ឆាប់ៗខាងមុខនេះ! អគារពាណិជ្ជកម្មទំហំ៣០០០ម៉ែត្រការ៉េនឹងបង្ហាញវត្តមាននៅក្នុងរាជធានីភ្នំពេញ
អគារពាណិជ្ជកម្ម Royal Train Square ទំហំ៣០០០ម៉ែត្រការ៉េនឹងបង្ហាញវត្តមាននៅរាជធានីភ្នំពេញ បន្ទាប់ពីក្រុមអ្នកបណ្ដាក់ទុនមកពីសហរដ្ឋអាមេរិកបានប្រកាសជាផ្លូវការថា គ្រោងនឹងកែឆ្នៃ ជួសជុលឡើងវិញនូវស្ថានីយរថភ្លើងភ្នំពេញឲ្យក្លាយទៅជាអគារពាណិជ្ជកម្មដ៏ទំនើប ដែលគម្រោងនេះគ្រោងនឹងចំណាយថវិកាប្រមាណ ៥លានដុល្លារអាមេរិក ដែលនឹងដំណើរការសាងសង់នារយៈពេល ៣ឬ៤ខែខាងមុខនេះ។
អគារទំហំ ៣០០០ម៉ែត្រការ៉េនេះ សាងសង់ឡើងសម្រាប់ការធ្វើពាណិជ្ជកម្មដោយក្នុងនោះរួមបញ្ចូលទាំងការសាងសង់ផ្សារទំនើបនានា ហាងកាហ្វេ ភោជនីយដ្ឋាន ធនាគារ ទូរ ATM ជាច្រើន និងជាកន្លែងសម្រាប់ជួលធ្វើជាការិយាល័យ សម្រាប់រៀបចំព្រឹត្តិការណ៍ និងកម្មវិធីពិណ៌ផ្សេងៗ។ អគារនេះនឹងប្រែក្លាយទៅជាអគារមួយដែលមានភាពទាក់ទាញបំផុតនៅភ្នំពេញ និងជាតំបន់សម្រាប់ការជួបជុំក្នុងតំបន់អាជីវកម្ម ព្រមទាំងជាកន្លែងទទួលស្វាគមន៍ភ្ញៀវដែលធ្វើដំណើរតាមរថភ្លើងផងដែរ។
លោក Scott Bolls មេធាវីផ្នែកច្បាប់អចលនទ្រព្យ និងការអភិវឌ្ឍ និងជាអ្នកដឹកនាំគម្រោងនេះបានឲ្យដឹងថា «ជាមួយនឹងគម្រោងអភិវឌ្ឍសាងសង់អគារ Royal Train Square យើងនឹងផ្តល់ឲ្យប្រជាពលរដ្ឋ នូវកន្លែងថ្មីមួយដើម្បីជួបជុំគ្នា ញ៉ាំអាហារពេលល្ងាច និងសម្រាកលំហែជាមួយទិដ្ឋភាពជុំវិញខ្លួនដ៏ស្រស់ស្អាត រួមជាមួយនឹងហាងកាហ្វេ ភោជនីយដ្ឋាន និងហាងជាច្រើនទៀត»៕
ដោយ៖ ជួប ស្រីរ័ត្ន
