ហេតុផល ៤ បញ្ជាក់ថា ការធ្វើការឲ្យគេមិនអាចឲ្យអ្នកក្លាយជាអ្នកមានបាន
មនុស្សភាគច្រើនបានលះបង់ពេលវេលាស្ទើរតែពេញមួយជីវិតរបស់ខ្លួនដើម្បីធ្វើការឲ្យអ្នកដទៃជាថ្នូរនឹងការទទួលបានប្រាក់ខែត្រឡប់មកវិញ។ ក៏ប៉ុន្តែប្រាក់ខែទាំងនោះ មិនបានជួយអ្វីច្រើនដល់ពួកគេនោះឡើយ ខណៈដែលថៅកែ ឬម្ចាស់ក្រុមហ៊ុនរបស់ខ្លួនកាន់តែមានៗឡើង។ តើនេះដោយសារអ្វី?
វាមានហេតុផលជាច្រើនដែលនៅពីក្រោយប្រធានបទនេះ។ ប៉ុន្តែថ្ងៃនេះ សូមលើកយកហេតុផលចំនួន ៤ ធំសំខាន់ៗដែលបញ្ជាក់ថា ហេតុអ្វីបានជាធ្វើការឲ្យគេមិនអាចឲ្យអ្នកក្លាយជាអ្នកមានបាន?
១.ងាយជួបហានិភ័យ បញ្ហារបស់អ្នកគឺថា អ្នកមានការងារធ្វើមានន័យថា អ្នកមានប្រាក់ចំណូល។ អ្នកអាចយកប្រាក់ចំណូលនោះទៅ ទូទាត់លើការចំណាយរបស់អ្នក។ វាមើលទៅជីវភាពរបស់អ្នកពិតជាពោរពេញទៅដោយភាពកក់ក្តៅ ហើយ ក៏មិនចាំបាច់ផ្លាស់ប្ដូរអ្វីទាំងអស់។ ប៉ុន្តែរឿងដ៏គួរឲ្យអាណិតនោះគឺថា អ្នកប្រហែលជាសេសសល់ប្រាក់តិចតួចប៉ុណ្ណោះសម្រាប់សន្សំនៅចុងខែនីមួយៗ។ ដូច្នេះ តើអ្នកត្រូវការពេលប៉ុន្មានទើបអាចសន្សំប្រាក់បានរាប់ម៉ឺនដុល្លារដូចគេ? ឧទាហរណ៍ថា អ្នកបាត់បង់ការងារធ្វើ អ្នកសាកគិតទៅមើលតើនឹងមានអ្វីកើតឡើង? ចង់បានប្រាក់ខែអ្នកត្រូវតែធ្វើការ។ បើអ្នកមិនធ្វើការទេ អ្នកនឹងធ្លាក់ចូលវិបត្តិហិរញ្ញវត្ថុ។
២.អ្នកកំពុងជួយកសាងទ្រព្យសម្បត្តិឲ្យអ្នកដទៃ សូមចាំថា នៅពេលអ្នកធ្វើការឲ្យនរណាម្នាក់ នោះមានន័យថា អ្នកកំពុងជួយអ្នកនោះឲ្យកាន់តែមានៗឡើង។ វាមិនខុសទេដែលអ្នកបានជួយអ្នកទាំងនោះ និងមានការងារធ្វើសម្រាប់ខ្លួនឯង។ ប៉ុន្តែបើអ្នកចង់មាន រឿងនេះគឺជាបញ្ហាដែលធ្វើឲ្យខ្លួនឯងពិបាកនឹងងើបផុតពីភាពទីទាល់។ អ្នកអាចគិតលេងៗបានថា អ្នកត្រូវចំណាយពេលយ៉ាងហោចណាស់ក៏ ៤០ ម៉ោងក្នុងមួយសប្តាហ៍ដើម្បីធ្វើការឲ្យ អ្នកដទៃ។ ដូចនេះតើអ្នកមានបានចំណាយពេលដើម្បីខ្លួនឯងដែរឬទេ? តើអ្នកបានចំណាយពេលធ្វើអ្វីដែលអ្នកស្រលាញ់ដែរឬទេ? សាកស្រមៃទៅមើល៍ថា បើអ្នកយកពេល ៤០ ម៉ោងមកធ្វើការឲ្យខ្លួនឯង តើអ្នកចំណេញបានអ្វីខ្លះ? បើអ្នកធ្វើការឲ្យខ្លួនឯងអ្នកចំណេញទាំងចំណេះដឹងលើមុខរបរជំនួញរបស់អ្នក និងបង្កើនទ្រព្យឲ្យខ្លួនឯងទៀតផង។
