គ្រប់សហគ្រិនទាំងអស់គួរបង្កើតដំណើរកម្សាន្ត ៣ ប្រភេទនេះ
ដោយសារតែសហគ្រិនទូទៅមិនសូវមានពេលទំនេរ ជាប់រវល់នឹងការងារស្ទើររកថ្ងៃសម្រាកមិនបាន ដូច្នេះការចំណាយពេលធ្វើអ្វីផ្សេងក្រៅពីមុខជំនួញរបស់ខ្លួន ហាក់ដូចជាមានការលំបាកបន្តិច។ ពួកគេនឹងមានអារម្មណ៍ថា ហាក់បីដូចជាមានកំហុសឆ្គងដែលទៅចំណាយពេលដើរកម្សាន្តយ៉ាងរំភើយ ស្របពេលដែលខ្លួនកំពុងមមាញឹកទៅនឹងកិច្ចការជំនួញនៅក្នុងដៃ។
យ៉ាងណាក៏ដោយ ប្រសិនបើអ្នកជាសហគ្រិន អ្នកគួរស្វែងយល់បន្តិចថា សុខភាពគឺជារឿងសំខាន់ជាងអ្វីៗទាំងអស់។ មិនថាជំនួញរបស់អ្នកអាចរកលុយបានរាប់លានដុល្លារយ៉ាងណាក៏ដោយ ការដែលមានសុខភាពល្អ គឺមានតម្លៃជាងនេះឆ្ងាយណាស់។ ហេតុដូច្នេះហើយអ្នកគួរតែធ្វើអ្វីម្យ៉ាងដូចជារៀបចំដំណើរកម្សាន្តប្រភេទផ្សេងៗខាងក្រោមនេះដើម្បីសុខភាពផ្លូវកាយ និងផ្លូវចិត្តរបស់អ្នកនៅពេលអ្នកមានអារម្មណ៍ស្មុគស្មាញនឹងការងារ។
១. ដំណើរកម្សាន្តសម្រាប់ខ្លួនឯង
ការមានគម្រោងដើរកម្សាន្តសម្រាប់ខ្លួន គឺជារឿងសំខាន់មួយនៅក្នុងជីវិតជាសហគ្រិន។ អ្នកមិនចាំបាច់ទៅខ្វាយខ្វល់ច្រើនទៅនឹងអ្នកផ្សេងដូចជានាំមិត្តភក្ដិ បងប្អូន ឬគ្រួសារថា តើពួកគេត្រូវការកន្លែងកម្សាន្តរបៀបណា? ទៅនៅពេលណា? ឬត្រូវផ្គាប់ផ្គន់ពួកគេដោយរបៀបណានោះទេ? អ្វី ដែលសំខាន់អ្នកត្រូវធ្វើឲ្យដំណើរកម្សាន្តប្រភេទនេះស្របតាមអ្វីដែលអ្នកចង់បាន ទីកន្លែងដែលអ្នកចង់ទៅ។ មិនថា ដើរកម្សាន្តជាមួយមិត្តភក្ដិ ឬតែម្នាក់ឯង អ្នកត្រូវរកឲ្យបានគុណតម្លៃពីដំណើរកម្សាន្តនេះសម្រាប់ខ្លួនឯងឲ្យបានច្រើនបំផុត។
២. ដំណើរកម្សាន្តជាមួយគូស្នេហ៍របស់អ្នក
នៅក្នុងទំនាក់ទំនងដ៏ផ្អែមល្ហែមមួយ ការបង្កើតបទពិសោធន៍ ឬ អនុស្សាវរីយ៍ល្អជាមួយគ្នាគឺបានក្លាយជាមូលដ្ឋានគ្រឹះរួចទៅហើយដើម្បីធ្វើឲ្យទំនាក់ទំនងនេះកាន់តែរឹងមាំគងវង់បន្តទៅទៀត។ ដូច្នេះ ការរៀបចំគម្រោងដំណើរកម្សាន្តជាមួយមនុស្សជាទីស្រឡាញ់របស់អ្នកទៅកាន់កន្លែងណាមួយដែលអ្នកទាំងពីរចង់ ទៅ នឹងជំរុញឲ្យសុខភាពស្នេហា និងការងាររបស់អ្នកដើរទៅមុខយ៉ាងរលូនផងដែរ។ សហគ្រិនដែលទើបមានស្នេហាថ្មីថ្មោង ឬទើបចាប់ផ្តើមកសាងគ្រួសារ គួរបង្កើតដំណើរកម្សាន្តឲ្យបានច្រើនដើម្បីទទួលបានបទពិសោធន៍ថ្មីៗ ហើយអ្នកទាំងពីរអាចចាប់ផ្តើមរៀនស្គាល់តម្លៃគ្នា តម្រូវការ ចំណង់ចំណូលចិត្ត និងយកពេលនេះ មកពិភាក្សាជជែកពីផែនការគ្រួសារ ឬអាជីវកម្មជាដើម។
៣. ដំណើរកម្សាន្តជាលក្ខណៈគ្រួសារ
ក្រៅពីដំណើរកម្សាន្តសម្រាប់ខ្លួនឯង និងជាមួយដៃគូរបស់អ្នក ការមានធ្វើដំណើរកម្សាន្តជាលក្ខណៈគ្រួសារ ក៏ជារឿងសំខាន់ផងដែរ។ អ្នកមិនចាំបាច់ធ្វើអ្វីដដែលប្លែកច្រើនពេកនោះទេ ពោលគឺការផ្លាស់ប្ដូរបរិយាកាសតាមរយៈការជួបជុំគ្រួសារនឹងផ្តល់ឱកាសឲ្យអ្នកបង្កើតការចងចាំអស់មួយជីវិតជាមួយមនុស្សដែលសំខាន់បំផុតនៅក្នុងជីវិតរបស់អ្នក និងបារម្ភពីអ្នកបំផុត។ ថ្វីត្បិតតែសមាជិកគ្រួសារពេលខ្លះមិនមែនជាដៃគូជំនួញធំនៅក្នុងការងាររបស់អ្នក ក៏ប៉ុន្តែពួកគេគឺជាមនុស្សជាអ្នកចាំជួយលើកទឹកចិត្តអ្នកនៅ ពេលអ្នកបរាជ័យ។ ជាមនុស្សដែលស្គាល់សុខទុក្ខរបស់អ្នក យល់ពីជម្រៅចិត្តរបស់អ្នក។ ដូច្នេះអ្នកគួររៀបចំដំណើរកម្សាន្តបែបនេះសម្រាប់ធ្វើ ជាកាដូជូនពួកគេ៕
ប្រភព៖ Entrepreneur
