លោកWarren Buffett៖ រស់នៅឲ្យសាមញ្ញ និងវិនិយោគលើខ្លួនឯង
មហាសេដ្ឋីអាមេរិក Warren Buffett ដែលត្រូវបានគេដាក់រហស្សនាមថា ជាកំពូលអ្នកវិនិយោគដ៏ជោគជ័យបំផុតនៅលើពិភពលោកបានផ្តល់ដំបូន្មានដល់មនុស្សទូទៅថា អ្នកគួររៀនរស់នៅឲ្យសាមញ្ញ និងវិនិយោគលើខ្លួនឯងឲ្យបានច្រើនបំផុត។
ដោយមានទ្រព្យសម្បត្តិប្រមាណជិត ៨៣ ពាន់លានដុល្លារ មហាសេដ្ឋីវ័យ ៨៨ ឆ្នាំរូបនេះបានលើកឡើងពីបទពិសោធន៍ផ្ទាល់ខ្លួនរបស់លោកពីរបៀបដែលលោករស់នៅក្នុងជីវិតដ៏សាមញ្ញបើទោះបីជាលោកជាមហាសេដ្ឋីក៏ដោយ។ មកដល់ពេលនេះ លោកនៅតែរស់នៅក្នុងផ្ទះតម្លៃ ៣១ ៥០០ ដុល្លារមួយដែលលោកធ្លាប់បានទិញតាំងពីឆ្នាំ ១៩៧៥ ហើយលោកកម្រទិញរថយន្តថ្មីៗណាស់។ លោកទទួលទានអាហារពេលព្រឹកដែលមានលក់នៅហាង McDonald នៅតាមផ្លូវលោកទៅធ្វើការ។
យ៉ាងណាមិញ នៅក្នុងបទសម្ភាសន៍មួយទៅកាន់ទស្សនាវដ្ដី Forbes លោកបានលើកយកពីដំបូន្មានមួយទៀតដែលលោកចាត់ទុកថា ជាការវិនិយោគយ៉ាងមានតម្លៃបំផុតនោះ គឺការ "វិនិយោគលើខ្លួនឯង”។ លោកបានបន្តថា បើអ្នកខ្សោយខាងអ្វី អ្នកត្រូវកែលំអចំណុចខ្សោយនោះឲ្យបាន ហើយសម្រាប់រូបលោកផ្ទាល់ លោកយល់ថា ការនិយាយជាសាធារណៈគឺជាចំណុចខ្សោយបំផុតមួយដែលលោកធ្លាប់ជួប ហើយទីបំផុតលោកបានធ្វើឲ្យវាប្រសើរឡើង។
លោកបានបញ្ជាក់ដូច្នេះថា៖« គ្មាននរណាម្នាក់អាចយកអ្វីដែលមាននៅក្នុងខ្លួនអ្នកឡើយ ហើយមនុស្សម្នាក់ៗ សុទ្ធតែមានសក្ដានុពលដែលមិនទាន់បានប្រើប្រាស់។ ប្រសិនបើអ្នកអាចបង្កើនសក្ដានុពលរបស់អ្នក ១០% ២០% ឬ ៣០% សមត្ថភាពរបស់អ្នកកាន់តែខ្លាំង ហើយរដ្ឋក៏មិនអាចយកពន្ធពីទេពកោសល្យរបស់អ្នកបានដែរ។ កំណើនអតិផរណាក៏មិនអាចធ្វើអីអ្នកបានដែរ។ វានៅតោងខ្លួនអ្នកពេញមួយជីវិត»។
មហាសេដ្ឋីរូបនេះក៏បានបង្ហាញពីរបៀបធ្វើឲ្យជីវិតរបស់លោកមានតម្លៃតាមរយៈការចែករំលែកនូវក្តីស្រលាញ់ឲ្យបានច្រើនទៅកាន់មនុស្សជាទីស្រលាញ់របស់លោក និងមិត្តភ័ក្ដិជាដើម។ ប៉ុន្តែលោកមិនបានយកទ្រព្យសម្បត្តិរបស់លោកទៅធ្វើជានុយដើម្បីទាក់ទាញក្តីស្រលាញ់ពីមនុស្សទាំងនោះឡើយ។ ផ្ទុយទៅវិញ លោកបានយកក្តីស្រលាញ់ប្រកបដោយភាពស្មោះត្រង់របស់លោកទៅកាន់មនុស្សទាំងនោះជាថ្នូរនឹងការទទួលបានការគោរព និងការស្រលាញ់រាប់អានមកវិញ៕
ប្រភព៖ Entrepreneur