៣.ពេលវេលាមានតម្លៃជាងលុយ តើអ្នកមានធ្លាប់ឮពាក្យមួយឃ្លាគេនិយាយថា “អ្នកអាចរកលុយបន្ថែមបាន តែមិនអាចរកពេលវេលាបន្ថែមបានទេ”។ ពាក្យមួយឃ្លានេះមានន័យគ្រប់គ្រាន់ក្នុងការបញ្ជាក់ប្រាប់ឲ្យអ្នកដឹងថា លុយដែលបាត់បង់ទៅហើយ អ្នកអាចរកលុយមកវិញបាន សន្សំលុយបានកាន់តែច្រើន។ ប៉ុន្តែក្នុងមួយថ្ងៃអ្នកមានតែ ២៤ ម៉ោងប៉ុណ្ណោះ ហើយពេលវេលាដែលបាត់បង់ទៅហើយ អ្នកមិនអាចយកមកវិញបានទេ។ ដូចបានលើកឡើងនៅខាងលើ អ្នកបានលក់ពេលវេលាទៅឲ្យអ្នកដទៃជាថ្នូរនឹងបានប្រាក់ខែមកវិញ។ អ្នកត្រូវយកពេលទៅធ្វើការតាមការបង្គាប់បញ្ជារបស់អ្នកដទៃ និងផលប្រយោជន៍ធ្លាក់មកលើអ្នកដទៃ។ តើអ្នកមានសេរីភាពដែរឬទេ? ចម្លើយច្បាស់ជាមិនមាននោះទេ។ យ៉ាងណាមិញ ប្រសិនបើអ្នកធ្វើការឲ្យខ្លួនឯង ច្បាស់ណាស់ថា អ្នកចង់សម្រាកពេលណាក៏បាន ពោលគឺមានសេរីភាពពេញទី ពីព្រោះអ្វីៗគឺការសម្រេចចិត្តរបស់អ្នក។
៤.ធ្វើការឲ្យគេ អ្នកនឹងផ្ដោតលើការសន្សំជាសំខាន់ ការសន្សំប្រាក់គឺជាវិធីល្អមួយដែរសម្រាប់ជីវិតអ្នកធ្វើការឲ្យគេ ហើយស្តាប់ទៅដូចជាសមហេតុផលដែរប្រសិនបើអ្នកចង់មាន។ ប៉ុន្តែសូមចាំថា ការសន្សំប្រាក់មិនអាចធ្វើឲ្យលុយនោះធ្វើចលនាបានទេ (លុយមិនអាចបង្កើតលុយបាន)។ កាត់បន្ថយទិញកាហ្វេ ៥ កែវក្នុងមួយសប្តាហ៍មកត្រឹមចំនួន ១ កែវក្នុងមួយសប្តាហ៍ លុយដែលអ្នកកាត់បន្ថយនោះ អាចរកកាហ្វេឲ្យបាន៤ កែវទៀតដែរឬទេ? ប្រសិនបើអាច មានន័យថា អ្នកជាអ្នកលក់កាហ្វេ។ បើអ្នកជាអ្នកលក់កាហ្វេ មានន័យថា អ្នកចេះ ប្រើលុយឲ្យរកលុយហើយ។ ដូច្នេះមានន័យថា លុយចេះតែកើននៅពេលដែលអ្នកចេះយកវាទៅវិនិយោគ មិនមែនទុកសន្សំមួយកន្លែងនោះទេ។ ចំណុចនេះហើយដែរថា ប្រសិនបើអ្នកមានជំនួញក្នុងដៃ មិនយកពេលវេលាទៅធ្វើការឲ្យគេ ឬអង្គុយចាំបើកប្រាក់ខែ អ្នកនឹងមានឱកាសច្រើនក្លាយជាអ្នកមាន៕
ប្រភព៖ Lifehack
