អ្នកស្រាវជ្រាវបានបង្ហើបមូលហេតុ ៩ ដែលធ្វើឲ្យអ្នកណាម្នាក់បាក់ចិត្តលង់ស្រលាញ់អ្នក
បើអ្នកមើលជីវិតគូនៅជុំវិញអ្នក អ្នកនឹងសង្កេតឃើញថា វាកើតឡើងដោយសារក្តីស្រលាញ់របស់មនុស្សពីរនាក់បានជួបគ្នា។ ក៏ប៉ុន្តែអ្នកអាចមិនបានដឹងថា តើជីវិតគូរបស់អ្នកទាំងនោះឆ្លងកាត់អ្វីខ្លះទេមុននឹងមានថ្ងៃនេះ? តាមពិតទៅស្រលាញ់អ្នកណាម្នាក់ងាយស្រួលទេ ប៉ុន្តែអ្វីដែលពិបាកនោះ តើធ្វើដូចម្តេចទើបឲ្យម្នាក់ដែលអ្នកស្រលាញ់ មកស្រលាញ់អ្នកវិញ?
ដឹងចម្លើយហើយឬនៅ? បើមិនទាន់ដឹងទេ សាកល្បងមើលមូលហេតុសំខាន់ៗមួយចំនួនខាងក្រោមនេះដែលការស្រាវជ្រាវបានរកឃើញថា វាអាចជួយឲ្យអ្នកណាម្នាក់មកលង់ស្រលាញ់អ្នកកាន់តែខ្លាំង។
១.ប្រសិនបើទិញអចលនទ្រព្យបែបធម្មជាតិសម្រាប់ស្នាក់នៅ និងលំហែកម្សាន្ត
ការសិក្សាមួយនៅឆ្នាំ ២០១៦ បានរកឃើញថា បុរស និងស្ត្រីដែលទិញអចលនទ្រព្យបែបធម្មជាតិដូចជាផ្ទះដែលមានអមដោយធម្មជាតិស្រស់បំព្រងជាមួយផងនោះ ជីវិតគូរបស់អ្នកទាំងនោះមានទំនាក់ទំនងយូរអង្វែង។ ផ្ទុយទៅវិញ អ្នកដែលចូលចិត្តទិញសម្ភារៈទំនើបៗក្នុងជីវិតបែបហ៊ឺហា មានភាពទាក់ទាញតែផ្នែករូបសម្បត្តិតែប៉ុណ្ណោះ និងអាចរក្សាទំនាក់ទំនងបានរយៈពេលខ្លីជាង។
២.ប្រសិនបើអ្នកប្រកាន់ចរិតរឹងរូសធ្វើដូចជាមិនចាប់អារម្មណ៍អ្នកណាម្នាក់ដែលស្រលាញ់អ្នក
ការសិក្សានៅក្នុងឆ្នាំ ២០១៤ បានបង្ហាញថា បុរសដែលធ្លាប់មានបទពិសោធន៍ញ៉ែស្រីងាយៗ រាប់មិនអស់នៅក្នុងរយៈពេលដ៏ខ្លីនឹងលង់ស្រលាញ់ខ្លាំងនារីរូបណាដែលមិនងាយបុរសៗណាស្រលាញ់បាន។ ប៉ុន្តែនារីៗដែលល្បែងមួយនេះ បុរសៗភាគច្រើនមិនសូវចូលចិត្តឡើយ។ សុភាពនារីដែលចង់ធ្វើបែបនេះបានគឺអាស្រ័យលើស្ថានភាពមួយចំនួនប៉ុណ្ណោះ ពោលគឺនៅពេលដែលបុរសដែលកំពុងតាមស្រលាញ់អ្នក ប្ដេជ្ញាចិត្តជ្រើសរើសអ្នកជាគូអនាគតតែប៉ុណ្ណោះ។ បើមិនដូច្នេះទេ កុំថាឡើយក្តីស្រលាញ់ សូម្បីតែចូលចិត្តក៏បុរសៗទាំងនោះមិនមានផង។
៣.តាមរយៈការបញ្ចេញទឹកមុខ
