វីរសិល្បៈការិនីលោកស្រី ឌី សាវ៉េត៖ ការតស៊ូរបស់សិល្បៈករចាស់ព្រឹទ្ធាចារ្យគឺជាគំរូសម្រាប់កូនចៅជំនាន់ក្រោយ
លោកស្រី ឌី សាវ៉េត គឺជាសិល្បៈការិនីរៀមច្បងមួយរូបដែលបានឆ្លងកាត់ជីវិតក្នុងវិស័យសិល្បៈជាតារាភាពយន្តតាំងពីទសវត្សរ៍ឆ្នាំ១៩៦០ លុះដល់ ឆ្នាំ១៩៧៥ ជាសម័យនៃរបបប្រល័យពូជសាសន៍ប៉ុលពតធ្វើឲ្យលោកស្រីនិងសិល្បៈករផ្សេងទៀតត្រូវបានផ្អាកការសម្ដែង។ ក្រោយពីសង្រ្គាមបានបញ្ចប់ វីរសិល្បៈការិនីឆ្នើមរូបនេះបានបន្តចាប់អាជីពជាតារាភាពយន្តក្នុងឆ្នាំ១៩៩៣និងទទួលបានប្រជាប្រិយភាពនិងការគាំទ្ររហូតមកដល់ពេលបច្ចុប្បន្ន។
តួអង្គឆ្នើមក្នុងរឿង "ទឹកចិត្តម្ដាយ" រូបនេះបានបង្ហាញនូវអាម្មណ៍រំភើបនិងរីករាយ ចំពោះវត្តមាននៃការចូលរួមយ៉ាងច្រើនកុះករជាពិសេសពីសំណាក់យុវជនក្នុងកម្មវិធី "មាគ៌ាបញ្ញាវន្ត" កាលថ្ងៃអាទិត្យម្សិលមិញមជ្ឈមណ្ឌលប្រតិបត្តិការណ៍កម្ពុជាជប៉ុន CJCC ដែលនេះជាការបង្ហាញនូវការឲ្យតម្លៃ គោរពស្រលាញ់ និងការចងចាំចំពោះវីរសិល្បៈករចាស់ព្រឹទ្ធាចារ្យ។ ជាមួយគ្នានេះដែរ លោកស្រីក៏បានបង្ហើបនូវសារផ្ដាំផ្ញើរមួយឃ្លាដល់ក្មេងជំនាន់ក្រោយថា "ការតស៊ូរបស់សិល្បៈករចាស់ព្រឹទ្ធាចារ្យគឺជាគំរូសម្រាប់កូនចៅជំនាន់ក្រោយ"។
ក្នុងន័យនៃការផ្ដាំផ្ញើរនេះលោកស្រីចង់បង្ហាញថា សិល្បៈករជំនាន់មុនពួកបានហែលឆ្លងនូវរឿងរ៉ាវលំបាកខ្លាំងណាស់ទម្រាំនិងមានថ្ងៃនេះ ពីព្រោះថាសិល្បះៈមិនមែនជារឿងងាយស្រួលនោះទេ តាំងពីការច្រៀង ការសម្ដែង ការរាំ សិល្បៈភ្លេង និងចាប៉ី គឺសុទ្ធតែមិនស្រួលនោះទេ គឺពួកគាត់ត្រូវតស៊ូតាំងពីក្មេងរហូតដល់ចំណាស់នេះ បើសិនជាពួកគាត់មិនតស៊ូទេសិល្បៈទាំងនេះប្រហែលជាបាត់បង់តាំងពីពាក់កណ្ដាលទីមកម្លេះ។
សិល្បៈការិនីជើងចាស់រូបនេះបានបន្តថា សិល្បៈករចាស់ៗពួកគាត់មិនដែលត្អូញត្អែរទេ ហើយក៏មិនដែលធ្វើឫកធ្វើពាអួតអាងថាខ្លួនជាអ្នកល្បីនោះដែរ ដូច្នេះការតស៊ូរបស់ពួគយើងគឺចង់ធ្វើជាគំរូដល់ក្មេងៗជំនាន់ក្រោយបានយល់ដឹងនិងយកគំរូតាម ជៀសវាងការទិតៀនពីមនុស្សនៅជុំវិញខ្លួន៕
អត្ថបទដោយ៖ ជួប ស្រីរ័ត្ន
