Jack Ma និយាយថា៖ ចង់ជោគជ័យ អ្នកមិនចាំបាច់ចេះច្រើននោះទេ តែអ្នកចាំបាច់ត្រូវមានរបស់មួយនេះ
លោក Jack Ma ត្រូវបានគេចាត់ទុកថា ជាមហាសេដ្ឋីរបស់ចិនដ៏ល្បីល្បាញមួយរូបនៅពេលបច្ចុប្បន្ននេះ។ ដោយបានធ្លាប់ជួបខ្សែជីវិតមិនល្អ និងមានរូបរាងមិនសូវអំណោយផលពីធម្មជាតិផងនោះ អ្នកជំនួញ រូបនេះធ្លាប់ធ្វើជាគ្រូបង្រៀនអង់គ្លេសដែលទទួលបានប្រាក់ចំណូលត្រឹមតែ ១២ ដុល្លារក្នុងមួយខែ មុនពេលលោកបង្កើតក្រុមហ៊ុន យក្សដ៏ជោគជ័យមួយគឺ Alibaba នៅក្នុងឆ្នាំ ១៩៩៩។
ដោយសារតែលោកបានប្រែក្លាយខ្លួនពីប្រជាជនក្រីក្រសាមញ្ញមកជាមហាសេដ្ឋី ហើយទើបមានសំនួរជាច្រើនជាពិសេសពីសហគ្រិនដែលបានចោទសួរលោកនៅរាល់ពេលដែលលោកបង្ហាញ ខ្លួននៅលើវេទិកាសាធារណៈ។ សំនួរមួយក្នុងចំណោមសំនួរទាំងនោះគឺថា តើលោកមានអាថ៌កំបាំងអ្វីដែរឬទេនៅពីក្រោយភាពជោគជ័យរបស់លោក? នៅពេលលោកកំពុងមានវត្តមានក្នុងវេទិកាសេដ្ឋកិច្ចពិភពលោកមួយ (World Economic Forum) កាលពីឆ្នាំកន្លងទៅ លោក Jack Ma បានថ្លែងដូច្នេះថា៖«មុនដំបូងខ្ញុំអត់ដឹងថា បច្ចេកវិទ្យាហ្នឹងស្អីគេទេ។ ហើយខ្ញុំក៏មិនដឹងដែរថា ការគ្រប់គ្រងហ្នឹងវាជាអីដែរ។ ប៉ុន្តែរឿងគឺនៅត្រង់ថា អ្នកមិនចាំបាច់ចេះទាំងអស់នោះទេ។ អ្នកត្រូវរកមនុស្សដែលឆ្លាតជាងអ្នក។ អស់រយៈពេលជាច្រើនឆ្នាំមកហើយ ខ្ញុំតែងតែព្យាយាមរកមនុស្សឆ្លាតជាងខ្ញុំ មកធ្វើការឲ្យខ្ញុំ»។
លោកបានបន្តថា៖ «នៅពេលអ្នករកមនុស្សឆ្លាតបានមកធ្វើការ ការងារបន្ទាប់របស់អ្នកគឺត្រូវប្រាកដថា អ្នកឆ្លាតៗទាំងនោះអាចធ្វើការជាមួយគ្នាបាន»។ មកដល់ត្រង់ចំណុចនេះ លោក Jack Ma បានផ្តល់ដំបូន្មានដែលជាមូលដ្ឋានគ្រឹះដ៏សំខាន់ដែលអ្នកត្រូវធ្វើចំនួន ២ ជំហានគឺ៖
១.ជួលមនុស្សដែលឆ្លាតជាងអ្នកមកធ្វើការឲ្យ អ្នក
២.ផ្ដោតទៅលើការដឹកនាំបុគ្គលិកឆ្លាតៗទាំងនោះឲ្យមកធ្វើការជាក្រុម។
ដំបូន្មានរបស់លោក Jack Ma ត្រូវបានគេចាត់ទុកថា គឺជាទស្សនៈដ៏មានតម្លៃ និងមានឥទ្ធិពលបំផុតមួយសម្រាប់ផ្តល់ភាពជាគំរូដល់ថ្នាក់ដឹកនាំទាំងស្ថាប័នរដ្ឋ និងឯកជន ជាពិសេសសហគ្រិនក្មេងៗដើម្បីយកទៅពិចារណាសិក្សារៀនសូត្របន្ថែមទៀត។ ភាពជាគំរូមួយក្នុងចំណោមភាពជាគំរូផ្សេងៗទៀតរបស់លោកគឺភាពជាគ្រប់គ្រងល្អនូវអ្វីដែលលោកចាត់ទុកថា នឹងនាំ មកនូវភាពជោគជ័យដល់ស្ថាប័ន។
ចុចអានអត្ថបទ៖ មហាសេដ្ឋី Jack Ma និយាយថា មានកំហុសមួយនេះអាចធ្វើឲ្យអាជីវកម្មថ្មីថ្មោងស្លាប់ទៅវិញ
ហេតុអ្វីបានជាអ្នកគ្រប់គ្រង ល្អនាំមកនូវភាពជោគជ័យ?
