ក្រុមហ៊ុនចិនគ្រោងវិនិយោគផលិតថាមពលអគ្គិសនីដើរដោយពន្លឺព្រះអាទិត្យនៅកម្ពុជា
ក្រុមហ៊ុនចិន China huangeng group កំពុងតែសិក្សានិងអភិវឌ្ឍន៍ទៅលើគម្រោងថ្មីទាក់ទងនឹងការផលិតថាមពលអគ្គិសនីនៅកម្ពុជា ដែលដើរដោយថាមពលពន្លឺព្រះអាទិត្យ ដោយក្នុងនោះក្រុមហ៊ុនគ្រោងនឹងវិនិយោគអគ្គិសនីចំនួន២០០មេហ្កាវ៉ាត់នាពេលខាងមុខនេះ។
សម្ដេចនាយករដ្ឋមន្ត្រី ហ៊ុន សែន បានណែនាំដល់ក្រុមហ៊ុន China huangeng group គឺជាក្រុមហ៊ុនអគ្គីសនីដើរដោយវារីអគ្គិសនី ដែលក្រុមហ៊ុននេះបានចាប់ដៃសហការជាមួយក្រុមហ៊ុន Royal Group របស់ឧកញ៉ា គិត ម៉េង បង្កើតវារីអគ្គិសនីសេសានក្រោម២ ឲ្យមានការស្រាវជ្រាវនិងបោះទុនទៅលើការវិនិយោគថាមពលអគ្គិសនីដើរដោយព្រះអាទិត្យ។
ជាមួយគ្នានេះ ឯកឧត្តមតំណាងក្រុមហ៊ុនបានបញ្ចាក់ថា កម្ពុជាមានប្រភពថ្មីនៃថាមពលជាពិសេសគឺថាមពលដែលស្អាតនិងបៃតងដែលគាំទ្រដល់បរិស្ថានសម្រាប់គម្រោងថ្មីនេះឯកឧត្តម បានស្នើរសុំការគាំទ្រពីសម្ដេចនាយករដ្ឋមន្ត្រីកម្ពុជាផងដែរ ដើម្បីចូលរួមអភិវឌ្ឍន៍ថាមពលបន្ថែមនៅកម្ពុជា៕
ដោយ៖ ជួប ស្រីរ័ត្ន
