មូលហេតុនេះសោះដែលធ្វើឲ្យសហស្ថាបនិក Arrowdot រួមគ្នាបង្កើតក្រុមហ៊ុនភ្លាមក្រោយពីរៀនចប់
បើនិយាយពីការបើកអាជីវកម្មឬបង្កើតក្រុមហ៊ុនមួយ មនុស្សភាគច្រើនច្បាស់ជាយល់ថាត្រូវមានបទពិសោធន៍ការងារច្រើនឆ្នាំសិនទើបអាចធ្វើឲ្យអាជីវកម្មមួយដំណើរការទៅមុខបានដោយរលូន ផ្ទុយទៅវិញ នៅក្នុងកិច្ចសម្ភាសន៍ជាមួយBizkhmer សហស្ថាបនិកវ័យក្មេងនិងជានាយកប្រតិ្តបត្តិក្រុមហ៊ុន Arrowdot លោក លឹម សង្វារ បានប្រាប់ថា លោកនិងសហស្ថាបនិកផ្សេងទៀតបានសម្រេចចិត្តបង្កើតក្រុមហ៊ុននេះតែម្ដងបន្ទាប់ពីបញ្ចប់ការសិក្សាថ្នាក់ឧត្តមសិក្សាភ្លាម។
នាយកប្រត្តិបត្តិវ័យក្មេងរូបនេះបានប្រាប់ថា មុនពេលសម្រេចចិត្តបង្កើតក្រុមហ៊ុននេះលោករួមជាមួយនិងសហស្ថាបនិកដទៃទៀតបានត្រៀមខ្លួនរយៈពេល៣ឆ្នាំមកហើយ ពោលគឺបានចងគ្នាជាក្រុមចាប់តាំងពីកំឡុងពេលនៅសិក្សាថ្នាក់ឧត្តមមកម្លេះ។ លោក សង្វារ បន្តថា ក្នុងកំឡុងពេលនោះពួកលោកបានសិក្សាស្រាវជ្រាវយ៉ាងច្រើនទាក់ទងនឹងផ្នែកបច្ចេកវិទ្យាប្រព័ន្ធបញ្ជាស្វ័យប្រវត្ត (Automation Robotics) ដូច្នេះនៅពេលដែលបើកក្រុមហ៊ុន គឺពួកលោកមានគ្រឹះមាំទៅហើយ។
បន្ថែមពីលើមូលហេតុទាំងនេះក៏នៅមានមូលហេតុចម្បងមួយទៀតដែលជម្រុញឲ្យក្រុមស្ថាបនិកសម្រេចចិត្តបង្កើតក្រុមហ៊ុន Arrowdotនេះឡើងគឺ ពួកគាត់មានចក្ខុវិស័យសម្លឹងឃើញថានាថ្ងៃអនាគតប្រទេសកម្ពុជានិងមានការរីកច្រើនផ្នែកឧស្សាហកម្ម ដូច្នេះគឺពិតជាត្រូវការចាំបាច់នៅក្រុមហ៊ុនក្នុងស្រុកមួយដើម្បីបម្រើនៅសេវាកម្មទាំងនោះ។
ក្រុមហ៊ុន Arrowdot បានបង្កើតឡើងក្នុងឆ្នាំ២០១២ ដោយកំឡុងពេលចាប់ផ្ដើមគឺមានត្រឹមតែសមាជិក៤រូបប៉ុណ្ណោះ ក្នុងនោះមានស្ថាបនិកពីររូប ដោយឡែកនាពេលបច្ចុប្បន្នមានបុគ្គលិកចំនួន១០នាក់។ បើទោះជានៅពេលចាប់ផ្ដើមដំបូងក្រុមហ៊ុនធ្លាប់ជួបប្រទះបញ្ហាលំបាកច្រើន ប៉ុន្តែដោយសារតែជាក្រុមហ៊ុនថ្មីនិងដំបូងគេនៅកម្ពុជាដែលអាចង្កើតប្រព័ន្ធបច្ចេកវិទ្យាដែលគេស្ទើរតែមិនជឿថាកូនខ្មែរអាចធ្វើបាន ទើបធ្វើឲ្យមានការលើកតម្កើង និងទទួលស្គាល់ច្រើនឡើងៗពីមជ្ឈដ្ឋានជុំវិញ។
គួរបញ្ជាក់ផងដែរថា ក្រុមហ៊ុនArrowdotគឺជាក្រុមហ៊ុនបច្ចេកវិទ្យាដំបូងគេនៅកម្ពុជាដែលធ្វើការទាក់ទងនឹងប្រព័ន្ធបញ្ជាស្វ័យប្រវត្តិ ឬ Automation Robotics ដែលកន្លងមកក្រុមហ៊ុនទទួលបានគម្រោងក្នុងការដំឡើងនិងដោះស្រាយបញ្ហានានាក្នុងរោងចក្រប្រមាណជាង២០០គម្រោងមកហើយ៕
អត្ថបទដោយ៖ ជួប ស្រីរ័ត្ន
