អ្នកវិទ្យាសាស្ត្ររកឃើញថា មនុស្សឆាប់ចូលគេងហើយឆាប់ក្រោក មានអត្រាជីវិតជោគជ័យច្រើន
អ្នកប្រហែលជាធ្លាប់បានអានសម្រង់សម្ដីរបស់លោក Ben Franklin ដែលបានផ្តល់ដំបូន្មានថា "ឆាប់ចូលគេង និងឆាប់ក្រោកធ្វើឲ្យមនុស្សមានសុខភាពល្អ បង្កើនទ្រព្យ និងឆ្លាតវៃ”។
ទស្សនៈរបស់លោកគឺជារឿងត្រឹមត្រូវដោយសារតែការស្រាវជ្រាវនានាក៏បានទទួលស្គាល់ដែរពីគុណសម្បត្តិជាច្រើននៃការឆាប់ទទួលទានដំណេក និងឆាប់ក្រោកនេះ៖
១.ជួយដោះស្រាយភាពអវិជ្ជមានបានល្អប្រសើរជាងមុន
ការចូលគេងយប់យឺតពេក ធ្វើឲ្យសមត្ថភាពខួរក្បាលរបស់អ្នកចុះខ្សោយ និងបង្កជាជម្ងឺស្ត្រេសច្រើនប្រសិនបើអ្នកគេងមិនបានគ្រប់គ្រាន់។ នេះមិនរាប់បញ្ចូលទាំងសកម្មភាពរំខានផ្សេងៗទៀតនៅពេលកំពុងទទួលទានដំណេកផងដែរ។ យ៉ាងណាមិញ នៅពេលអ្នកឆាប់ទទួលទានដំណេកឲ្យបានគ្រប់គ្រាន់ ឬយ៉ាងហោចណាស់ពី ៦ ទៅ ៩ ម៉ោង វានឹងអាចជួយដោះស្រាយបញ្ហាទាំងនេះបាន។
២.បង្កើតឱកាសភាពជោគជ័យបានច្រើន
យោងតាមការស្រាវជ្រាវរបស់លោក Christopher Randler ជាសាស្ត្រាចារ្យជីវវិទ្យាមកពីសាកលវិទ្យាល័យអប់រំ Heidelberg អាល្លឺម៉ង់បាននិយាយថា នៅពេលនិយាយអំពីជោគជ័យលើជំនួញអ្នកដែលក្រោកពីព្រលឹមមានឱកាសជោគជ័យច្រើន។ លោកថា អ្នកក្រោកពីព្រលឹមជាមនុស្សស្វាហាប់ សកម្ម មិនស្ពឹកស្រពន់ ឲ្យតម្លៃ លើពេលវេលា ដែលកត្តាទាំងនេះហើយទើបធ្វើឲ្យពួកគេមានឱកាសជោគជ័យលើការងារ ឬមុខជំនួញរបស់ពួកគេ។
៣.មានភាពរឹងមាំ ចូលចិត្តការសហការ មានមនសិការខ្ពស់
លោក Christopher Randler ក៏បានលើកឡើងបន្ថែមទៀតដែរថា បើប្រៀបធៀបទៅនឹងអ្នកចូលដំណេកយឺតនៅពេលយប់ អ្នកឆាប់ក្រោកពីព្រលឹមជាមនុស្សអត់ធន់ តស៊ូ រឹងមាំ សហការ រីករាយ និងមានមនសិការខ្ពស់ជាង។ លោកថា គុណសម្បត្តិនេះហើយដែលធ្វើឲ្យបុគ្គលដែលឆាប់ក្រោកពីដំណេកឆាប់ទទួលបានជោគជ័យ និងមានភាពជាអ្នកដឹកនាំល្អ មានទម្លាប់វិន័យផ្ទាល់ខ្លួន។
៤.ទទួលទានដំណេកគ្រប់គ្រាន់មានគុណប្រយោជន៍មហាសាលដល់សុខភាព
ប្រសិនបើអ្នកធ្វើការក្រៅម៉ោង ម្ចាស់ជំនួញផ្ទាល់ខ្លួន ឬជាឪពុកម្តាយរបស់គេ អ្នកពិបាកនឹងរកពេលឈឺសឹងមិនមាននោះឡើយ។ ប៉ុន្តែបញ្ហាទាំងនេះមិនចោទជាបញ្ហានោះឡើយប្រសិនបើអ្នកលៃលកពេលវេលាឲ្យបានត្រឹមត្រូវដោយឆាប់ចូលទទួលទានដំណេក ហើយឆាប់ក្រោកពីដំណេកនៅព្រឹកព្រលឹមវិញ។ នៅពេលឆាប់ក្រោកពីដំណេក អ្នកអាចមានពេលច្រើនដើម្បីហាត់ប្រាណ ឬធ្វើការងារផ្សេងៗដែលផ្តល់ប្រយោជន៍សម្រាប់សុខភាព និងការរកចំណូលរបស់អ្នក។
៥.ធ្វើឲ្យអ្នកមើលទៅស្អាត
បើប្រៀបធៀបគ្នា មនុស្សគេងមិនឆ្អែត ឬមនុស្សចូលចិត្តគេងយប់ជ្រៅមានរាងកាយមិនមាំមួនល្អជាងអ្នកឆាប់ចូលទទួលទានដំណេក និងអ្នកដែលឆាប់ក្រោកពីដំណេកនោះឡើយ។ សាកលវិទ្យាល័យ Stockholm បានរកឃើញថា មនុស្សចូលគេងយឺត និងក្រោកយឺតមិនសូវទាក់ទាញអ្នកដទៃបានច្រើននោះឡើយ៕
ប្រភព៖ Etrepreneur
