គំនិតអាថ៌កំបាំងងាយៗ ទាំង ១០យ៉ាងដើម្បីក្លាយខ្លួនពីមនុស្សធម្មតាទៅជាសេដ្ឋី
ដើម្បីក្លាយខ្លួនពីជនសាមញ្ញធម្មតា ទៅជាសេដ្ឋីបាន អ្នកគប្បីឆ្លងកាត់ការតស៊ូនិងការលំបាកនានាច្រើនកម្រិតណាស់ក្នុងជីវិត។ វាទាមទារឲ្យអ្នកមានការអត់ធ្មត់និងអត់ធន់ ហើយហ៊ានជម្នះគ្រប់ឧបសគ្គទាំងពួង។ ហើយចំណុចខាងក្រោមនេះជាអាថ៌កំបាំងក្នុងការដឹងនាំអ្នកអោយទទួលបានជោគជ័យក្នុងជំនួញហើយក្លាយជាសេដ្ឋីអោយបានឆាប់៖
១) ត្រូវគិតឲ្យលើសពីអ្វីដែលអ្នកចង់បាន៖ មនុស្សជាច្រើនចង់ទទួលបានជោគជ័យសម្រាប់តែខ្លួនឯង ហើយព្យាយាមធ្វើអ្វីសម្រាប់តែបំពេញបំណងខ្លួនឯង។ ចុះហេតុអ្វីក៏មិនបើកគំនិតឲ្យទូលំទូលាយជាងនេះ? ប្រសិនបើអ្នកព្យាយាមគិតឲ្យលើសពីអ្វីដែលអ្នកចង់បាន អ្នកនឹងអាចវាស់ស្ទង់ពីសមត្ថភាពខ្លួនឯងថាវាខ្លាំងកម្រិតណាហើយ។
២) ដើរតាមអ្នកជំនាញ៖ សេដ្ឋីដែលជោគជ័យជាច្រើនតែងមានអ្នកជំនាញក្នុងការធ្វើការពិភាក្សាស្វែងរកយុទ្ធសាស្ត្រថ្មីៗ របស់ពួកគេ។ អ្នកក៏ដូច្នេះដែរ ការដើរតាមនិងការរៀនទទួលយកចំណេះដឹងពីអ្នកជំនាញទាំងនោះ នឹងផ្ដល់ជាគំនិតដែលជាបង្អែកដ៏សំខាន់សម្រាប់អ្នក។
៣) បង្កើតការងារជាប្រព័ន្ធដើម្បីបង្កើនអានុភាព៖ អ្នកមិនអាចធ្វើការងារអ្វីមួយបានដោយមានតែខ្លួនតែម្នាក់នោះទេ។ អ្នកត្រូវបង្កើតការងារជាប្រព័ន្ធមួយ សម្រាប់បង្កើនអានុភាពការងារទាំងនោះ។ វាជួយឲ្យអ្នកទទួលបានផលចំណេញទាំងពេលវេលា ទាំងកម្លាំង និងគុណភាព។
៤) ត្រូវមានជំនាញទីផ្សារនិងការលក់ដូរ៖ ជំនាញទាំងពីរនេះនឹងកាន់តែធ្វើឲ្យអ្នកកាន់តែខ្លាំងព្រោះ ការជំនាញទីផ្សារនេះអាចជាផ្នែកជួយផ្សព្វផ្សាយផលិតផលរបស់អ្នកទៅគ្រប់កន្លែង។ រីឯជំនាញលក់ដូរនេះគឺការនាំយកអតិថិជនឲ្យមកជាវផលិតផលរបស់អ្នក។
៥) ធ្វើការសម្រេចចិត្តឲ្យបានលឿន៖ ជារៀងរាល់ថ្ងៃ មនុស្សម្នាក់ៗ មានគំនិតច្រើនរាប់មិនអស់ ដែលជាហេតុធ្វើឲ្យគេពិបាកក្នុងការសម្រេចចិត្ត។ ប៉ុន្តែមនុស្សដែលមានៗជាច្រើនតែងធ្វើការសម្រេចចិត្តលឿន ព្រោះពួកគេដឹងពីខ្លួនឯងច្បាស់បំផុត។
៦) ត្រូវចេះរៀបចំអ្វីដែលសំខាន់សម្រាប់អ្នក៖ អ្វីដែលសំខាន់អ្នកត្រូវគិតនិងចាប់ផ្ដើមធ្វើវាឲ្យបានមុនគេ។ អ្នកត្រូវចេះលៃលកធ្វើយ៉ាងណាបំពេញការងារដែលសំខាន់បានមុនដោយមិនត្រូវឲ្យខាតបង់ពេលវេលា កម្លាំង និងថវិកា។
៧) ចំណាយពេលវេលាឲ្យកាន់តែមានប្រយោជន៍៖ ៩៨ភាគរយនៃប្រជាជនទូទៅក្នុងសកលលោកនេះចំណាយពេលវេលាចុងសប្ដាហ៍និងថ្ងៃសម្រាកសម្រាប់ដើរកម្សាន្ត។ តែដើម្បីក្លាយជាសេដ្ឋីអ្នកត្រូវហ៊ានលះបង់ការពេលខ្លះសម្រាប់ធ្វើអ្វីដែលមានប្រយោជន៍។
៨) ត្រូវចេះគិតពីអ្នកដទៃ៖ សេដ្ឋីជាច្រើនតែងធ្វើកិច្ចការដោយមិនគិតពីលុយ ព្រោះបើពួកគេគិតពីលុយ ពួកគេនឹងឈប់ធ្វើការហើយដេកចាយលុយដែលពួកគេនៅសល់បាត់ទៅហើយ។ តែនេះដោយសារតែពួកគេតែងគិតពីមនុស្សជុំវិញខ្លួន។
៩) ធ្វើការងារឲ្យកាន់តែប្រសើរ៖ ប្រសិនបើអ្នកចង់ធ្វើឲ្យពិភពលោកនេះកាន់តែប្រសើរអ្នកត្រូវ ទទួលយកចំណេះដឹងអោយបានច្រើន ហើយព្យាយាមអភិវឌ្ឍខ្លួនឯងឲ្យប្រសើរជាងនេះ។
១០) ត្រូវទទួលយកការឆ្លើយតបពីអ្នកដទៃ៖ ការទទួលយកការឆ្លើយតបនិងមតិអ្នកដទៃនឹងជួយឲ្យអ្នកកាន់តែរីកចម្រើនក្នុងការធ្វើអ្វីមួយ៕
ប្រែសម្រួល៖ ព្រំ សុវណ្ណកណ្ណិកា