រឿងជាក់ស្តែងគឺនៅពេលអ្នកជួលបុគ្គលិកល្អបំផុតមកធ្វើការ សូមចាត់ចែងគ្រប់គ្រងពួកគេឲ្យធ្វើការជាក្រុម។ ការធ្វើការងារជាក្រុម បុគ្គលិកម្នាក់ៗនឹងមានផ្នត់គំនិត របៀបធ្វើការ ទស្សនៈ និងមធ្យោបាយដើម្បីឲ្យគម្រោងការងារទទួលបានជោគជ័យដោយរបៀបណា។ ប៉ុន្តែបញ្ហានៅត្រង់ថា មានបុគ្គលិកកំពូលៗទាំងនោះតែងតែប្រកាន់ផ្នត់គំនិតមួយជាប់ហ្នឹងខ្លួននោះគឺខ្លួនឯងជាធំ។ ដោយសារតែពួកគេមានបទពិសោធន៍ជោគជាំនឹងភាពជោគជ័យ និងមានគំនិតរឹងមាំរៀងៗខ្លួនពីមុនមកនេះហើយទើបធ្វើឲ្យពួកគេម្នាក់ៗពិបាកធ្វើការជាមួយគ្នា និងពិបាកគាំទ្រទស្សនៈគ្នាទៅវិញទៅមក។ ពេលខ្លះទៀតពួកគេមានអារម្មណ៍ទៀតថា ខ្លួនគឺជាគូប្រជែងជាមួយបុគ្គលិកដូចគ្នានៅក្នុងក្រុមហ៊ុន ហើយទីបំផុតវាមិនមែនជាការធ្វើការជាក្រុម តែវាជាសង្គ្រាមការការពារខ្លួននៅក្នុងក្រុមហ៊ុន និងប៉ែងជើងគ្នាទៅវិញ។ ប៉ុន្តែបើនិយាយពីអ្នកគ្រប់គ្រងល្អវិញ អាចធ្វើឲ្យទិដ្ឋភាពនេះចេញ ជាលទ្ធផលផ្សេង។ អ្នកគ្រប់គ្រងល្អគឺជាអ្នកដែលដឹងយ៉ាងច្បាស់ថា អ្វីជាចំណុចខ្លាំង និងចំណុចខ្សោយរបស់ក្រុមការងារ។
អ្នកគ្រប់គ្រងល្អនឹងអាចកំណត់បានថា ស្ថានភាពណាខ្លះនឹងនាំមកនូវភាពខ្វែងគំនិតគ្នារវាងក្រុមការងារនៅក្នុងក្រុមហ៊ុន និងយល់យ៉ាងច្បាស់ថា ភាពខ្វែងគំនិតគ្នា ឬ ជម្លោះទាំងនោះមិនមែនសុទ្ធតែមិនល្អនោះឡើយប្រសិនបើខ្លួនអាចទាញវាយកមកគ្រប់គ្រងបាន។ សម្រាប់អ្នកគ្រប់គ្រងល្អនាំយកនូវអ្វីដែលល្អបំផុតចេញពីសមាជិកម្នាក់ៗនៃក្រុមការងារដោយកំណត់បានពីរបៀបលើកទឹកចិត្តក្រុមការងារម្នាក់ៗឲ្យទទួលបានលទ្ធផលល្អបំផុត។ មិនតែប៉ុណ្ណោះ អ្នកដឹកនាំល្អអាចចែករំលែកមតិរិះគន់កែលំអពីក្រុមការងារម្នាក់ៗដែលនឹងធ្វើឲ្យពួកគេទទួលបានអត្ថប្រយោជន៍ និងជាពិសេសគឺការផ្តល់ទំនុកចិត្តឲ្យក្រុមការងារទាំងមូល។ យ៉ាងណាមិញ ដើម្បីជោគជ័យលើចំណុចទាំងនេះបាន វាមិនមែនជារឿងងាយស្រួលនោះឡើយ។ អ្នកត្រូវមានភាពអត់ធ្មត់ឲ្យបានខ្ពស់បំផុត និងស្គាល់ចិត្តសាស្ត្ររបស់មនុស្សឲ្យបានច្បាស់។ ប្រសិនបើអ្នកនៅមានចំណុចខ្វះខាតត្រង់ចំណុចនេះ អ្នកអាចសិក្សារៀនសូត្របន្ថែមបាន។ ដូច្នេះហើយ អ្វីដែល អ្នកត្រូវចាំនោះគឺ ត្រូវរៀបចំខ្លួនឯងជាអ្នកគ្រប់គ្រងក្រុមការងារដ៏ល្អម្នាក់ ហើយលុបបំបាត់ចោលភាពអាត្មានិយមមិនយកទស្សនៈខ្លួនឯងត្រូវគ្រប់ពេលនោះឡើយ។ អ្វីដែលអ្នកត្រូវផ្ដោត អ្នកមិនចាំបាច់ធ្វើជាអ្នកឆ្លាតជាងគេបំផុតនៅក្នុងក្រុមការងារនោះទេ ពោលគឺជួយឲ្យក្រុមការងារកាន់តែឆ្លាតគឺជារឿងល្អបំផុត៕
ប្រភព៖ Entrepreneur
