កម្មវិធីពិព័រណ៍ស្ថាបត្យកម្មនិងដេក័រ២០១៩ រំពឹងជួយជំរុញវិស័យពាណិជ្ជកម្មនិងស្ថាបត្យកម្មខែ្មរ
ពិព័រណ៍ស្ថាបត្យកម្ម និងដេក័រ ២០១៩ គឺជាជាកម្មវិធីលើកទី៤ហើយ ដែលសមាគមន៍ស្ថាបត្យករកម្ពុជា និងICVEX បានសហការនឹងរៀបចំឡើង ក្នុងគោលបំណងជួយជំរុញវិស័យពាណិជ្ជកម្ម និងវិស័យស្ថាបត្យកម្មខ្មែរឲ្យកាន់តែរីកចម្រើនក្រោមការគាំទ្រយ៉ាងខ្លាំងពីក្រសួងពាណិជ្ជកម្ម សភាពាណិជ្ជកម្ម និងក្រុមប្រឹក្សាភិបាលស្ថាប័ត្យកម្មកម្ពុជា។
នៅក្នុងសន្និសិទ្ធិសាព័ត៌មានស្ដីអំពីពិពណ៍ស្ថាបត្យកម្ម និងដេក័រ២០១៩ ដែលនឹងប្រព្រឹត្តិទៅរយៈពេល៣ថ្ងៃគឺនាថ្ងៃទី០៦ ដល់ថ្ងៃទី០៨ ខែមីថុនា ឆ្នាំ២០១៩ខាងមុខនេះ លោក ស៊ឹន សុជាតិ ប្រធានសមាគមន៍ស្ថាបត្យករកម្ពុជា បានលើកឡើងថា ពិព័រណ៌នេះនឹងមានកម្មវិធីមួយដែលផ្ដល់នូវPlatform ដល់ស្ថាបត្យករ និងគ្រប់ធុរជនដែលប្រកបរបរក្នុងវិស័យសាងសង់ និងអ្នកផ្គត់ផ្គង់សម្ភារៈបរិក្ខា ឲ្យពួកគាត់បានជួបគ្នា ស្គាល់គ្នា និងចែករំលែកពីការធ្វើអាជីវកម្មនិងវិស័យដែលគាត់បានធ្វើ ដោយលោកផ្ទាល់នឹងរំពឹងថាអាចជួយជំរុញឲ្យវិស័យពាណិជ្ជកម្ម និងវិស័យស្ថាបត្យកម្មខ្មែរកាន់តែរីកចម្រើនឡើង។
លោក សុជាតិ បន្តថា ក្រៅអំពីពិព័រណ៍ខ្លួនឯងនេះ ក៏នឹងមានការធ្វើបទបង្ហាញពីសំណាក់វាគ្មិនល្អៗពីក្រៅប្រទេសប្រកបដោយវិជ្ជាជីវៈនិងបទពិសោធន៍ ដែលនឹងមកធ្វើការចែករំលែកក្នុងរយៈពេល៣ថ្ងៃជាបន្តបន្ទាប់ ដោយនាំយកមកនូវផលប្រយោជន៍យ៉ាងច្រើន ដែលមិនមែនសម្រាប់តែស្ថាបត្យករប៉ុណ្ណោះទេប៉ុន្តែគឺសម្រាប់សាធារណៈជនទូទៅដែលគាត់ចូលរួម ព្រោះអាចឲ្យគាត់ស្វែងយល់ពីបច្ចេកវិទ្យា និងសម្ភារៈទំនើបៗដែលនាំមកពីក្រៅប្រទេស។
ជាមួយគ្នានេះដែរ លោក Chinakit Viphavakit នាយកគ្រប់គ្រងទូទៅនៃ ICVEX បានលើកឡើងថា វត្តមាននៃការចូលរួមកម្មវិធី ពីសំណាក់សាធារណៈជនតែងតែកើនឡើងពីមួយឆ្នាំទៅមួយឆ្នាំ ដែលកាលពីឆ្នាំមុនមានអ្នកចូលរួមជាង៤ពាន់នាក់ ដែលនេះគឺចាឱកាសដ៏ល្សសម្រាប់អ្នកចូលរួម ក្នុងការជួបជជែកជាមួយអ្នកដំណាងក៏ដូចជាអ្នកដែលធ្វើការនៅក្នុងវិស័យនេះទាំងក្នុងប្រទេស និងអន្តរជាតិផងដែរ។
គួរបញ្ជាក់ផងដែរថា កម្មវិធីពិពណ៌ស្ថាបត្យកម្ម និងដេក័រ២០១៩ និង ធ្វើឡើងនៅថ្ងៃទី០៦ ដល់ថ្ងៃទី០៨ ខែមីថុនា ឆ្នាំ២០១៩ នាសាលសន្និបាតនិងពីពណ៌កោះពេជ្រ ដោយមានការដាក់បង្ហាញផលិតផលប្រមាណជាង១០០ម៉ាក ដោយមានការតាំងបង្ហាញ ផលិតផល បច្ចេកវិទ្យា ផលិតផលបង្កើតថ្មី ព្រមទាំងសេវាកម្មបន្ថែមផ្សេងៗទៀត៕
