មានដឹងទេថា ហេតុអ្វីអចលនទ្រព្យមីយ៉ាន់ម៉ាមានតម្លៃថ្លៃ?
អចលនទ្រព្យក្នុងប្រទេសមីយ៉ាន់ម៉ាជាវិស័យមួយដែលកំពុងទទួលបានការចាប់អារម្មណ៍ និងមានភាពទាក់ទាញការវិនិយោគយ៉ាងខ្លាំងពីសំណាក់វិនិយោគិនក្នុងស្រុក និងបរទេស។ វិនិយោគិនបរទេសជាច្រើនដែលកំពុងសម្លឹងមើលឱកាសដើម្បីធ្វើការវិនិយោគលើវិស័យអចលនទ្រព្យនៅក្នុងប្រទេសនេះ តែវាមានការភ្ញាក់ផ្អើលជាខ្លាំងចំពោះតម្លៃអចលនទ្រព្យនៅមីយ៉ាន់ម៉ាពិសេសទីក្រុងយ៉ាំងហ្គូន។
តើដោយសារមូលហេតុអ្វីទើបធ្វើឲ្យតម្លៃអចលនទ្រព្យនៅទីនោះឡើងខ្ពស់បែបនេះ?
ភាពអូសបន្លាយនៃប្រព័ន្ធធនាគារដំណើរការមិនបានល្អអស់រយៈពេលជាច្រើនឆ្នាំ ដែលជាហេតុនាំឲ្យប្រជាជនស្ទាក់ស្ទើរក្នុងការដាក់បញ្ញើនៅធនាគារ។ ជាក់ស្តែងនៅមីយ៉ាន់ម៉ាមិនទាន់មានផ្សារមូលបត្រនៅឡើយទេ ដូច្នេះជាទូទៅប្រជាជនមានជម្រើសតិចតួចសម្រាប់ការវិនិយោគ។ ដើម្បីទទួលបានផលចំណេញពីសាច់ប្រាក់ដែលមាននៅក្នុងដៃក្រៅពីការដាក់បញ្ញើរនៅធនាគារ ជម្រើសដ៏ល្អមួយក្នុងការវិនិយោគគឺការទិញដីនិងផ្ទះ។ នេះមិនត្រឹមតែជាជម្រើសវិនិយោគសម្រាប់ឯកជន ឬរូបវ័ន្តបុគ្គលទេតែជាការវិនិយោគលក្ខណៈនីតិបុគ្គលតែម្តង។ ទីប្រជុំជននៅទីក្រុងយ៉ាំងហ្គូនមានតម្លៃថ្លៃព្រោះ អាជីវកម្មដែលរកលុយបានច្រើនត្រូវការកន្លែងដែលមានមនុស្សច្រើនកើបប្រាក់ចំនេញ ហើយជាលទ្ធផលវាបានធ្វើឲ្យតម្លៃអចលនទ្រព្យកើនឡើងជាលំដាប់។
ខុសពីប្រទេសដទៃដែលការទិញអចលនទ្រព្យអាចធ្វើឡើងតាមបែបរំលស់ឬកម្ចី (ការទិញដោយជាប់បំណុល) តែមីយ៉ាន់ម៉ារាល់ការទិញអចលនទ្រព្យគឺត្រូវទូទាត់ជាសាច់ប្រាក់។ ក៏ដោយសារតែការទិញដូរត្រូវទូទាត់ជាសាច់ប្រាក់ផ្ទាល់ ដូចនេះវាគ្មានសម្ពាធអ្វីពីធនាគារឡើយនៅពេលដែលពួកគេចង់លក់ចេញវិញទេ។ គេក៏បានធ្វើការកត់សម្គាល់ផងដែរថា អ្នកដែលចង់លក់ដីឬផ្ទះមានការអត់ធ្មត់ណាស់ ព្រោះពួកគេមិនចង់ឲ្យមានការខាតបង់ដូច្នេះសុខចិត្តរង់ចាំរហូតដល់ពេលដែលទីផ្សារអចលនទ្រព្យផ្ទុះឡើងវិញទើបសម្រេចចិត្តលក់។ កត្តាទាំងនេះហើយទើបគេជឿជាក់ថាវាបានធ្វើឲ្យតម្លៃអចលនទ្រព្យនៅមីយ៉ាន់ម៉ាដូចជាពពុះសាប៊ូហើយមិនងាយធ្លាក់ចុះវិញទេ។
ទិដ្ឋភាពមួយទៀតនៃអចលនទ្រព្យមីយ៉ាន់ម៉ាដែលវិនិយោគិនបរទេសគួរតែយល់ គឺជាការរីករាលដាលនៃភ្នាក់ងារអចលនទ្រព្យនៅក្នុងប្រទេសនេះ ព្រោះនៅខ្វះក្រុមហ៊ុនក៏ដូចជាសាជីវកម្មធំៗប្រកបអាជីវកម្មនេះ គឺមានតែពីរបីក្រុមហ៊ុននៅឡើយទេ នេះជាឱកាសល្អដល់វិនិយោគិនបរទេសដែលគួរចាប់យក។ មិនតែប៉ុណ្ណោះសម្រាប់វិនិយោគិនបរទេសអាចនឹងងាយស្រួលស្វែងរកបុគ្គលិកដែលជាភ្នាក់ងារអចលនទ្រព្យ ពួកគេងាយនឹងចាប់អារម្មណ៍ជាមួយនឹងការងារដោយសារតែមានថ្លៃទឹកតែបន្ថែម ២%។
ហេតុផលមួយទៀតដែលថាអចលនទ្រព្យមានតំលៃថ្លៃគឺដោយសារតម្លៃរបស់វានៅក្នុងវប្បធម៌មីយ៉ាន់ម៉ា។ ប្រជាជនចង់បានសុវត្ថិភាពលើអចលនទ្រព្យ ប្រជាជនក៏យល់ដែរថាអចលនទ្រព្យនៅខ្វះខាតជាពិសេសនៅក្នុងទីក្រុងយ៉ាំងហ្គោន។ វិស័យអចលនទ្រព្យគឺទាក់ទាញអ្នកវិនិយោគដែលមើលឃើញអគារអាណានិគមចាស់ៗ នៅទីក្រុងយ៉ាំងហ្គោនហើយនិងគិតពីការបង្កើតសណ្ឋាគារឬកន្លែងទាក់ទាញ។ ស្ថាបត្យកម្មនៃទីក្រុងនេះគឺមានតែមួយគត់ ហើយមានកន្លែងសម្រាប់ទាក់ទាញអ្នកទេសចរថែមទៀតនៅក្នុងប្រទេសមីយ៉ាន់ម៉ា។ ទោះជាយ៉ាងណាយើងត្រូវប្រុងប្រយ័ត្ន ថាការវិនិយោគលើអគារអាណានិគមទាំងនេះគឺសម្រាប់វិនិយោគិនជាមួយហោប៉ៅជ្រៅលុយក្រាស់តែប៉ុណ្ណោះ។ អាគារទាំងនេះភាគច្រើនត្រូវបានហាមឃាត់ដោយរដ្ឋាភិបាល ហើយត្រូវបានប្រមូលផ្តុំដោយក្រុមហ៊ុនធុរកិច្ចមីយ៉ាន់ម៉ា។
អ្វីដែលគួរដឹងបន្ថែម ជនបរទេសគ្មានសិទ្ធិក្លាយជាម្ចាស់លើការកាន់កាប់ដី ខុនដូ អផាតមិន និងគ្រប់ប្រភេទនៃអចលនទ្រព្យនៅក្នុងប្រទេសមីយ៉ាន់ម៉ាឡើយ៕
ដោយ៖ យ៉ាយ៉ា