សុភមង្គលគឺជាទូទៅមានភាពទាក់ទាញខ្លាំងណាស់សម្រាប់នារីទាំងឡាយប្រាថ្នាចង់បាន ប៉ុន្តែវាវាហាក់មិនសូវសំខាន់ប៉ុន្មានឡើយសម្រាប់បុរសៗ។ ការសិក្សានៅក្នុងឆ្នាំ ២០១១ ដែលបានធ្វើពិសោធន៍លើមនុស្សជាង ១ ពាន់នាក់ ដោយបង្ហាញរូបថតរបស់មនុស្សមួយក្រុម មានស្រីមានប្រុស និងបានសាកសួរពួកគេពីភាពទាក់ទាញរបស់មនុស្សម្នាក់នៅក្នុងរូបថតនោះ។
លទ្ធផលបានបង្ហាញថា បុរសៗយល់ថាស្ត្រីមានភាពទាក់ទាញបំផុតនៅពេលពួកគេមើលទៅជានារីដែលសប្បាយចិត្ត និងមិនសូវទាក់ទាញនៅពេលពួកគេបង្ហាញពីមោទនភាពខ្លួនឯងជ្រុលពេក។ ផ្ទុយទៅវិញនារីៗ យល់ឃើញថា បុរសដែលគួរឲ្យទាក់ទាញបំផុតគឺជាបុរសដែលមានមោទនភាពលើខ្លួនឯង ហើយបុរសមិនសូវទាក់ទាញនៅពេលពួកគេជាបុរសសប្បាយចិត្ត។ ប៉ុន្តែអ្វីដែលគួរឲ្យទាក់ទាញផងដែរនោះ គឺភាពខ្មាសអៀនត្រូវបានចាត់ទុកថា គួរឲ្យទាក់ទាញទាំងបុរស និងនារី។
៤.ប្រសិនបើអ្នកប្រើកាយវិការច្រើនពេលពិភាក្សាពីនេះពីនោះ
ការសិក្សានៅឆ្នាំ ២០១៦ អ្នកស្រាវជ្រាវបានពិសោធន៍ទៅលើបុរស និងនារីនៅពេលមានការណាត់ជួបមួយរបស់ពួកគេម្នាក់ៗ។ លទ្ធផលបានបង្ហាញថា អ្នកទាំងនោះកាន់តែចាប់អារម្មណ៍ទ្វេដងនៅពេលបានឃើញដៃគូរបស់ខ្លួនប្រើកាយវិការសន្ទនាបានត្រឹមត្រូវ និងរស់រវើក ជាងដៃគូដែលអង្គុយ ឬឈរនិយាយនៅស្ងៀមដូចគល់ឈឺ។
៥.ប្រសិនបើអ្នកមានអត្តចរិតប្រហាក់ប្រហែលគ្នា
ការសិក្សាស្រាវជ្រាវជាច្រើនទសវត្សកន្លងទៅដែលថា "អត្តចរិតផ្ទុយគ្នាមានភាពទាក់ទាញ" ត្រូវបានបិទបញ្ចប់ហើយ។ លោក Gian Gonzaga ប្រធានក្រុមហ៊ុន Data Scienceដែលជាអ្នកដឹកនាំស្រាវជ្រាវលើគូស្វាមីភរិយាបានលើកឡើងថា បុរស នារីដែលមានអត្តចរិត ឬបុគ្គលិកលក្ខណៈស្រដៀងគ្នា នឹងមានអារម្មណ៍ដូចគ្នាក្នុងជីវិតប្រចាំថ្ងៃរបស់ពួកគេ។ លោកបន្តថា អត្តចរិតប្រហាក់ប្រហែលគ្នានេះ បានធ្វើឲ្យគូស្នេហ៍នោះងាយយល់ចិត្តគ្នាទៅវិញទៅមកក្នុងជីវិតប្រចាំថ្ងៃ។
៦.ប្រសិនបើអ្នកប្រើក្រសែភ្នែកសម្លឹងដាក់គ្នាចំៗរហូតដល់ ២នាទី
