កិច្ចពិភាក្សាពាណិជ្ជកម្មរវាងចិននិងអាមេរិក បញ្ចប់ទៅដោយវឌ្ឍនភាព
តាមការចេញផ្សាយ និងបច្ចុប្បន្នភាពព័ត៌មានរបស់សារព័តមាន CGTN នៅថ្ងៃទី ២៥ កុម្ភៈ ២០១៩នេះបានឲ្យដឹងថា៖ ចិននិងសហរដ្ឋអាមេរិកសម្រេចបាននូវវឌ្ឍនភាពជាច្រើនលើបញ្ហារបស់ពួកគេ ដែលកំពុងតែកើតមានតាមរយៈការប្រជុំចុងក្រោយនៃសេដ្ឋកិច្ចថ្នាក់ខ្ពស់ និងកិច្ចពិភាក្សាពាណិជ្ជកម្មនៅទីក្រុងវ៉ាស៊ីនតោន នេះបើតាមការលើកឡើងពី គណៈប្រតិភូចិនកាលពីថ្ងៃអាទិត្យទី ២៤ កុម្ភៈ កន្លងមកនេះ។
កិច្ចពិភាក្សានេះបានធ្វើឡើងនៅចន្លោះថ្ងៃទី ២១ ដល់ថ្ងៃទី ២៤ ខែកុម្ភៈ ឆ្នាំ ២០១៩ ដែលជាជុំនួបចរចាលើកទី ៧ ចាប់តាំងពីខែកុម្ភៈឆ្នាំមុន។ អំឡុងពេលនៃជំនួបចុងក្រោយនេះ អ្នកចរចាចិននិងសហរដ្ឋអាមេរិចបានដាក់ចេញការអនុវត្តនូវការមូលមតិគ្នា ដែលផ្តោតទៅលើឯកសារកិច្ចព្រមព្រៀងមួយនៃជំនួបប្រធានាធិបតីទាំងពីរកាលពីកិច្ចប្រជុំមួយដែលបានប្រព្រឹត្តទៅកាលពីខែធ្នូ នៅប្រទេស អាហ្សង់ទីន។
គណៈប្រតិភូចិនបាននិយាយថាវឌ្ឍនភាពជាច្រើនដែលត្រូវបានបង្កើតឡើងលើបញ្ហាដែលបានកំណត់រួមមាន ការផ្ទេរបច្ចេកវិទ្យា ការការពារនូវកម្មសិទ្ធិបញ្ញា គ្មានរបាំងពន្ធគយ ឧស្សាហកម្មសេវាកម្ម កសិកម្ម និងអត្រាប្តូរប្រាក់ជាដើម។ គណៈប្រតិភូចិនបានបន្ថែមទៀតថា “ស្ថិតលើមូលដ្ឋាននៃវឌ្ឍនភាពចុងក្រោយនេះ ភាគីទាំងពីរនឹងបន្តការងាររួមគ្នាសម្រាប់ដំណាក់កាលបន្ទាប់ស្របតាមការណែនាំរបស់ក្បាលម៉ាស៊ីននៃប្រទេសទាំងពីរ”។
ក្នុងជំនួបនេះភាគីចិនបានដឹកនាំដោយលោក លូ ហ៊ី (Liu He) អនុប្រធានបក្សកុម្មយនីស្តចិន ដែលជាអ្នកតំណាងពិសេសរបស់ប្រធានាធិបតីចិនលោក ស៊ី ជីនពីង (Xi Jinping) ចំណែកភាគីអាមេរិកដឹកនាំដោយអ្នកតំណាងពាណិជ្ជកម្ម លោក រ៉ូបឺត ឡៃថៃហ្សឺ (Robert Lighthizer) និងលេខាធិការរតនាគារលោក ស្ទេវិន មនូសិន (Steven Mnuchin)។
គួរបញ្ចាក់ផងដែរថា អាមេរិកបានព្រមព្រៀងពន្យាការយកពន្ធទៅលើទំនិញចិន កាលពីជំនួបប្រជុំនៅអាហ្សង់ទីនកាលពីពេលកន្លងទៅ និងបានដាក់ឧសានវាទ ត្រឹមថ្ងៃទី៣១ ខែមីនា ឆ្នាំ ២០១៩ ដើម្បីធ្វើការចរចាបន្ថែមពាក់ព័ន្ធនឹងសង្គ្រាមពាណិជ្ជកម្មនេះ។
បន្ទាប់ពីការចរចានេះ ស្ថានភាពតានតឹងនៃពាណិជ្ជកម្មរវាងប្រទេសមហាអំណាចលេខ១ និងលេខ២នេះ អាចនឹងមានការធូរស្រាលជាងមុន ប៉ុន្តែនៅចាំមើលការចរចាបន្ថែមទៀតរវាងភាគីទាំងពីរ៕
ដោយ៖ ទីន ម៉ាទីយ៉ា
ប្រភព៖ CGTN
