ក្រុមហ៊ុនលំដាប់ពិភពលោកមួយគ្រោងវិនិយោគឡសម្ងួតស្រូវបំពាក់បច្ចេកវិទ្យាឈានមុខគេនៅកម្ពុជា
ក្រុមហ៊ុនលំដាប់ពិភពលោក Buhler ដែលមានការរិយាល័យកណ្ដាលនៅទីក្រុងហ្សូរិច នៃប្រទេសស្វីសគ្រោងវិនិយោគសាងសង់ឡសម្ងួតស្រូវ (សៃឡូ) ចំនួន១០ទីតាំងក្នុងខេត្តគោលដៅចំនួន១០ ដែលអាចស្តុកទិន្នផលស្រូវប្រមាណ ១លានតោន និងអាចសម្ងួតស្រូវ ១៣ពាន់តោន ក្នុងមួយថ្ងៃ សម្រាប់កែច្នៃជាផលិតផលចំណីអាហារ ដើម្បីនាំចេញទៅកាន់ទីផ្សារអន្តរជាតិ។ នេះបើតាមការចុះផ្សាយរបស់ក្រសួងពាណិជ្ជកម្ម។
នៅក្នុងជំនួបជាមួយ ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម កាលពីរសៀលថ្ងៃទី១៩ ខែមិថុនា ឆ្នាំ២០១៩នេះ លោក David Wang ប្រធានក្រុមហ៊ុន Buhler Group Asia បានថ្លែងអំណរគុណរាជរដ្ឋាភិបាលកម្ពុជា ដែលបានផ្តល់ការគាំទ្រចំពោះគម្រោងវិនិយោគ ឡសម្ងួត (សៃឡូ) ដែលបំពាក់ដោយបច្ចេកវិទ្យាទំនើបឈានមុខគេនៅកម្ពុជា ដើម្បីចូលរួមអភិវឌ្ឍន៍ខ្សែចង្វាក់តម្លៃស្រូវអង្ករ និងធ្វើពិពិធកម្មការនាំចេញផលិតផលសម្រេច ទៅកាន់ទីផ្សារសាកល ប្រកបដោយនិរន្តរភាព។
ជាការឆ្លើយតប ឯកឧត្តមរដ្ឋមន្ត្រី ប៉ាន សូរស័ក្តិ បានសម្តែងក្តីសោមនស្ស និងសាទរចំពោះគម្រោងវិនិយោគរបស់ក្រុមហ៊ុន Buhler ព្រមទាំងបង្ហាញជំនឿមុតមាំថា នៅពេលការសាងសង់បញ្ចប់ គម្រោងនេះមិនត្រឹមតែជួយពង្រឹងស្ថិរភាពតម្លៃកសិផលក្នុងស្រុកប៉ុណ្ណោះទេ ប៉ុន្តែថែមទាំងអាចទប់ស្កាត់ការហូរចេញស្រូវទៅកាន់ប្រទេសជិតខាង ជួយលើកកម្ពស់ជីវភាពប្រជាកសិករ ក៏ដូចជាការអភិវឌ្ឍសេដ្ឋកិច្ចជនបទ។ លើសពីនេះ ឡសម្ងួតទាំងអស់ ក៏នឹងផ្តល់គុណប្រយោជន៍ធំធេងដល់ការអភិវឌ្ឍវិស័យកសិ-ពាណិជ្ជកម្មជាតិ ដែលនឹងរួមចំណែកលើកស្ទួយកិត្តិនាមរបស់កម្ពុជា នៅលើឆាកអន្តរជាតិផងដែរ៕
ដោយ៖ ជួប ស្រីរ័ត្ន