ឥឡូវនេះសូមត្រឡប់ទៅមើលការស្រាវជ្រាវមួយរបស់សាកលវិទ្យាល័យ Massachusetts កាលពីឆ្នាំ ១៩៨៩ ។ ការស្រាវជ្រាវនៅពេលនោះបានបង្គាប់ឲ្យមនុស្សជាច្រើនគូឈរសម្លឹងដាក់គ្នាមិនព្រិចភ្នែកដោយប្រើពេល ២នាទី។ ជាលទ្ធផលអ្នកទាំងនោះបានសារភាពថា ពួកគេមានអារម្មណ៍ថា ក្តីស្រលាញ់របស់ខ្លួនទៅកាន់ដៃគូរបស់ពួកគេមានការកើនឡើង។ សាកលវិទ្យាល័យនេះបានអះអាងថា វិធីនេះមានប្រសិទ្ធភាពបើទោះបីជាមិនធ្លាប់ស្គាល់គ្នាពីមុនមកក៏ដោយ។
៧.ប្រសិនបើអ្នកមានក្លិនក្រអូប
ការស្រាវជ្រាវមួយរបស់សាកលវិទ្យាល័យ Southern California បានរកឃើញថា បុរសៗឬនារីៗដែលមានក្លិនក្រអូប មានភាពទាក់ទាញជាងអ្នកដែលមិនមានក្លិនក្រអូប។ ការប្រើទឹកអប់ ជាពិសេសទឹកអប់ដែលថ្លៃៗ ដែលប្រើនៅ លើសំលៀកបំពាក់របស់ពួកគេ នឹងធ្វើឲ្យមានចំណាប់អារម្មណ៍ភ្លាមៗនៅពេលស្ថិតក្នុងចំណោមក្រុមមនុស្ស។
៨.ប្រសិនបើអ្នកចិញ្ចឹមឆ្កែ
ការពិសោធន៍មួយធ្វើឡើងនៅក្នុងឆ្នាំ ២០១៤ ទៅលើនារីអ៊ីស្រាអែល ១០០ នាក់ដោយបង្គាប់ឲ្យពួកគេអានពាក្យមួយឃ្លាអបដោយរូបភាពបុរសៗផ្សេងៗគ្នា។ ជាលទ្ធផលបានបង្ហាញថា មិនថាបុរសនោះជាមនុស្សបែបណា នារីៗបានឲ្យតម្លៃទៅលើបុរសៗ ដែលចិញ្ចឹមឆ្កែថា ស័ក្តិសមជាដៃគូជីវិតរបស់ខ្លួន ជាងបុរសៗដែលចិញ្ចឹមឆ្មា។ ការស្រាវជ្រាវនេះក៏បានសន្និដ្ឋានថា អ្នកចិញ្ចឹមសត្វជាមនុស្សមានសមត្ថភាព មានការប្ដេជ្ញាចិត្តខ្ពស់សម្រាប់អនាគតវែងឆ្ងាយខាងមុខ និងក៏បង្ហាញផងដែរថា អ្នកទាំងនោះជាមនុស្សចិត្តទូលាយ មិនប្រកាន់ និងជាមនុស្សរីករាយទៀតផង។
៩.ប្រសិនបើអ្នកមើលទៅស្រស់ស្អាតសង្ហារបានស្មើ ឬមិនបានស្មើពួកគេ
នៅក្នុងការសិក្សាស្រាវជ្រាវមួយកាលពីឆ្នាំ ២០១០ គេបានយករូបថតចៃដន្យរបស់មនុស្សចម្លែកៗទៅដាក់ផ្គូផ្គងរូបថតរបស់មនុស្សមួយក្រុមដើម្បីប្រៀបធៀបតាមវិធី២យ៉ាង។ ទី១ យករូបថតចៃដន្យរបស់មនុស្សចម្លែកទាំងនោះដែលមានរូបរាងស្អាតជាង និងសង្ហារជាងទៅផ្គូផ្គងអ្នកចូលរួម និងទី២ យករូបថតចៃដន្យរបស់មនុស្សចម្លែកទាំងនោះដែលមានរូបរាងមិនសូវស្អាតជាង និងមិនសង្ហារជាងអ្នកចូលរួម។ ជាលទ្ធផលពួកគេបានសារភាពថា ខ្លួនចាប់អារម្មណ៍អ្នកដែលស្រស់ស្អាតសង្ហារប្រហាក់ប្រហែល ឬមិនសូវស្អាតសង្ហារដូចខ្លួនច្រើនជាងអ្នកដែលស្អាតជាង និងសង្ហារជាងខ្លួន៕
ប្រភព៖ Businessinsider
