ​ឈ្មោះ​ថា​ Everyone Can Code របស់​ខ្លួន​​រួច​ហើយ​កាល​ពី​ឆ្នាំ ២០១៦ កន្លង​ទៅ។ វា​ត្រូវ​បាន​ ​បង្កើត​ឡើង​ដើម្បី​ជួយ​ដល់​សិស្សានុសិស្ស​ពី​ថ្នាក់​មត្តេយ្យ​រហូត​​ដល់​ថ្នាក់​មហាវិទ្យាល័យ​អាច​សិក្សា​ពី​មេរៀន​សរសេរ​កូដ​ ហើយ​​រហូត​មក​ដល់​ពេល​នេះ​មាន​សាលារៀន​ចំនួន ៤ ០០០ នៅ​សហរដ្ឋអាមេរិក​​កំពុង​​យក​កម្មវិធី​នេះ​ទៅ​សិក្សា។

សម្រាប់​ក្រុមហ៊ុន Apple មាន​ការងារ​​ជាក់លាក់​មួយ​ចំនួន​ដែល​ក្រុមហ៊ុន​នេះ​មិន​ទាមទារ​ឲ្យ​បុគ្គលិក​មាន​សញ្ញាប័ត្រ​មក​ធ្វើ​ការ ហើយ​ក្រុមហ៊ុន​ Google ក្រុមហ៊ុន IBM ធនាគារ​អាមេរិក Bank of America និង​ក្រុមហ៊ុន​ Hilton ក៏​សុទ្ធតែ​បាន​អនុវត្ត​គោលការណ៍​នេះ​ជា​បន្តបន្ទាប់​រួច​មក​ហើយ​ដែរ​។

ដោយ​សំអាង​លើ​បទពិសោធន៍​ជីវិត​របស់​លោក Steve Jobs ស្ថាបនិក​ក្រុមហ៊ុន Apple ដែល​ធ្លាប់​បោះបង់​សាលា​ហើយ​បង្កើត​ក្រុមហ៊ុន​នេះ​ជា​លើកដំបូង​​​ពី​កន្លែង​ចំណតរថយន្ត​របស់​លោក​កាល​ពី​ឆ្នាំ​ ១៩៧៦ លោក Tim Cook បាន​​បញ្ជាក់​ថា ការ​បញ្ចប់​ថ្នាក់​នៅ​មហាវិទ្យាល័យ​មិនមែន​សុទ្ធតែ​ជា​រឿង​ដែល​អ្នក​ត្រូវ​ធ្វើ​ឲ្យ​បាន​ល្អ​បំផុត​​នោះ​ទេ។

«ដូច្នេះ​យើង​មិន​ដែល​ធ្លាប់​គិត​ថា ជំនាញ​រៀន​នៅ​មហាវិទ្យាល័យ​​គឺ​ជា​អ្វី​ដែល​អ្នក​​ចាំបាច់​ត្រូវ​ធ្វើ​ឲ្យ​បាន​ល្អ​បំផុត​នោះ​ទេ។  ក្រុមហ៊ុន​របស់​យើង​តែងតែ​ព្យាយាម​សាបព្រោះ​ចំណេះដឹង​ជា​ប្រចាំ​សម្រាប់​អ្នក​ដែល​មាន​ឱកាស​ចូល​មក​ធ្វើ​ការ​នៅ​ទី​នេះ​» ។ នេះ​គឺ ជា​ការ​បញ្ជាក់​បន្ថែម​របស់​លោក Tim Cook៕ 

ប្រភព៖ Businessinsider