បន្តិចទៀត! ខេត្តកែបនឹងក្លាយជាតំបន់ទេសចរណ៍សម្រាកលំហែកម្រិតខ្ពស់ ដើម្បីទាក់ទាញភ្ញៀវទេសចរ
ដើម្បីជំរុញឲ្យភ្ញៀវទេសចរអន្តរជាតិមកទស្សនាកម្សាន្តនៅកម្ពុជាកាន់តែច្រើន រាជរដ្ឋាភិបាលកម្ពុជាបានសម្រេចឱ្យក្រសួងទេសចរណ៍ដឹកនាំការសិក្សាអំពីការរៀបចំផែនការមេអភិវឌ្ឍខេត្តកែបរបស់កម្ពុជាឱ្យក្លាយទៅជា «តំបន់ទេសចរណ៍សម្រាកលំហែកម្រិតខ្ពស់» នេះបើតាមការលើកឡើងរបស់ឯកឧត្តម ថោង ខុន រដ្ឋមន្ត្រីក្រសួងទេសចរណ៍ ដែលការសម្រេចរបស់រាជរដ្ឋាភិបាលធ្វើឡើងក្នុងកិច្ចប្រជុំ «គណៈកម្មាធិការគោលនយោបាយសេដ្ឋកិច្ចនិងហិរញ្ញវត្ថុ» ដែលបានធ្វើឡើងកាលពីថ្ងៃទី១៨ ខែមេសា ឆ្នាំ២០១៩ កន្លងទៅ ក្រោមអធិបតីភាព ឯកឧត្តមបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ។
ការអភិវឌ្ឍខេត្តកែបឱ្យក្លាយទៅជាតំបន់ទេសចរណ៍សម្រាកលំហែកម្រិតខ្ពស់នេះ គឺរាប់បញ្ចូលទាំងទីក្រុង ឆ្នេរខ្សាច់ កោះ ផ្សារ កំពង់ផែទេសចរណ៍ ភូមិដ្ឋានប្រជាពលរដ្ឋ មូលដ្ឋានអាជីវកម្មសេវាកម្មទេសចរណ៍ ក៏ដូចជារមណីយដ្ឋានទេសចរណ៍នានាផងដែរ ប៉ុន្តែអាចនឹងមិនមានការបង្កើតឱ្យមាន «កាស៊ីណូ» និងរោងចក្រសហគ្រាសឡើយ។
ជាការពិតណាស់ ថ្វីត្បិតតែខេត្តកែបជាខេត្តតូចជាងគេមួយក៏ពិតមែន ប៉ុន្តែខេត្តនេះមានសក្ដានុពលខាងវិស័យទេសចរណ៍មិនធម្មតាឡើយ ពោលគឺ គុណភាពខ្យល់សមុទ្រ កោះទន្សាយ ផ្សារក្តាម ពិសេសនាពេលខាងមុខនេះ ក៏អាចនឹងមានកំពង់ផែទេសចរណ៍អន្តរជាតិតូចមួយទៀតផង៕
ដោយ៖ ជួប ស្រីរ័ត្ន
